لە هەولێر مامۆستایەک زیاتر لە یەک ساڵ دەستدرێژیی سێکسی دەکاتە سەر قوتابییەکی 7 ساڵان

 

بەپێی زانیارییەکانی رووداو کە لە لایەنی پەیوەندیدار و دایک و باوکی قوتابییەکەوە دەستیکەوتووە، منداڵەکە تەمەنی 7 ساڵانە و لە دایکێکی مەغریبی و باوکێکی ئەڵمانییە. لە قوتابخانەیەکی تایبەت لە عەنکاوەی هەولێر خوێندوویەتی کە بە زمانی فەرەنسی وانەی تێدا دەخوێندرێت.

 

دایک و باوکی منداڵەکە بە رووداویان راگەیاند، ئەو مامۆستایە بە کچەکەیانی گوتووە ئەگەر لەلای هەر کەسێک قسە بکات، ئەوا "دەیکوژێت." تیمی رووداو منداڵەکەیان بینیوە و شوێنەواری مووس بە جەستەیەوە بووە. منداڵەکە گوتوویەتی، "بەو شێوەیە هەڕەشەی لێکردووم."

 

بەپێی زانیارییەکانی رووداو، مامۆستاکە هەر لەنێو بینای قوتابخانەکە دەستدرێژیی کردووەتە سەر منداڵەکە. 

 

رووداو زانیویەتی کە مامۆستاکە خەڵکی دیمەشقە و تەمەنی 35 ساڵانە. مامۆستای وانەی وەرزش بووە. هێشتا ناوی بە تەواوی ئاشکرا نەکراوە. 

 

دایکی ئەو قوتابییە بە رووداوی راگەیاند، سەرەتا لە دۆزینەوەی پارە و دیاریی نامۆ لە گیرفانی کچەکەیدا هەستی بە شتێک کردووە تاوەکو دواجار ئەنگوستیلەیەکی زێڕی لە گیرفانیدا دۆزیوەتەوە، ئەوکات قسەی لەگەڵ کچەکەیدا کردووە و نهێنییەکەی درکاندووە. 

باوکی ئەو کچە پیشەی ئەندازیارە و ماوەی ساڵێکە لە دەرەوەی هەرێمی کوردستان دەژی، هاوژین و کچەکەی لێرە بەتەنیا ژیاون. 
لە سەرەتاکانی مانگی شوباتی ئەمساڵ، دایکوباوکی منداڵەکە سکاڵایان تۆمارکردووە و مامۆستاکە دەستگیرکراوە. ئێستاش دۆسیەکە لە دادگەیە. تاوەکو ئێستا پۆلیس و قوتابخانەکە ئامادەنەبوون لەسەر ئەو دۆسیەیە هیچ لێدوانێک بدەن. 

 

بە گوتەی دایکوباوکی منداڵەکە، کچەکەیان پێی گوتوون، "بە لایەنی کەمەوە چوار منداڵی دیکەیشی بینیوە کە چوونە بۆلای مامۆستاکە،" بەڵام ئەو دۆسیەیانەی دیکە تاوەکو ئێستا لەلای دەزگا ئەمنییەکانی یەکلانەکراونەتەوە و کەسوکاری ئەو منداڵانە سکاڵایان تۆمار نەکردووە.

 

رووداو لەسەر ئەو دۆسیەیە بەدواداچوونی زیاتر دەکات و وردەکاریی زیاتر بڵاودەکاتەوە.