رووداو دیجیتاڵ
بانکی ناوەندی دەڵێت، چەند ماڵپەڕێک بە ناوی فرۆشتنی دۆلار بە نرخی فەرمی مامەڵە بۆ هاووڵاتییان دەکەن، بەڵام "وەهمین" و نابێت سەردانیان بکرێت.
بانکی ناوەندی عێراق لە راگەیێندراوێكدا هاووڵاتییان لەوە ئاگادار دەکاتەوە کە "ماڵپەڕی وەهمی لە تۆڕە کۆمەڵایەتییەکان بە ناوی کۆمپانیای ئاڵوگۆڕی مۆڵەتپێدراوەوە بانگەشەی فرۆشتنی دۆلار بە نرخی فەرمیی بانکی ناوەندی دەکەن."
بانکی ناوەندیی عێراق بە نرخی فەرمیی 1320 دینار [132 هەزار دینار بەرامبەر 100 دۆلار] دۆلار دەداتە ئەو کەسانەی بە مەبەستی گەشتکردن دەچنە دەرەوەی وڵات.
بۆ ئەو مەبەستە، گەشتیارانی خوازیار دەبێت ناویان تۆماربکەن و بەڵگەنامەی فەرمیی گەشتکردن پێشکێشبکەن. ئەو ماڵپەڕانەش کە دۆلاری ساختە دەفرۆشن، بەستەرێک بۆ هاووڵاتییان دادەنێن و داوا دەکەن سەردانی بکەن. لەوێدا وادەیەک بۆ پێدانی دۆلار بە نرخی فەرمی دیاری دەکرێت.
بانکەکە روونیدەکاتەوە، ئەو ماڵپەڕانە رێنوێنی بۆ دانانی پارە بە دینار دەدەنە قوربانییەکانیان، چونکە بۆ وەرگرتنی دۆلار بە نرخی فەرمی، دەبێت سەرەتا گەشتیاران دینار بخەنە سەر هەژمارە بانکییەکانیان.
لە لایەکی دیکەوە بەڕێوەبەرایەتیی چاودێریی دامەزراوە داراییەکان دەڵێت، "بەدەستهێنانی ئەم جۆرە خزمەتگوزارییە لە رێگەی ئەلیکترۆنی لە ماڵپەڕی فەرمی کۆمپانیاکان دەکرێت (ئەگەر هەبێت). پرۆسەی دانانی پارەش بەشێوەیەکی تایبەتی هەر لە بارەگای سەرەکیی کۆمپانیاکە دەکرێت."
بەڕێوەبەرایەتییەکە باس لەوەشدەکات، ئەوانەی دەیانەوێت دۆلار بە نرخی فەرمی بکڕن، پێویستە لە رێگەی وێبسایتی فەرمیی بانکی ناوەندییەوە (https://cbi.iq/page/25) لیستی کۆمپانیا مۆڵەتپێدراوەکان ببینن.
دڵنیاییش دەدات لەوەی رێوشوێنی یاسایی دژی ئەو ماڵپەڕە وەهمییانە دەگرنەبەر.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ