رووداو دیجیتاڵ
پارێزگاری هەڵەبجە دەڵێت: فرسەت سۆفی، لە دڵسۆزیی بۆ کارەکەی و لە ئەنجامی سەردان و بەسەرکردنەوەی شەقام و گوند و نەخۆشخانەکان تووشی کۆرۆنا بوو و بووە قوربانی.
ئازاد تۆفیق، پارێزگاری هەڵەبجە، لەکاتی بەشداریکردنی لە رووماڵکردنی رووداو لە رێوڕەسمی گەڕاندنەوەی تەرمی فرسەت سۆفی گوتی: "فرسەت سۆفی کەسێکی وریا و خاکی بوو، پێشتر پەیوەندی مەعریفی و رۆشنبیریمان هەبوو، چەند ساڵێک بەر لەئێستا دوو لیژنە هەبوو بۆ پێداچوونەوە بە رێککەوتننامەی نێوان پارتی و یەکێتی پێکهێنرا، ئێمە بڕیاردەری هەردوولا بووین، بەردەوام هەوڵی ئاشتەوایی و دیالۆگ و لێکنزیکبوونەوەی دەدا".
پارێزگاری هەڵەبجە، فرسەت سۆفی بە کەسێکی "دڵسۆز" وەسفدەکات و دەڵێت: "لەو ماوەشی کە پارێزگاربووین زۆر دڵسۆزی کورد و هەولێرییەکان بوو، کەسێکی دڵسۆز و دەم بە پێکەنین بوو".
ئازاد تۆفیق پێیوایە فرسەت سۆفی لە ئەنجامی دڵسۆزیی بۆ کارەکەی و لە ئەنجامی سەردان و بەسەرکردنەوەی شەقام و گوند و نەخۆشخانەکان تووشی کۆرۆنا بوو و بووە قوربانی، خەمخۆربوو لەسەر خۆپارێزی و رانەگرتنی ژیانی خەڵک.
پارێزگاری هەڵەبجە گوتیشی: "ئەگەر ئێمە لە کۆڕ و کۆبوونەوەکاندا ماسکمان بەستبا، فرسەت سۆفی هەر لە ئۆتۆمبێلەکەی دادەبەزی ماسکی دەبەست، زۆر پابەندبوو بە خۆپارێزی".
فرسەت سۆفی، پارێزگاری هەولێر، کە 19-10-2020 تووشی کۆرۆنا بوو، شەوی 18-11-2020 لە نەخۆشخانەی میمۆریاڵ لە ئەنقەرەی پایتەختی ئەنقەرە کۆچی دواییکرد، ئەمڕۆ پێنجشەممەش بە رێوڕەسمێکی شایستە لە فرۆکەخانەی نێودەوڵەتیی هەولێر پێشوازی لە تەرمەکەی کرا.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ