دانیشتووانی چوار شاری کرماشان داوای جیاکردنەوەی رێگەی هاتووچۆیان دەکەن

 

 

بەهۆی زۆربوونی رووداوەکانی هاتووچۆ لە رێگەی سەرەکیی کرماشان بۆ شارەکانی روانسەر، جوانڕۆ، پاوە و سەلاسی باوەجانی، کەمپینێکی واژۆ کۆکردنەوە لەو شارانە دەستیپێکردووە. 

 

رێکخەرانی کەمپینەکە نامەیەکیان ئاراستەی سەرۆککۆمار و وەزیری رێگەوبانی ئێران کردووە و تێیدا دەڵێن، رێگەی کرماشان بۆ ئەو چوار شارە پڕ هاتووچۆترین رێگەی پارێزگای کرماشانە و هاوکات پڕ قوربانیترین رێگەیە. داوا دەکەن، بڕیار بدرێت، رێگەی هەر کام لەو شارانە بۆ کرماشان جیا بکرێتەوە، تاوەکو لەوە زیاتر خەڵک نەبنە قوربانی رووداوی هاتووچۆ.

 

لە کرماشانەوە، رێگەیەکی سەرەکی هەیە بۆ هاتن و چوون بۆ شارەکانی پاوە، جوانڕۆ، سەلاسی باوەجانی و روانسەر، کە دەکەونە باکووری رۆژئاوای پارێزگاکە. ئەو رێگەیە بە ناوچەی هەورامان و ملەی تەتەدا تێدەپەڕێت و تێکەڵ بە رێگەی سنە - مەریوان دەبێتەوە. بەو هۆیەوە هاتووچۆی زۆری لەسەرە و رووداوی هاتووچۆی زۆر تێیدا روو دەدات.

 

بەپێی ئاماری دادپزیشکیی کرماشان، لە حەوت مانگی یەکەمی ئەمساڵی هەتاویدا (لە 21-03-2023 تاوەکو 22-10-2023) 373 کەس لەو پارێزگایە بە رووداوی هاتووچۆ گیانیان لەدەستداوە. لەو ماوەیەدا حەوت هەزار و 12 کەس (چوار هەزار و 794 پیاو و دوو هەزار و 218 ژن)یش بە رووداوی هاتووچۆ بریندار بوون.