وێنەی کاتی دەرهێنانی تەرمەکان لە ئاودا
رووداو دیجیتاڵ
ئەمڕۆ لە قەزای خەبات لەنێو رووباری زێی گەورە، سێ هاونیشتمانی خنکان و ئەفسەرێکی بەرگریی شارستانیی قەزاکەش دەڵێت، منداڵێکی تەمەن شەش ساڵ کەوتووەتە رووبارەکەوە، باوک و ئامۆزاکەی بۆ رزگارکردنی چوونە و هەرسێکیان خنکاون.
رۆژی سێشەممە، 22ـی شوباتی 2023، رائید ئامانج محەممەد، ئەفسەری بنکەی بەرگریی شارستانیی قەزای خەبات لە بووڵتەنی کاژێر 17:00 بە فەرهاد دۆڵەمەڕی، پەیامنێری رووداوی راگەیاند، "کاژێر 14:00ـی دوانیوەڕۆی ئەمڕۆ تیمەکانمان ئاگادارکرانەوە کە رووداوی خنکان لەژێر پردی نوێی خەبات هەیە".
رائید ئامانج لەبارەی ناسنامەی خنکاوەکان و چۆنێتیی رووداوەکە گوتی، "منداڵێکی تەمەن شەش ساڵان بە ناوی بنیامین بەختیار کەوتووەتە نێو رووبارەکەوە و باوکی بە ناوی بەختیار کەریم کە تەمەنی 28 ساڵە و کچێک بە ناوی کەژاڵ هەژار کەریم کە برازای بەختیار بووە، بۆ رزگارکردنی منداڵەکە خۆیان هەڵداوەتە نێو ئاوەکەوە و هەرسێکیان خنکاون".
ئەو ئەفسەرەی بەرگریی شارستانی دەڵێت، "لە ماوەی کەمتر لە کاژێرێک توانیمان تەرمەکان لە رووبارەکە بهێنینە دەرەوە و ئێستا رەوانەی دادپزیشکی هەولێرمان کردوون" و تکاش لە هاونیشتمانییان دەکات "بە هیچ شێوەیەک لە زێی خەبات مەلەوانی نەکەن، لەبەرئەوەی بە درێژایی رووبارەکە مەلەکردن تێیدا مەترسیدارە و قەدەخەمان کردووە".
رائید ئامانج محەممەد گوتیشی، "ئەمساڵ لە سنووری قەزای خەبات نۆ هاووڵاتی لە ئاودا خنکاون، ئەوە لەکاتێکدایە لە هەموو پارێزگای هەولێر 13 کەس خنکاون".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ