گوتەبێژی ناوچەی یەکی پاسەوانی سنوور: ئاگاداری فێڵبازەکان بن

 

رۆژی دووشەممە 23-1-2023، عەقید کاروان خۆشناو، گوتەبێژی ناوچەی یەکی ھێزەکانی پاسەوانی سنووری عێراق لەبارەی دوایین پێشهاتەکانی دامەزراندنی پاسەوانانی سنوور لە هەرێمی کوردستان بە تۆڕی میدیایی رووداوی گوت: "دوای داخستنی سیستم و لینکی تایبەت بە دامەزراندنی پاسەوانانی سنوور دەرکەوت 2 ملیۆن  و 182 هەزار کەس فۆرمیان پڕ کردووەتەوە، بەڵام تەنیا 2 هەزار و621 کەس دادەمەزرێندرێن."

 

لە سۆشیاڵمیدیاوە چەند دەنگۆیەک لەبارەی دامەزراندنی ئەو کەسانە بڵاوبووەتەوە، لەوانە دامەزراندن بە پارە، بەڵام عەقید کاروان خۆشناو سەرجەم دەنگۆکانی رەتکردەوە.

 

عەقید کاروان خۆشناو گوتی: "بەداخەوە هەندێک کەس پەیدابوون بانگەشەی ئەوە دەکەن دەتوانن ناوی ئەوانە لە بەغدا بهێننەوە کە داواکارییان بۆ دامەزراندن پێشکێش کردووە. یان هەندێک پەیج لە سۆشیاڵمیدیا هەواڵی سەیر بڵاودەکەنەوە، هەموو ئەوانە ناڕاستن و داواکارین کەس نەکەوێتە داوی ئەو فێڵبازانە. ئەگەر بەفەرمی پێشهاتی نوێ هەبێت رایدەگەیێنین."

 

سەبارەت بە راگەیاندنی ناوی دامەزراوانیش کە دەنگۆیەک هەیە مانگی داهاتوو بە کورتەنامە ئاگادار بکرێنەوە. عەقید کاروان خۆشناو گوتی:  "هێشتا هیچ رێکار یان پاڵاوتنێک بۆ ناوەکان و دامەزراندن و شێوازی گەڕانەوەی ناوەکان دیاری نەکراوە، هەر شتێکی نوێ هەبێت رایدەگەیێنین."

 

بەپێی رێککەوتنی هەرێمی کوردستان و حکومەتی ناوەندی ئەو 2621 کەسەی دادەمەزرێن، زۆربەیان لە هەرێمی کوردستان دەبن.

 

دوای ئەوەی وەزارەتی ناوخۆی عێراق دامەزراندنی پاسەوانانی سنووری لە هەرێمی کوردستان رایگەیاند، رۆژی دووشەممە 16-01-2023 لینکی پڕکردنەوەی فۆرمی دامەزراندن لە پاسەوانی سنوور کاراکرا و رۆژی 18-01-2023 کاژێر 12:00ی شەو راگیرا.

 

بەپێی زانیارییەکانی پاسەوانی سنوور زیاتر لە 12 ملیۆن کەس سەردانی لینکەکەیان کردبوو، لەو ژمارەیە دوو ملیۆن و 182 هەزار کەس خۆیان ناونووس کردبوو، کە بڕیارە دوو هەزار و 621 کەس لە هەموو عێراق دابمەزرێن. 

 

دامەزراندنی ئەو پاسەوانانە تایبەتە بۆ ناوچەی یەکی پاسەوانی سنوور کە پارێزگاکانی هەولێر، دهۆک و سلێمانی بە درێژایی نزیکەی هەزار و 30 کیلۆمەتر دەگرێتەوە.

 

مەرجەکانی دامەزراندنەکە بریتین لە: کەسەکە دەبێت تەمەنی لەنێوان 17 ساڵ بۆ 35 ساڵ بێت، لە دایک و باوکێکی عێراقی بێت، فۆرمەکە بە زمانی عەرەبی پڕبکاتەوە و تەنیا پێویستە بڕوانامەی سەرەتایی و دواناوەندیی هەبێت.