سەدر: دەستدرێژیکردنە سەر زیارەتکارانی ئێرانی قەدەخەیە

 

ئەم داوایەی رێبەری رەوتی سەدر لە کاتێکدایە، لە چەند رۆژی رابردوودا لە تۆڕە کۆمەڵایەتییەکانی عێراق تۆمەتی دزین و کوشتن و هاتن بەبێ پاسپۆرت و رێگەپێدانی فەرمی درانەپاڵ ئەو زیارەتکارە ئێرانییانەی کە بۆ بەشداریکردن لە چلەی ماتەمینیی ئیمام حوسێن، کچەزای پێغەمبەری ئیسلام (د.خ)، چوونەتە عێراق.

 

موقتەدا سەدر، رێبەری رەوتی سەدر ئەمڕۆ یەکشەممە 11/9/2022، لە هەژماری خۆیدا لە تویتەر رایگەیاند، دەبێ هەموو خۆشەویستانی چاکسازی کە دژی ستەم و گەندەڵی راپەڕین، "بەرەو قیبلەی چاکسازی بڕۆن" لە کەربەلا.

 

موقتەدا سەدر هەروەها دەڵێت، بەخشینەوەی تۆمەت و ناونانی کەسانێک بە بەعسی یان تیرۆریست یان میلیشیا و بەخشینەوەی نازناوی لەو شێوانە لە زیارەتی چلەی ماتەمینی "قەدەخە و حەرامە".

 

ژمارەیەکی زۆر لە زیارەتکارانی ئێرانی بۆ بەشداری لە چلەی ماتەمینیی ئیمام حوسێن هاتوونەتە عێراق، لە لایەن هەندێک لە بەکارهێنەرانی تۆڕە کۆمەڵایەتییەکان تۆمەتی جۆراوجۆریان دەدرێتە پاڵ.

 

رێبەری رەوتی سەدر هۆشداریی دەدات و دەڵێت، "دەستدرێژیکردن"ـە سەر زیارەتکاران بە تایبەتی زیارەتکارانی ئێرانی، جا بە دەست، یان زمان، یان بڵاوکراوە بێت، "کارێکی  قەدەخەکراو و حەرامە".

 

رێبەری رەوتی سەدر جەخت لەوە دەکاتەوە کە دەبێت هێزەکانی حەشد (حەشدی شەعبی) و سەرایا سەلام ئەرکی ئەمنی یان کۆنترۆڵکردنی خاڵەکانی پشکنین لەئەستۆ نەگرن و ئەمساڵ هیچ ئەرکێکی ئەمنی رانەپەڕێنن، چونکە رەنگە لێکەوتەی خراپی هەبێت.

 

رێپێوانی زیارەتکارانی شیعە بۆ بەشداریکردن لە رێوڕەسمی چلەی ماتەمینیی ئیمام حوسێن لە کەربەلا چەند رۆژێکە دەستیپێکردووە و بڕیارە لە رێکەوتی 17/9/2022 رێوڕەسمی چلەکە بەڕێوەبچێت.