ئاسایش: دەستگیرکردنی ئارام سایەخان و شەرمین عەلی پەیوەندی بە ئازادیی رادەربڕینەوە نییە

 

هەفتەی رابردوو ئەو دوو بەرپرسە دوای گەڕانەوەیان لە دەوامی فەرمی، لە قەزای کەلار لەلایەن هێزێکی تایبەتی ئاسایشی سلێمانییەوە دەستگیر کران. ئاسایش ئەمڕۆ چوارشەممە، 3-5-2023 رایگەیاند، ئەو دوو کەسە "بە فەرمانی دادوەری لێکۆڵینەوە بە ماددەی (431)ـی خراپ بەکارهێنانی دەسەڵات لە یاسای سزادانی عێراقی راگیراون، چونکە فەرمانبەری حکومەتن و هۆکاری دەستگیرکردنەکەیان روونە."

 

لەبارەی ماددەکەوە، پارێزەر شاڵاو ئەبوبەکر بە تۆڕی میدیایی رووداوی راگەیاند، ماددەکە پەیوەندەی بە فەرمانبەرێکەوە هەیە کە لەکاتی ئەرکەکەیدا "هەڵەیەکی گەورە" بکات و زیان بە بەرژەوەندیی ئەو شوێنە بگەیێنێت کە کاری تێدا دەکات؛ گوتیشی: "ئەگەر تۆمەتەکە بەسەر تۆمەتباردا ساخبێتەوە، زیندانی دەکرێت لە ماوەیەک کە لە 24 کاژێر کەمتر و لە 5 ساڵ زیاتر نەبێت."

 

ئاسایش لە راگەیێندراوەکەیدا دەڵێت: لە ماوەی رابردوودا ئەو دوو کەسە "خۆیان و پەڕاویان خراونەتە بەردەم دادوەری لێکۆڵینەوەی ئاسایش و بەڕێزیان بینیونی و گوتەیانی وەرگرتووە و هەموو رێکارێکی یاساییان بۆ گیراوەتەبەر، دەزگای ئاسایش تەنیا لایەنی جێبەجێکاری یاسایە." 

رێکخراوی خاچی سووری نێودەوڵەتی بۆ ئاگاداربوون لە دۆخی راگیراوان سەردانی گرتووخانەی ئاسایشیان کردووە و چاویان بە راگیراوان کەوتووە، ئاسایش دەڵێت: ئارام حەسەن و شەرمین عەلی یان بینیوە و "لە چەند رۆژی رابردووشدا کەسە نزیکەکانیان سەردانیان کردوون و چاوپێکەوتنیان هەبووە." 

 

ئارام سایەخان، بەرپرسی پێشووی راگەیاندن و پەیوەندییەکان و هاوژینەکەی شەرمین عەلی، بەرپرسی پێشووی راگەیاندن و گوتەبێژی دەروازەی نێودەوڵەتیی پەروێزخانن. ئارام سایەخان وەکو چالاکڤانێک و هاوژینەکەشی وەکو رۆژنامەڤان لە گەرمیان کاریان کردووە؛ بۆیە دەستگیرکردنەکەیان کاردانەوەی لە تۆڕە کۆمەڵایەتییەکان دروستکرد.