مەسرور بارزانی: کشتوکاڵ و پیشەسازیی خۆراك هەزاران دەرفەتی كاریان رەخساندووە

 

 

مەسرور بارزانی، سەرۆکی حکومەتی هەرێمی کوردستان ئەمڕۆ شەممە 21ی ئەیلوول لەکاتی کردنەوەی کارگەکەدا گوتارێکی پێشکێش کرد و دووپاتی کردەوە، ئەم سایلۆیە لە چوارچێوەی بەرنامەی حكومەتە بۆ بەبازاڕكردنی بەرهەمی گەنمی جووتیارانی كوردستان، کە لەگەڵ كەرتی تایبەت بەپێی ستانداردی جیهانی دروست كراوە.

 

سەرۆکی حکومەتی هەرێمی کوردستان هیوای خواست ئەو کارگەیە بتوانێت خزمەتێكی باشتری جووتیارانی دەڤەرەكە بكات، هەوڵ بدەن هەرچی زووە پرۆژەكە فراوانتر بكەن و كارگەی پەیوەندیدار بۆ بەرهەمەكانی گەنم دابمەزرێنن.

 

مەسرور بارزانی باسی لەوەش كرد، "هەوڵمان داوە گرنگییەكی تایبەت بە كەرتی كشتوكاڵ و پیشەسازیی خواردن بدەین، بۆیە ساڵی رابردوو لە هەموو دەڤەرەكانی كوردستان چ وەكو حكومەت و چ بە هاوكاریی كەرتی تایبەت، چەندین سایلۆ و پرۆژەی چاندن و كشتوكاڵمان ئەنجام داوە."

 

ئەوەشی خستەڕوو، "ئێمە بە كردار دەستمان بە دۆزینەوەی بازاڕی ناوخۆیی و دەرەكی كردووە بۆ بەرهەمی جووتیارانی خۆشەویست و لەم رووەشەوە بەردەوام دەبین، ئەمڕۆ بەرهەمی جووتیارانمان دەگاتە بازاڕەكانی وڵاتانی عەرەبی و ئەورووپی، زۆر گرنگە جووتیارانیشمان ئاستی كوالێتیی بەرهەمەكانیان بە بەرزی رابگرن و چاندن و كشتوكاڵی خۆیان بە رێگەی زانستی و تەكنەلۆژیای سەردەم پێش بخەن."

 

سەرۆكی حكومەت جەختی لەوە كردەوە، "كشتوكاڵ یەكێكە لە تەوەرە سەرەكییەكانی بەرنامەی ئێمە بۆ هەمەجۆركردنی ئابووریی كوردستان و ئەمڕۆ پێشكەوتنی كەرتی چاندن و پیشەسازیی خۆراك بە هەزاران دەرفەتی كاری بۆ گەنجان دەستەبەر كردووە. ئامانجی ئێمەش ئەوەیە كە كۆمەڵگەی تەنیا بەكارهێنەر نەبێت و ببێتە كۆمەڵگەیەكی بەرهەمهێنەر، لەبەر ئەوە ئێمە بە هەموو جۆرێك لە پاڵپشتیی بەرهەمەكانی ناوخۆ بەردەوام دەبین بۆ ئەوەی ئەو كارگە و پرۆژانە بەردەوام بن و بتوانن ركابەری و ململانێ لەگەڵ بەرهەمەكانی دەرەوەش بكەین."