رووداو دیجیتاڵ
گوتەبێژی گشتیی گەشتوگوزاری سلێمانی رایگەیاند، لە سێیەم رۆژی جەژنی رەمەزاندا گەشتیاران بە لێشاو روویان لە شاری سلێمانی كردووە و 70% هۆتێل و مۆتێلەكان پڕبوون لە گەشتیار.
گۆران قادر، گوتەبێژی بەڕێوەبەرایەتیی گشتیی گەشتوگوزاری سلێمانی لە كاتی بەشداریی پۆدكاستی بەكاتی سلێمانی رادیۆی رووداو، رایگەیاند: "لە ئەمڕۆ سێشەممەوە هاتنی گەشتیار بەبۆنەی جەژنی رەمەزانەوە بە لێشاو بۆ شاری سلێمانی دەستپێكردووە و لە بازگەكاندا بە باشی پێشوازییان لێدەكرێ".
لەبارەی شوێنی مانەوەی گەشتیاران گۆران قادر گوتی: "سەرجەم هۆتێل و مۆتێلەكان ئامادەكاریان بۆ هاتنی گەشتیار كردووە. ئەوەی تائێستا بە ئێمە گەیشتووە 70% هۆتێل و مۆتێلەكان پڕبوون لە گەشتیار و شوێنیان نەماوە".
لەبارەی ژمارەی ئەو گەشتیارانەی تاوەکو ئێستا هاتوونەتە سلێمانی، گوتەبێژی بەڕێوەبەرایەتیی گشتیی گەشتوگوزاری سلێمانی گوتی، لە داهاتوودا دەستەی گەشتوگوزار سەرجەم ئاماری گەشتیاران رادەگەیێنێت، بەڵام گوتیشی، "ئەوەندەی بە ئێمە گەیشتووە زیاد لە 100 گرووپی گەشتیاری لەم چەند رۆژەدا سەردانی شاری سلێمانییان كردووە."
گۆران قادر، جەختی لەوە كردوە بەهیچ جۆرێك ناهێڵن هۆتێل و مۆتێلەكان لەم كاتەنەدا یاری بە نرخەكانەوە بكەن دەبێت پابەندی ئەو نرخەبن كە پێشتر هەڵیانواسیوە.
بە گوتەی گۆران قادر، لە شاری سلێمانی شوێنی مانەوەی یەك كەس لە 5 هەزار دینارەوە دەستپێدەکات تاوەكو نزیكەی 100دۆلار. گوتیشی، گەشتیار بە ئارەزووی خۆی دەتوانێ بەپێی توانای گیرفانی شوێنی مانەوەی هەڵبژێرێ، ئەوەی بۆ ئەوانە گرنگە ئەوەیە لەم كاتانەدا یاری بە نرخەكانەوە نەكرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ