رووداو دیجیتاڵ
دوای بردنەوەی جامی کەنداو لەلایەن یانەی دهۆکەوە، پارێزگاری کەرکووک پەیامێکی پیرۆزبایی ئاراستەی یانەکە کرد و سەرکەوتنەکەیان بە "مێژوویی" ناودەبات.
رێبوار تەها، پارێزگاری کەرکووک ئەمشەو 15ی نیسان پەیامێکی پیرۆزبایی ئاراستەی یانەی دهۆک کرد و دەڵێت، "پیرۆزباییەكی گەرمتان دەكەم بەبۆنەی بوون به پاڵەوانی جامی یانەکانی کەنداو."
پارێزگاری کەرکووک ئاماژەی بەوە کردووە، "ئەم سەرکەوتنە مێژووییە لە یانەی دهۆك و وەرزشوانان پیرۆزبێت و ببێتە سەرەتای بەدەستهێنانی نازناوی زیاتر، ئومێدی سەركەوتن بۆ سەرجەم یانە وەرزشییەكان دەخوازم و جارێكی دیكەش پشتیوانیی خۆمان بۆ وەرزشوانان و بەرەوپێشبردنی رەوتی وەرزش لە شارە خۆشەویستەكەمان، كەركووك، دووپات دەكەینەوە."
ئەمڕۆ یانەی دهۆک لە یاریگەی خۆی بۆ یاریی کۆتایی جامی کەنداو میوانداریی یانەی قادسییەی کوێتیی کرد و بە ئەنجامی دوو گۆڵ بە گۆڵێک، لە یانە کوێتییەکەی بردەوە و بووە پاڵەوانی جامی کەنداو.
لەنێو یاریگەی دهۆک دەیان هەزار هاندەر ئامادەبوون و پشتیوانییان لە یانەکە کرد. پێش یارییەکەش بەرپرسانی حکومی و حیزبیی کوردستان پشتیوانیی خۆیان بۆ یانەکە دەربڕی؛ تەنانەت محەممەد شیاع سوودانی، سەرۆکوەزیرانی عێراقیش پاڵپشتیی مادی و مەعنەویی بۆ یانەی دهۆک دەربڕی.
دوای سەرکەوتنی یانەی دهۆکیش سەرکردەکانی هەرێمی کوردستان پەیامی پیرۆزبایی جۆراوجۆریان ئاراستەی یانەکە کرد و زۆربەیان بە "سەرکەوتنێکی مێژوویی" ناویان برد.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ