رووداو دیجیتاڵ
یاڤوز ئاغرعەلیئۆغڵو کە پێشتر لە ئیی پارتی جیاببووەوە، پارتێکی بەناوی 'کلیک' دامەزراند و لە گوتاری دەسپێکدا بە تووندی هێرشی کردە سەر عەبدوڵڵا ئۆجەلان، رێبەری زیندانیکراوی پەکەکە.
دوای ئەوەی نووسراوی داواکاریی 'پارتی کلیل' لە لایەن وەزارەتی نێوخۆی تورکیا پەسندکرا، رۆژی دووشەممە 28-10-2024 لە رێوڕەسمێکدا لە ئەنقەرەی پایتەختی تورکیا، ئەو پارتە نوێیە بە سەرکردایەتیی یاڤوز ئاغرعەلیئۆغڵو راگەیێندرا.
ئاغرعەلیئۆغڵو وەکو سەرۆکی ئەو پارتە گوتارێکی پێشکێشکرد و باسی لەوە کرد کە تورکیا هیچ کێشەیەکی نییە چارەسەر نەکرێت، هەروەها لەبارەی بانگهێشتی دەولەت باخچەلی، سەرۆکی مەهەپە بۆ ئەوەی عەبدوڵڵا ئۆجەلان بچێتە پەرلەمان و گوتار پێشکێشبکات، گوتی: "لە حوکمی ئێمەدا دەوڵەتێک نابینن کە تیرۆرستان بانگهێشتی پەرلەمان بکرێن. بەڵکو دەوڵەتێک دەبێت کە مامەڵەی پێویست لەگەڵ تیرۆرستان دەکات. ئەو تۆڕە تیرۆرستییەی 40 ساڵە رۆڵەکانمان و گەلەکەمان تیرۆر دەکات، نەوەک سەردەستەکەی، ئەوانەی خۆشیشیان دەوێن، نابێت بێنە نێو پەرلەمان".
یاڤوز ئاغرعەلیئۆغڵو کە پەرلەمانتاری ئیی پارتی بوو، رۆژی 29-3-2023 دەستی لە ئیی پارتی کێشایەوە و رەخنەی تووندی لە سیاسەتی مەرال ئاکشەنەر، سەرۆکی ئەوکاتی ئیی پارتی گرت.
پارتی کلیل کە "ئا پارتی" کورتکراوەکەیەتی، بووە 158ـەمین پارتی سیاسی لە تورکیا.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ