ئەنجوومەنی سەرکردایەتیی یەکێتی: دەنگەکانمان دووقات کردەوە

 

 

هەروەها دەڵێت، "ئێستا یەکێتیمان گەڕاندووەتەوە بۆ قۆناخی سەرۆک مام جەلال لە قورسایی سیاسی و دیپلۆماسی لە دونیادا".

 

ئەنجوومەنی سەرکردایەتی یەکێتیی نیشتمانیی کوردستان ئەمڕۆ پێنجشەممە کۆبووەتەوە.

 

لە بەشێکی دیکەی راگەیێندراوەکەدا ئاماژە بەوە دەکات، "کۆبوونەوەی سەرکردایەتی وێڕای جەختکردنەوە لە هەڵسەنگاندنی بابەتیانەی کۆی پرۆسەی هەڵبژاردن دەستخۆشی لە کەمپینی نوێباو و داهێنەرانەی یەکێتی بە سەرۆکایەتی هەڤاڵ بافڵ جەلال تاڵەبانی کردەوە، کە نەک هەر گەرم و گوڕیی دا بە هەڵمەتە سەوزەکەمان بەڵکو دیمەنێکی شارستانی و دیموکراتی جوانی بە هەڵبژاردنی خولی شەشەمی پەرلەمان کوردستانیش بەخشی".

 

 

ئەمڕۆ 24ی 10ی 2024، ئەنجوومەنی سەرکردایەتی یەکێتیی نیشتمانیی کوردستان بە سەرپەرشتی هەڤاڵ بافڵ جەلال تاڵەبانی، سەرۆکی یەکێتیی نیشتمانیی کوردستان کۆبووەوە.

 

کۆبوونەوەی سەرکردایەتی کە لە هۆڵی کۆبوونەوەکانی مەکتەبی سیاسی لە سلێمانی سازکرا، بە ساتێک وەستان بۆ گیانی پاکی شەهیدان دەستیپێکرد و تەرخانکرا بۆ هەڵسەنگاندنی ئاکامی هەڵبژاردنی پەرلەمانی کوردستان و سەرکەوتنی یەکێتی لەدووقاتکردنی دەنگەکانی و گەشانەوەی گیانی سەوزکردنی سیاسەت و دیموکراتی لە کوردستاندا.

 

سەرەتای کۆبوونەوەکە سەرۆک بافڵ وێڕای پیرۆزبایی لە گەلەکەمان و دەستخۆشی لە هەڤاڵان، هۆکاری سەرکەوتنی گەڕاندەوە بۆ یەکگوتاری و  یەکڕیزیی سەرکردایەتی و هیمەتی هەڤاڵانە لە کەمپینە پڕ جۆش و خرۆشەکانیان کە رۆحی بەرزی یەکێتی بوونیان زیندووکردەوە، بە تایبەت لەناو کوڕان و کچانی لاودا، وتیشی: ئەم جۆش و خرۆشە هانمان دەدات پێداگری بکەین لەسەر پەیامی راستکردنەوەی رێڕەوی حکومڕانی و گێڕانەوەی هاوسەنگی هێز و پابەندبوون بەو بەڵێنانەی بە خەڵکە خۆشەویستەکەی خۆمانمان داوە، بە تایبەتی ئەوەی پەیوەندی بە ژیان و گوزەرانی هاووڵاتیانەوە هەیە، لەناویشیاندا پرسی (تەوتین)ی مووچە. ئاماژەی بەوەشدا سەرکەوتنمان هەر لەسەر ئاستی هەرێم و عیراق نییە، بەڵکو ئێستا یەکێتیمان گەڕاندۆتەوە بۆ قۆناغی سەرۆک مام جەلال لە قورسایی سیاسی و دیپلۆماسی لە دونیادا.

 

کۆبوونەوەی سەرکردایەتی وێڕای جەختکردنەوە لە هەڵسەنگاندنی بابەتیانەی کۆی پرۆسەی هەڵبژاردن دەستخۆشی لە کەمپینی نوێباو و داهێنەرانەی یەکێتی بە سەرۆکایەتی هەڤاڵ بافڵ جەلال تاڵەبانی کردەوە، کە نەک هەر گەرم و گوڕیدا بە هەڵمەتە سەوزەکەمان بەڵکو دیمەنێکی شارستانی و دیموکراتی جوانی بە هەڵبژاردنی خولی شەشەمی پەرلەمان کوردستانیش بەخشی.

 

سەرکردایەتی پێزانینی بێپایانی خۆی بۆ جەماوەری کوردستان دەربڕی سەبارەت بەو متمانەی بە یەکێتییەکەی خۆیانیان دایەوە و جەختی لەسەر ستراتیژی گەڕانەوە بۆ  پرەنسیپەکانی سەرۆک مام جەلال کردەوە کە هەمیشە لە خزمەتی خەڵکی بەوەفای کوردستاندا درێغی نەکات، بۆ ئەو مەبەستەش ئۆرگانەکان و هەڤاڵان راسپێردران وزە و توانای خۆیان بخەنە خزمەت ئەو دیدگایەی کە سەرۆک بافڵ جەلال تاڵەبانی لە کەمپینی هەڵبژاردندا ناوی لێنا (کوردایەتی نوێدەکەینەوە) لەسەر بنچینەیەکی سەردەمیانە کە خزمەتی راستەقینە بە کۆمەڵانی خەڵکی کوردستان بکات.