فوئاد حوسێن: کۆمیسیۆنی عێراق سەرپەرشتیی هەڵبژاردنی هەرێمی کوردستان دەکات

 

د. فوئاد حوسێن، وەزیری دەرەوەی عێراق بە تۆڕی میدیایی رووداوی گوت، "پێویستە کارەکان بەردەوام بێت و نابێت بۆشایی جێبەجێکاری دروستبێت لە ھیچ شوێنێک، با پەرلەمانیش نەمێنێت، خۆ حکومەت بەردەوام دەبێت تاوەکو کاتی ھەڵبژاردن، ھەڵبژاردنیش کۆمیسیۆنی ھەڵبژاردنی عێراق سەرپەرشتی دەکات، ئەمە بڕیارێکی روونی دادگەی فدراڵییە."

 

لە ئەگەری پەسندکردنی پڕۆژەیاسای بودجەی گشتی، تەواوی شایستە داراییەکانی هەرێمی کوردستان لەلایەن حکومەتی عێراقەوە رەوانەدەکرێت و حکومەتی هەرێمی کوردستانیش دەسەڵاتی تەواوی هەیە لەسەر وەرگرتن و خەرجکردنی.

 

عەلی تەمر، راوێژکاری یاساییە و باس لەوە دەکات، "بەڵێ، بەشەبودجە بابەتێکی شایستەییە بۆ ھەموو پارێزگاکان لەنێویشیان ھەرێمی کوردستان، دەبێت بنێردرێت و شایستەی شەرعین، بێگومان دەبێت ھەماھەنگی لەگەڵ حکومەتی ھەرێم بکرێت، نابێت بۆشایی دەستووری ھەبێت و ھەمووکارێک دەکات، بەڵام نابێت بڕیاری چارەنووسساز بدات وەکو ئەنجامدانی ھەڵبژاردن یان بڕیارێک کە پەیوەست بێت بە داھاتووی ھەڵبژاردن."

 

رۆژی 30ـی ئایار، دادگەى باڵاى فیدراڵیى عێراق بڕیاریدا بە "نادەستووریبوون"ی یاسای ژمارە 12ـى درێژکردنەوەى خولى پێنجەمى پەرلەمانى کوردستان کە لە 9ـى تشرینى یەکەمى 2022 دەرکرا و رایگەیاند، تەمەنى پەرلەمانى کوردستان لەگەڵ کۆتاییهاتنى خولى پێنجەم کۆتایی هاتووە و هەر بڕیارێک دواى کۆتاییهاتنى دەرکرابێت لە رووى دەستوورییەوە پووچەڵە.