رووداو دیجیتاڵ
لە سنووری ئیدارەی راپەڕین، کەسێک بە تۆمەتی دەستدرێژیکردنە سەر منداڵێکی هەشت ساڵان دەستگیر کرا، بەڵام دوای ئەوەی پشکنینی دادپزیشکی دەرچوو و دەریخست کە منداڵەکە دەستدرێژیی نەکراوەتە سەر، کەسەکە بە دەستەبەری ئازاد کرا.
21ی ئەم مانگە لە قەزای حاجیاوا لە سنووری ئیدارەی راپەڕین، خاوەن نۆرینگەیەکی کەڵەشاخ بە دەستدرێژیکردنە سەر منداڵێک تۆمەتبار کرا و دوێنێ دووشەممە دەستگیر کرا.
منداڵەکە تەمەنی هەشت ساڵە. بەگوێرەی زانیارییەکانی رووداو، دایکی منداڵەکە دژی خاوەن نۆرینگەکە سکاڵای تۆمار کردووە و دواتر منداڵەکە رەوانەی دادپزیشکیی رانیە کراوە.
سەرچاوەیەکی بەرپرس لە ئیدارەی راپەڕین ئەمڕۆ سێشەممە بە تۆڕی میدیایی رووداوی گوت، "ئەنجامی پشکنینی دادپزیشکی دەرچوو و دەڵێت، 100% هیچ دەستدرێژییەک نەکراوەتە سەر منداڵەکە. بۆیە تۆمەتبار راستەوخۆ و بە دەستەبەری ئازاد کرا."
بە گوتەی ئەو بەرپرسە کە لە لێکۆڵینەوەی دۆسیەکەدا بەشدارە، "پێدەچێت" دۆسیەکە نەبرێتە دادگە و لەسەر بنەمای پشکنینەکە بە تەواوی دابخرێت.
کوڕێکی تۆمەتبارەکەش بە تۆڕی میدیایی رووداوی گوت، "تەنیا تۆمەت و قسەی ئەو ماڵە بوو. کاژێر 02:00ی پاشنیوەڕۆ باوکم ئازاد کرا."
کەسوکاری منداڵەکە بە رووداویان گوت، دوای ئەوەی منداڵەکەیان بە مەبەستی کڕینی شتومەک بە پاسکیل چووەتە مارکێتێکی نزیک نۆرینگەکە و ماوەیەکی زۆری پێچووە و نەگەڕاوەتەوە، دایکی بەدوایدا چووە و بینیویەتی پاسکیلی کوڕەکەی لەبەردەم نۆرینگەکە وەستاوە.
کەسوکاری منداڵەکە دەڵێن، دوای ئەوەی دایکەکە دەچێتە نێو نۆرینگەکە، دەبینێت خاوەن نۆرینگەکە جلەکانی لەبەر منداڵەکەی داکەندووە و ویستوویەتی دەستدرێژیی سێکسی بکاتە سەری، لەو کاتەدا دایکی هاواری کردووە و خەڵکی دەوروبەری ئاگادار کردووەتەوە. کەسوکاری خاوەن نۆرینگەکەش ئەو تۆمەتە رەت دەکەنەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ