وێنەی یەکێک لەو تۆمەتبارانەی دەستگیرکراوە
رووداو - هەولێر
دەزگای ئاسایشی نیشتمانیی عێراق رایگەیاند، تۆڕێکی بازرگانی ماددەی هۆشبەریان لە بەغدا دەستگیر کرد کە بازرگانی بە 36 کیلۆگرام ماددەی هۆشبەرەوە کردووە.
دەزگای ئاسایشی نیشتمانیی عێراق، ئەمڕۆ سێشەممە 4-10-2022 ، لە هەژماری فەرمیی خۆی لە تویتەر رایگەیاند: "تۆڕێکمان لە بەغدا دەستگیر کرد کە ئەندامانی بازرگانییان بە 36 کیلۆگرام هۆشبەری کریستاڵ و حەشیشەوە کردووە."
دەزگاکە ئاشکراشی کرد: "لەگەڵ دەستگیرکردنی ئەندامانی تۆڕەکە دەستمان بەسەر بڕێک ماددەی هۆشبەر و ژمارەیەک چەکدا گرت."
لە گرتە ڤیدیۆی پرۆسەی دەستگیرکردنی ئەندامانی تۆڕەکە دەردەکەوێت تۆڕەکە لە پێنج کەس پێکهاتوون.
لە ڤیدیۆکەدا یەکێک لە تۆمەتبارەکان دەڵێت: "بازرگانێک لە عیمارە [شاری عیمارە ناوەندی پارێزگای میسانە] هۆشبەری کریستاڵ و حەشیشەی بۆم دابین دەکرد".
دواتر چوار تۆمەتبارەکەی دیکە لە ڤیدیۆکەدا دان بەوەدا دەنێن کە ماددەی هۆشبەر دەکێشن و بازرگانیشی پێوە دەکەن.
بەڕێوەبەرایەتی گشتیی نەهێشتنی هۆشبەر لە عێراق لە کۆتایی مانگی رابردوودا رایگەیاند: لە ساڵی 2022دا زیاتر لە 11 هەزار تۆمەتبار بە بەکارهێنان و بازرگانی بە ماددەی هۆشبەریان لە عێراق دەستگیر کرد.
بەڕێوەبەرایەتییەکە ئاشکراشی کرد، هەر لە ساڵی 2022دا دەستیان بەسەر نزیکەی 300 کیلۆگرام ماددەی هۆشبەر و 14 ملیۆن حەبی کاپتاگۆندا گرت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ