هاونیشتمانییانی مەریوان دەیانەوێت دارستانێک لە ناوچەکە دروست بکەن؛ 'وەکو ماڵی خۆمان دەیپارێزین'

 

یەکێک لە هاونیشتمانییانی مەریوان، لەبارەی هەڵمەتەکەوە دەڵێت، "مەنتیقەی کۆماسی یەکێکە لەو ناوچانەی کە وشکە و دار و درەختی تێدانییە، داواکاریین ئەمە هەڵمەتێکی ژینگەییە، هەر کەسێک لە هەر شوێنێک بێت دەتوانێت بێت لە هەڵمەتەکە بەشدار بێت."

 

لە مەریوان نەمامی بەڕوو بەو هیوایە دەچێنرێت دارستانێکی لێ بەرهەم بێت. ژمارەیەکی زۆری هۆگرانی ژینگە لە گوندی هەڵیزاوا لە ناوچەی کۆماسیی مەریوان، لەم هەڵمەتەدا بەشدارن، لە منداڵەوە تاوەکو ژن و پیاو و بەسەڵاچووان. 

 

هاونیشتمانییەکی دیکە لە مەریوان باس لەوەدەکات، "ئەمە [چاندنی درەخت] کاری هەموو مرۆڤێکە هەر کەسە لە هەر شوێنێک بێت پێویستە ئاگای لە ژینگە بێت و بیپارێزێت."

 

گرووپی ژینگەدۆستانی زاگرۆس کە ئەم دەسپێشخەرییەی کردووە، دەڵێت، بۆ بووژانەوەی زاگرۆس، درێژەپێدانی نەریتی چاندن و تێگەیشتن لە گرنگی ژیانی سرووشت ئەم کارەیان کردووە. ئەم ناوچەیە دارستانی نییە، بەڵام ئەمان دەیانەوێت دەستپێکی گۆڕانکاریی بۆ داهاتووی ناوچەکەیان بن.

 

بەشێکی زۆری پارێزگای سنە رووتەڵانە، زیاتر ناوچەی سنوورییەکان دارستانی هەیە و بەشی چڕی لە ناوچەی مەریوانە، بەڵام بە هۆکاری جیاواز رووبەری ئەو دارستانانەش رووی لە کەمییە، ئەگەر هەوڵی چالاکڤانانی ژینگە نەبێت، لەنێوچوونیان زۆر ناخایەنێت.

 

چالاکڤانێکی ژینگە لەسەر هەڵمەتەکە و دۆخی ژینگەیی لە مەریوان داوا لە هاونیشتمانییان دەکات، تاوەکو دەتوانن دار و دارستان نەسووتێنن، بەڵکو خزمەتی بکەن، لەبری دارسووتاندن سووتەمەنی دیکە بەکاربهێنن و وەکو ماڵی خۆیان خزمەتی دارستانەکان بکەن." 

 

مەریوان لە چالاکییە ژینگەییەکاندا پێشڕەوە. لێرە لە کەنارەکانی دەریاچەی زرێبار ئەنجوومەنی سەوزی چیا ئامادەکاری بۆ هاتنی باڵندە کۆچەرییەکان دەکات، زبڵەکەی کۆ دەکەنەوە، زبڵی ئەو کەسانەی  خەمی ژینگەیان نییە.

 

ئەنجوومەنی سەوزی چیا لەبارەی ژینگەی ناوچەکەوە جەخت دەکاتەوە کە ژینگەی ناوچەکە مەترسی زۆر لەسەرە، چ لەڕووی پیسکردنەوە و چ لە رووی داگیرکردن و کەمبوونەوەی ئاوەوە، بۆیە دەبێت "هەوڵی خۆمان بدەین بۆ ئەوەی زرێبارێکمان هەبێت لە داهاتوو ئەو منداڵانە کەڵکی لێوەربگرن."  

 

ژیانی دانیشتووان، هاتنی باڵندە کۆچەرییەکان و سەردانیکردنی گەشتیاریش بە ژینگەکەیەوە بەندە، هاونیشتمانییانی مەریوان درک بەوە دەکەن و ژن و منداڵ و بەساڵاچوو هەوڵی پاراستنی دەدەن. 

 

هاونیشتمانییەک بە دڵخۆشییەوە باسی پاراستنی ژینگەی ناوچەکەیان دەکات و دەڵێت، ئەمە جێی باوک و باپیرمانە، ئەم کەژ و کێوە تا ئێمە و کورد ماوە نەفەتێت بە بەڕوولان بێت یان بە هەرچییەک بێت نابێت بفەوتێت، چونکە شوێنی باوک و باپیرمانە." 

 

وەکو ئەوەی لە گوتەکانیان دەردەکەوێت، ئەوانەن وادەکەن هاونیشتمانییانی مەریوان تۆو و نەمامی ژیان لە ناوچەکەیان بچێنن.