رووداو دیجیتاڵ
وەزارەتی بەرگریی تورکیا گیانلەدەستدانی 17 گەریلای پارتی کرێکارانی کوردستان (پەکەکە)ی لە هەرێمی کوردستان راگەیاند. بەگوێرەی ئاماری هەپەگەش، مانگی رابردوو 56 سەربازی تورکیا لە هەرێمی کوردستان کوژراون و 46ی دیکەش بریندار بوون.
بەگوێرەی راگەیێندراوەکەی وەزارەتی بەرگریی تورکیا، لەو ناوچەیەی تورکیا بە 'ناوچەی ئۆپەراسیۆنی چنگ-قوفڵ' ناوی دەبات، هێرشێکی ئاسمانییان کردووە و لە ئەنجامدا 17 گەریلا گیانیان لەدەستداوە.
لە راگەیێندراوەکەدا ئاماژە بەوە کراوە، ئۆپەراسیۆنەکانی سوپای تورکیا بۆسەر پێگەکانی پەکەکە لە هەرێمی کوردستان بەردەوام دەبن.
رۆژی 4ـی ئابیش ناوەندی چاپەمەنی و راگەیاندنی هێزەکانی پاراستنی گەل (هەپەگە)، باڵی سەربازیی پارتی کرێکارانی کوردستان (پەکەکە)، ئاماری شەڕ و پێکدادانی مانگی رابردووی ئەم ساڵی گەریلاکانی لەگەڵ هێزەکانی سوپای تورکیا لە هەرێمی کوردستان بڵاوکردەوە.
هەپەگە رایگەیاند، لەو مانگەدا 205 جار هێرشیان کردووە و لە ئەنجامدا 56 سەرباز کوژراون و 46 سەربازی دیکەش بریندار بوون؛ 11 گەریلاش گیانیان لەدەستداوە.
هەپەگە لەبارەی هێرشەکانی سوپای تورکیا لەو مانگەدا رایگەیاند، 520 جار بۆردوومان و تۆپبارانیان کردووە کە 345 جار بە فڕۆکەی جەنگی و درۆن و 52 جاریش بە هێلیکۆپتەر بوون.
ئەم شەڕ و پێکدادانە لە چوارچێوەی ئۆپەراسیۆنێکدایە تورکیا ناوی ناوە چنگ-قوفڵ کە لە بەرەبەیانی رۆژی 18ـی نیسانی 2022 لە ناوچەکانی ئاڤاشین، مەتین و زاپ لە پارێزگای دهۆک لە خاکی هەرێمی کوردستان بۆ سەر پێگەکانی پەکەکە دەستیپێکرد.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ