هەڵەیەک روویدا! دووبارە هەوڵبدە
رووداو دیجیتاڵ
ساڵانێکە ئێش و ئازار نەیهێشتووە چێژ لە جیهانی منداڵییان ببینن، گەورەترین هاوڕێیان پزیشکە و کەرەستەی یاریشیان دەرمان و چارەسەرە. باوکیان دەڵێت، کوڕەکەی بەتەواوی گورچیلەی لەدەستداوە و کچەکەشی تەنیا کەمتر لە ساڵێکی بۆ دانراوە ئەویش گورچیلەی لەدەستدەدات.
سابر و ئامینە خوشک و برایەکن کە تەمەنیان 11 و 7 ساڵە و لە گردەسێنی ئاکرێ دادەنیشن. خێزانێکی هەژارن و بەگوتەی باوکیان هەر لە سکماکەوە کێشەی گورچیلەیان هەبووە و ساڵانێکە لە هەولێر و موسڵ خەریکی وەرگرتنی چارەسەرن.
ئەیاز ئیسلام نەعمان، باوکی منداڵەکان بە تۆڕی میدیایی رووداوی راگەیاند "منداڵەکانم کێشەی گورچیلەیان هەیە و میز لەگەڵ خوێن دەچێتەوە ناو لەشیان و دەبێتە چەوری. هەر لە منداڵییەوە لە هەولێر و موسڵ خەریکی وەرگرتنی چارەسەرن و ئازارێکی زۆریان هەیە".
بەگوتەی ئەیاز ئیسلام، لەدوایین پشکنین دەرکەوتووە کە سابر هەردوو گورچیلەکەی لەکار کەوتووە و کاژێر سفری بۆ دانراوە و بەگوتەی پزیشکەکەی دەبێت بەخێرایی گورچیلەی بۆ بچێندرێت، ئەگینا ژیانی دەکەوێتە مەترسییەوە.
سەبارەت بە دۆخی تەندروستیی ئامینە، ئەیاز ئیسلام گوتی؛ بەپێی پشکنینەکان پزیشکان دەڵێن ئەویش کەمتر لە ساڵێکی دیکە گورچیلەکانی لەدەستدەات و پێویستە بۆ ئەویش گورچیلە بچێندرێت.
باوکی سابر و ئامینە کە دوو منداڵی دیکەی هەیە، داوا لە بەرپرسان و خێرخوازان دەکات ژیانی منداڵەکانی لە مەترسیی رزگار بکەن. بەگوتەی ئەو، چاندنی گورچیلە تێچوویەکی زۆری دەوێت کە بۆ هەردووکیان تێچووەکەی 60 ملیۆن دینارە و لە توانایدا نییە، چونکە وەک خۆی دەڵێت، پێشمەرگەیە و بە مووچەیەکی کەم بەهیچ شێوەیەک ناتوانێ خەرجییەکانیان دابین بکات.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ