رووداو دیجیتاڵ
بەگوێرەی راگەیێندراوێکی وەزارەتی بەرگریی تورکیا کە 25-12-2023 بڵاویکردووەتەوە، لە بۆردوومانەکانی تورکیا بۆ سەر رۆژئاوا و باشووری کوردستان و سووریا 26 شەڕڤان گیانیان لەدەستداوە.
وەزارەتی بەرگریی تورکیا لە هەژماری فەرمیی خۆیدا لە تۆڕی کۆمەڵایەتیی ئێکس رایگەیاند، "بەپێی ئامارە سەرەتاییەکان لە ئۆپەراسیۆنەکانیان لە "باکووری عێراق و رۆژئاوای سووریا، لانیکەم 26 شەڕڤان گیانیان لەدەستداوە. هاوکات وەزارەتی بەرگریی تورکیا باس لە درێژەدان بە ئۆپەراسیۆنەکان دەکات".
وەزارەتی بەرگریی تورکیا کاژێر 10:00ی شەوی (23-12-2023) رایگەیاند، ئۆپەراسیۆنێکی ئاسمانیی لە باشوور و باکووری کوردستان و سووریا دەستپێکردووە 29 پەناگە، ئەشکەوت و کۆگا و وێستگەی نەوتی بۆردومانی کردوون، کە گوایە شوێنی مانەوەی گەریلا و شەڕڤانان بووە. قامشلۆ، تربەسپی، عامودێ و دێرک لەو شوێنانەی رۆژئاوای کوردستان بوون کە بۆردومانکران.
چی روویدابوو؟
وەزارەتی بەرگریی تورکیا ئێوارەی رۆژی شەممە 23-12-2023 بڵاویکردەوە، گەریلاکانی پارتی کرێکارانی کوردستان - پەکەکە لە هەرێمی کوردستان، لەو ناوچەیەی تورکیا بە 'ناوچەی ئۆپەراسیۆنی چنگ-قوفڵ' ناوی دەبات، هێرشیان کردووەتە سەر سەربازانی سوپای تورکیا. لە بەشێکی راگەیێندراوەکەدا وەزارەتی بەرگریی تورکیا کوژرانی شەش سەربازی خۆی و گیانلەدەستدانی 13 گەریلای راگەیاند.
میدیای نزیک لە پەکەکە نیوەڕۆی شەممە 23-12-2023 بڵاویکردەوە، رۆژی هەینی 22-12-2023 گەریلا لە ناوچەی خواکورک، لە سێ لاوە هێرشیان کردووەتە سەر هێزەکانی سوپای تورکیا. هەر بەگوێرەی میدیای نزیک لە پەکەکە لەو هێرشەدا 36 سەربازی تورکیا کوژراون و 17 چەکیشیان کەوتووەتە دەستی گەریلاکان.
ئەم شەڕ و پێکدادانە لە چوارچێوەی ئۆپەراسیۆنێکدایە، کە تورکیا ناوی ناوە چنگ- قوفڵ و لە بەرەبەیانی رۆژی 18-4-2022 لە ناوچەکانی ئاڤاشین، مەتین و زاپ لە خاکی هەرێمی کوردستان، بۆ سەر پێگەکانی پەکەکە دەستیپێکردووە و تائێستاش بەردەوامە. وەزارەتی بەرگریی تورکیا گیانلەدەستدانی نزیکەی 840 گەریلا و کوژرانی نزیکەی 120 سەربازی سوپای وڵاتەکەی راگەیاندووە؛ هەپەگەش کوژرانی نزیکەی سێ هەزار سەربازی تورکیا و گیانلەدەستدانی نزیکەی 400 گەریلای راگەیاندووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ