رووداو دیجیتاڵ
دەزگەى ئاسایشى نیشتمانیى عێراق ژن و پیاوێکى لە سەلاحەدین دەستگیرکرد کە بەرپرسیارێتییان هەیە و بە ساختە زەوییان فرۆشتووە. بە گوتەى ئەندامێکى ئەنجوومەنى پارێزگا، 18 پارچە زەویى نیشتەجێبوونیان بە ساختە فرۆشتووە.
ئەمڕۆ یەکشەممە 10 ى تشرینى دووەم، دەزگاکە دەستگیرکردنى ئەو دوو کەسەى بڵاوکردەوە، پیاوەکە بەڕێوەبەرى شارەوانیى قەزاى شەرگاتە و ژنەکەش یاریدەدەرى بەڕێوەبەرى تۆمارى خانووبەرەى قەزاکەیە.
یاسین داوودى، ئەندامى ئەنجوومەنى پارێزگاى سەلاحەدین بە تۆڕى میدیایی رووداوى راگەیاند: لەو دۆسیەدا 18 پارچە زەویی نیشتەجێبوون بە ساختە فرۆشراون و لیژنەى دەستپاکى ئەنجوومەنى پارێزگا لێکۆڵینەوەى لە دۆسیەکە کردووە.
بە گوێرەى ئاسایشى نیشتمانیى عێراق، ئەو دوو کەسە مامەڵەى فرۆشتنى زەوییەکانیان ساختە کردووە و بەڵگەکان سەلماندوویانە کە ئەو پارچە زەوییانەیان بە نایاسایی کردووە بە ناوى هاوڵاتییان و فەرمانبەرانى فەرمانگەکانیان و نووسراوى فەرمییان بۆ ئەو مەبەستە ساختە کردووە.
ئەو دوو کەسە بۆ ئەو کارەیان سوودیان لە بڕگەى سێى مادەى 25 ى یاساى فرۆشتن و بەکرێدانى موڵکى دەوڵەت وەرگرتووە کە باس لەوە دەکات، دواى وەرگرتنى رەزامەندیى وەزارەتى شارەوانى، شارەوانییەکان دەتوانن زەوىی تەرخانکراو بۆ نیشتەجێکردن بفرۆشن بە نرخێک کە لیژنەیەکى تایبەتمەند بەبێ زیادکردن دیاری دەکات.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ