رووداو دیجیتاڵ
شاندی حکومەتی هەرێمی کوردستان لەگەڵ سەرۆکی پەرلەمانی عێراق کۆبوونەوە. مەسرور بارزانی بە حەلبووسی گوت، "خەڵکی هەرێمی کوردستان لە سەختیدا دەژین و نابێت خەڵکی ئێمە چیدیکە لە دڵەڕاوکێدا بن."
رۆژی پێنجشەممە 14-09-2023، مەسرور بارزانی، سەرۆکوەزیرانی هەرێمی کوردستان و شاندی حکومەت لەگەڵ محەممەد حەلبووسی، سەرۆکی پەرلەمانی عێراق کۆبوونەوە.
بەگوێرەی راگەیێندراوی حکومەتی هەرێمی کوردستان، سەرۆکوەزیران "بەوردی" باسی ژمارە و داتاکانی کرد، لەبارەی مافەکانی خەڵکی هەرێمی کوردستان.
کۆبوونەوەی سەرۆکوەزیرانی هەرێمی کوردستان و جێگرەکەی لە بەغدا لەگەڵ سەرۆکی پەرلەمانی عێراق pic.twitter.com/S83VC47qzX
— Rudaw (@Rudawkurdish) September 14, 2023
لە کۆبوونەوەکەدا مەسرور بارزانی رایگەیاند، "مووچەخۆران لە ناوچەکانی دیکەی عێراق، مووچەی تەواویان وەرگرتووە، لەکاتێکدا خەڵکی هەرێمی کوردستان لە سەختیدا دەژین."
شاندەکەی هەرێمی کوردستان مەسرور بارزانی سەرۆکایەتیی دەکات و قوباد تاڵەبانی، جێگری سەرۆکوەزیران، رێبەر ئەحمەد، وەزیری ناوخۆ، ئاوات شێخ جەناب، وەزیری دارایی، ئومێد سەباح، سەرۆکی دیوانی سەرۆکایەتیی ئەنجوومەنی وەزیران، ئامانج رەحیم، سکرتێری ئەنجوومەنی وەزیران و پێشەوا هەورامانی، گوتەبێژی حکومەتی هەرێمی کوردستان ئەندامانی شاندەکەن.
سەرۆکوەزیرانی هەرێمی کوردستان بە سەرۆکی پەرلەمانی عێراقی گوتووە، "پاڵپشتی ئێوە پێویستە بۆ چارەسەری کێشەکان کە چارەسەرێکی ریشەیی دەوێت و نابێت خەڵکی ئێمە چیدیکە لە دڵەڕاوکێدا بن."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ