مەزڵووم عەبدی لەکاتی کۆنگرەیەکی رۆژنامەڤانی لە حەسەکە. وێنە: AFP
رووداو دیجیتاڵ
سەرچاوەیەک لەنێو ئەنجوومەنی نیشتمانیی کورد لە سووریا بە رووداوی راگەیاند، "ئەنەکەسە پەیامی بۆ ئەمریکا ناردووە، کە ئەوان ئامادەن لەگەڵ لایەنی بەرامبەر کۆببنەوە، بۆ دانوستاندنی کوردی – کوردی." هاوکات سەرکردەی یەکێک لە حیزبەکانی نێو پەیەنەکە بە رووداوی راگەیاند، "بەمزووانە ئەنەکەسە لەگەڵ مەزڵووم عەبدی کۆدەبێتەوە".
ئەو سەرچاوەیەی نێو ئەنجوومەنی نیشتمانیی کورد لە سووریا-ئەنەکەسە ئەمڕۆ دووشەممە قسەی بۆ رووداو کرد، گوتی، "پەیاممان داوەتە نێوەندگیرانی ئەمریکی، کە ئەنجوومەنی نیشتمانیی کوردی لە سووریا، ئامادەی دانوستاندنی کوردی – کوردییە". گوتیشی، "رەنگە سەرەتا کۆبوونەوە لەگەڵ مەزڵووم عەبدی بکرێت، دواتر لەگەڵ لایەنەکانی دیکەی نێو پارتەکانی یەکێتیی نیشتمانیی کورد - پەیەنەکە".
ئەو سەرچاوەیە بۆ رووداو جەختیکردەوە "بۆ کۆبوونەوەکان چاوەڕوانین کاتێک دیاری بکرێت لەلایەن نێوەندگیران و لایەنی بەرامبەر".
لەوبارەیەوە، کۆڤان کەنعۆ، سکرتێری پارتی رۆژ کە بەشێکە لە پەیەنەکە، لە کاتی بەشداریکردن لە بەرنامەی رۆژی هیوا جەمال ئاشکرایکرد، "بەمنزیکانە ئەنەکەسە لەگەڵ مەزڵووم عەبدی کۆدەبێتەوە بۆ پرسی یەکڕیزی و چارەسەرکردنی کێشەکان".
سکرتێری پارتی رۆژ جەخت دەکاتەوە لەوەی ئەوان وەکو پارتەکانی نێو پەیەنەکە، زیاتر لە 20 کۆبوونەوەیان کردووە، "لە هەموو کۆبوونەوەکاندا جەختمان لەسەر پێویستیی یەکڕیزیی نیوماڵی کورد و چارەسەرکردنی ناکۆکییەکان لەگەڵ ئەنەکەسە کردووەتەوە".
وەک کۆڤان کەنعۆ باسی دەکات، "مەزڵووم عەبدی دەستپێشخەریی کردووە، هەروەها نێوەندگیرانی فەرەنسی و ئەمریکی و دۆستانی کورد لە هەوڵدان بۆ نزیککردنەوەی لایەنەکان".
پەیەنەکە لەگەڵ مەزڵووم عەبدی کۆبووەتەوە و جەختیان لەسەر "چارەسەرکردنی ناکۆکییەکان و پێکهێنانی یەکڕیزی،" کردووەتەوە، کەنعۆ دەڵێت، "ئەگەر یەکڕیز نەبین، ناتوانین هیچ مافێکی کورد لە دیمەشق دەستەبەر بکەین".
دوای کەوتنی رژێمی ئەسەد، نێوەندگیرانی فەرەنسی و ئەمریکی هەوڵەکانیان چڕکردووەتەوە، بۆ نزیککردنەوەی لایەنەکانی رۆژئاوای کوردستان و دروستکردنی شاندێکی یەکگرتوو بۆ گفتوگۆکردن لەگەڵ دیمەشق، بەڵام تاوەکو ئێستا هیچ کۆبوونەوەیەکی فەرمی لەنێوان ئەنجوومەنی نیشتمانیی کورد و پارتەکانی یەکێتیی نیشتمانیی کورد نەکراوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ