رووداو دیجیتاڵ
بەڕێوەبەری پەیمانگەی ئیستەنبووڵ بۆ لێکۆڵینەوە رایگەیاند، "تیرۆر" تەنیا بە کوشتن دەوەستێندرێت. پێیوایە تەنیا چارەسەر بۆ هێزەکانی سووریای دیموکرات- هەسەدە، کوشتنیانە.
بەکر ئەتاجان، بەڕێوەبەری پەیمانگەی ئیستەنبووڵ بۆ لێکۆڵینەوە لە کاتی بەشداریکردن لە پرۆگرامێکی بی بی سی عەرەبیدا و کاتێک پرسیاری سەبارەت بە گوتەیەکی رەجەب تەیب ئەردۆغان، سەرۆککۆماری تورکیا لەبارەی چەکدانان یان کوشتنی هێزە کوردییەکانی رۆژئاوای کوردستان لێدەکرێت، دەڵێت: "تیرۆر بە گفتوگۆ ناتواندرێت بوەستێندرێت چونکە بکوژ دەکوژێت. تۆڵە بە تۆڵە، ئەو کەسانەی کوردیان کوشت، خەڵکی تورکیایان کوشت، خەڵکی عەرەبیان کوشت، خەڵکی سووریایان کوشت و ئاشوورییەکانیان کوشت، پێویستە بە تیرۆریست دابندرێن."
دوێنێ ئەردۆغان لە گوتارێکدا لە پەرلەمانی وڵاتەکەی گوتی: "بکوژە جوداخوازەکان یان خۆیان ماڵئاوایی لە چەکەکانیان دەکەن یان بە چەکەکانیانەوە لە سووریادا دەیاننێژین. ئێمە ئەو رێکخراوە تیرۆریستییە لەنێودەبەین، کە دەیەوێت دیوارێک لە خوێن لە نێوان ئێمە و برا کوردەکانماندا دروست بکات".
بەڕێوەبەری پەیمانگەی ئیستەنبووڵ بۆ لێکۆڵینەوە ئاماژەی بەوەشکرد، "پێویستە ئەوان ئەمڕۆ، سبەی و رۆژانی دواتر بکوژرێن و سزابدرێن. بکوژ دەکوژێت و پێویستە تیرۆریستان بکوژرێن." جەختی لەوەش کردەوە، "هیچ چارەسەرێک نییە تەنیا کوشتنیان نەبێت، دەبێت تفیان لێبکرێت."
بێژەری کەناڵەکە قسە بە بەکر ئاتاجان دەبڕێت و پێیدەڵێت، بە هیچ شێوەیەک رێگەپێدراو نییە، کە لە رێگەی کەناڵی بی بی سیییەوە بانگەشە بۆ کوشتن بکرێ و سەرکۆنەی قسەکانی دەکات.
هێزەکانی سووریای دیموکرات نزیکەی 100 هەزار چەکداری هەیە. زۆرینەیان چەکدارە کوردەکانی یەپەگە و ئەپەژەن، ئەوانەی دیکەش عەرەب و کەمینەکانی دیکەی سووریان. تورکیا هێزەکانی یەپەژە و یەپەگە بە درێژکراوەی پەکەکە لە سووریا دەزانێت.
گەورەترین نیگەرانیی ئەمنیی ئەمریکا لە سووریا چەکدارانی داعشن، بەڵام بۆ تورکیا هێزە کوردییەکانی رۆژئاوان، بەتایبەت پەیەدەیە و پێیوایە لە پەکەکەوە نزیکە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ