رووداو دیجیتاڵ
راوێژکاری سەرۆکوەزیرانی عێراق بۆ کاروباری گواستنەوە و گەیاندن دەڵێت، تێچووی ژێرخانی پڕۆژەی رێگەی گەشەپێدان 18 ملیار دۆلارە و خاڵی پەڕینەوەی رێگەکەش لە عێراقەوە بۆ تورکیا لە پارێزگای دهۆک دەبێت.
ناسر ئەسەدی، راوێژکاری سەرۆکوەزیرانی عێراق بۆ کاروباری گواستنەوە و گەیاندن لە بەرنامەی رووداوی ئەمڕۆدا گوتی، "توێژینەوەکان رێچکەی رێگەی گەشەپێدانیان دەستنیشان کردووە. رێچکەکەش سیاسی نییە، بەڵکو رێچکەیەکی هونەریی تەواوە بۆ پرۆژەیەکی زیندوو کە گەورەترین پرۆژەی عێراقە و یەکێکە لە گەورەترین پرۆژەکان لە جیهان و لە هەموو رێگە ستراتیژی و بازرگانییەکانی ناوچەکە کورتترە و تێچوویشی لەسەر بازرگانان کەمترە. هەر وڵاتێکیش بیەوێت وەکو دەوڵەت یان کەرتی تایبەت دەتوانێت وەبەرهێنانی تێدا بکات."
بە گوتەی ئەسەدی، رێگەی گەشەپێدان کە لە بەندەری فاو دەستپێدەکات و هێڵی ئاسنینە بۆ گواستنەوەی کاڵا لە بەندەرەکەوە راستەوخۆ بۆ تورکیا و لەوێشەوە بۆ وڵاتانی ئەورووپا، بەهۆی جوگرافیای ناوچەکە و قەرەباڵخییەوە نەتوانراوە خاڵی سنووریی ئیبراهیم خەلیل بۆ پەڕینەوەی بەرەو تورکیا دەستنیشان بکرێت، "ئەگەر بە ئیبراهیم خەلیلدا تێبپەڕیایە، خنکانی هاتووچۆ دروست دەبوو، بەهۆی کەمیی رووبەر و جوگرافیا و قەرەباڵخیی ناوچەکەوە، بەڵام هەر لە پارێزگای دهۆکەوە رێگەکە دەپەڕێتەوە نێو تورکیا، هیچ مەبەستێکی سیاسیی لەپشت گۆڕینی ئاراستەکەی نییە."
دەقی هەڤپەیڤینی رووداو لەگەڵ ناسر ئەسەدی، راوێژکاری سەرۆکوەزیرانی عێراق بۆ کاروباری گواستنەوە و گەیاندن:
رووداو: رێگەی گەشەپێدان جگە لەوەی رێککەوتنی لەبارەوە کراوە و پلانی بۆ دانراوە لەسەر کاخەز، لەسەر زەوی ئێستا چی دەگوزەرێت لەبارەی ئەو پرۆژەیەوە؟
ناسر ئەسەدی: ئێستا پرۆژەی رێگەی گەشەپێدان چەند قۆناخێک پێشکەوتووە بە شێوەی بەش بەش، چەند پرۆژەیەک لە فاو و بەشێکیش لە خودی پرۆژەکە. ئێستا پرۆژەکان لە فاو گەیشتوونەتە قۆناخی زۆر پێشکەوتوو بە رێژەی 90%، ئەوەی پەیوەندیی بە کۆڕنیشەکانی بەندەرەکەوە هەیە تەواو بووە، دواتر رێڕەوی بەستنەوەی بەندەری فاو بە بەندەری ئوم قەسر و تونێلی مەئمور، هاوکات رێڕەوی مەئمور لەژێر دەریا کاری لەسەر کراوە و ئێستا لە قۆناخی پشکنینی کۆتایین بۆ بەکارخستنی، هاوکات پردەکانی پێکەوەبەستن و چوارچێوەی دەریایی پرۆسەی هەڵکەندنیان گەیشتووەتە قۆناخی زۆر پێشکەوتوو، هاوکات پرۆژەی کۆتایی کە پرۆژەی گۆڕەپانی کۆنتێنەرەکانە گەیشتووینەتە قۆناخی سەروو 70%، کە تەواو دەکرێت و ئامادە دەبێت بۆ بەکارهێنان. ئەوەی پەیوەندیی بە هێڵی ئاسنینی پرۆژەکەشەوە هەیە، هێڵی ئاسنین ئێستا لە قۆناخی کۆتایی نەخشەکێشاندایە، نەخشەی سەرەتایی تەواو کراوە، ئێستا لە قۆناخی نەخشەکێشانی وردەکارییەکانین و تیمێک پێکهێندراوە بۆ هەڵسەنگاندنی ئەو کۆمپانیایانەی داوای جێبەجێکردنی پرۆژەکەیان کردووە، تاوەکو بزانرێت کامیان گونجاوترین و شیاوترینە بۆ جێبەجێکردنی ئەو پرۆژەیە، هاوکات ژمارەیەک لیژنەی لاوەکی پێکهێندراون لەلایەن لیژنەی باڵای رێگەی گەشەپێدان بە چاودێریی سەرۆکوەزیران و هەریەک لەو لیژنانەی لە بواری خۆیان کار دەکەن، لە بواری سیاسی، ئابووری، دیبلۆماسی، ئاسایش، تەندروستی و هەموو بوارەکان، هەریەکێک لەم لیژنانە پلانی ستراتیژی دادەنێن لە چوارچێوەی رێگەی گەشەپێدان و پەرەپێدانی تواناکان لە رێگەی ئەم پرۆژەیەوە، هاوکات رێڕەوێکی تایبەت هەیە بۆ خزمەتگوزاری کە پێکدێت لە کارەبا، گاز، نەوت و ئینتەرنێت، هەموو ئەم پرۆژانە گەیشتوونەتە قۆناخی کۆتایی و ئامادەکردنیان بۆ قۆناخی تەندەر و پێدانیان بە کۆمپانیاکان بۆ جێبەجێکردن.
رووداو: کەواتە لەڕووی پراکتیکییەوە کار دەکەن لە بەندەری فاو و ئەوەی پەیوەندیی بە هێڵی ئاسنینەوە هەیە، هەروەها رێگە و خزمەتگوزاری و باس لە قۆناخی تەندەر دەکەن، لەبارەی کۆمپانیاکان ئایا کۆمپانیای نێوخۆیی دەبن، یان جیهانی و هەرێمی کە کار دەکەن یان تەندەر پێشکێش دەکەن؟
ناسر ئەسەدی: ئەم پرۆژەیە خۆی بە کۆمپانیا جیهانییەکان دەکرێت، بەڵام بەبێ بوونی کۆمپانیای نێوخۆیی کۆمپانیا جیهانییەکان ناتوانن کارەکانیان ئەنجام بدەن، بەهۆی نەبوونی ئەزموونیان لە بازاڕی نێوخۆیی و دەستی کار و پێداویستیی لۆجیستی، پێویستە یارمەتیی ئەم کۆمپانیایانە بدرێت بۆ ئەنجامدانی کارەکانیان، ئێمە چاومان لە کۆمپانیا جیهانییە گەورەکانە کە تۆڕێک پێکبهێنن لەگەڵ کۆمپانیا نێوخۆییەکانمان بە ئامانجی دەستکردن بەم پرۆژەیە، بۆچی کۆمپانیا جیهانییەکان؟ بەهۆی ئەزموونی زۆریان لەم بوارانە و تەکنەلۆژیای بەردەستیان بۆ بەکارهێنان لە ئەنجامدانی پرۆژەکانمان لە چوارچێوەی پرۆژەی رێگەی گەشەپێدان.
رووداو: نەخشەی کۆتایی رێگەکە چۆنە؟ رێگەی وشکانی و هێڵی ئاسن لە نێوخۆی عێراق، وەکو دەزانین چەند گفتوگۆیەک هەبوون لەنێوان هەرێمی کوردستان و بەغدا لەبارەی رێگەی پەڕینەوە بەرەو تورکیا، لە هەرێمی کوردستانەوە بێت یان نا، ئەمە بە کوێ گەیشتووە؟
ناسر ئەسەدی: لێکتێگەیشتنێکی گەورە هەیە لەنێوان برایان لە حکومەتی هەرێمی کوردستان و حکومەتی فیدراڵی لە بەغدا لەبارەی ئاراستەی رێگەکە، تۆ مەبەستت ئەوەیە ناکۆکی هەبوو لەبارەی ئاراستەی رێگەکە ئایا لە رۆژهەڵاتی رووباری دیجلە بێت یان لە رۆژئاوای رووبارەکە، بۆچوونی بنەڕەتیی پرۆژەکە وایە کە رابکێشرێتە دەرەوەی شارەکان، پلانەکە وابوو کە لە شارەکان دووربخرێتەوە بە ئامانجی بونیادنانی شاری نوێ و رەخساندنی دەرفەتی نوێ، شارەکانی ئێستا توانای لەخۆگرتنی رێگەکەیان نییە و تەنانەت لە شارەکانی باشووری عێراق لە هەندێک ناوچە 40 کیلۆمەتر و لە هەندێک ناوچە 20 کیلۆمەتر لە شارەکان دوورمان خستووەتەوە، بەپێی توانای بەردەست بۆ دوورخستنەوەی لە شارەکە، بۆچی بە هەندێک شاردا تێدەپەڕێت؟ چونکە لەو شارانە سەرچاوەی زۆر هەن و رەنگە سوودیان لێوەربگیرێت لەڕووی پیشەسازییەوە و ئەو ناوچانەی کە دەتوانن پیشەسازی بەکاربهێنن و کارگەکانی ئێستایان بەگەڕبخەن. ئەوەی ئێستا لە راگەیاندنەکانەوە باسدەکرێت پێویست نییە بەڕاستی، کە بۆچی لەناو هەرێمی کوردستانە و بۆچی لە دەرەوەی هەرێمی کوردستانە، لە بنەمادا توێژینەوەکان رێچکەکەیان دەستنیشان کردووە، رێچکەکەش رێچکەیەکی سیاسی نییە بەڵکو رێچکەیەکی هونەریی تەواوە لەبارەی پرۆژەیەکی زیندوو، کە گەورەترین پرۆژەی دەوڵەتی عێراقە و یەکێکە لە گەورەترین پرۆژەکان لە جیهاندا، رۆژئاوای رووبارەکە زەوییەکانی بەرینترە، رۆژهەڵاتی رووبارەکە جوگرافیای جیاوازە، ئەمە کاریگەریی هەبوو لەسەر نەخشەی پرۆژەکە بۆ خێرایی هەڵسەنگێندراوی شەمەندەفەرەکان، لە هەمان کاتدا ئەو جوگرافیایە پێویستی بە بونیادنانی پردی نوێ و تونێلی نوێیە، بابەتەکە هونەری و تەکنیکییە 100%، پسپۆڕەکان زیاتر لە جارێک توێژینەوەیان لەبارەوە کردووە، هاوکات ئێستا چەند پسپۆڕێکمان راسپاردووە تاوەکو هەڵسەنگاندن بکەن، ئەگەر رێگەکە بە رۆژهەڵاتی دیجلەدا بڕوات بەرەو شاری موسڵ، ئەگەر ئەنجامی باشتر بێت ئێمە پێشوازیی لێدەکەین، بەڵام ئێستا توێژینەوەکان گەیشتوونەتە ئەو ئەنجامەی رۆژئاوای رووباری دیجلە زۆر باشترە و ناوچەیەکی بەرفراوانترە، لەگەڵ ئەوەشدا بە هەرێمی کوردستاندا تێدەپەڕێت بە پارێزگای دهۆک، لە کۆبوونەوەکانمان برایانمان لە هەرێمی کوردستان ئامادەییان هەبوو، وەزیری گواستنەوە کاک ئانۆ جەوهەر، پارێزگاری دهۆک عەلی تەتەر و ئەوانی دیکە کە بانگهێشت کرابوون بۆ کۆبوونەوەکان تاوەکو گفتوگۆ بکەین لەبارەی هێڵی شەمەندەفەر، لە هەموو بارەکاندا شەمەندەفەرەکە بە پارێزگای دهۆکدا تێدەپەڕێت و خاڵی پەڕینەوەشی لە عێراقەوە بۆ تورکیا لە دەرەوەی خاڵی سنووریی ئیبراهیم خەلیل دەستنیشان کراوە بەهۆی قەرەباڵخیی ئەو ناوچەیە و کەمیی رووبەرەکەی، رێگەکە پێویستی بە تێپەڕینی زۆرتر و خێراتری کۆنتێنەر و ئۆتۆمبێلەکان هەیە، ئەو بارهەڵگرانەی لە رێگەکە کار دەکەن دەبنە هۆی خنکانی هاتووچۆ لە ناوچەی ئیبراهیم خەلیل، هەربۆیە ناچاربووین رووبکەینە ناوچەیەکی دیکە کە بە هەمان شێوە لە هەرێمی کوردستاندایە لە پارێزگای دهۆک، تاوەکو ببێتە خاڵی بنەڕەتیی پەڕینەوەی رێگەی گەشەپێدان، بنەماکانی ترانزێت و گومرگ و هاتن و چوونی تێدا پیادەبکرێت، رێکارە نوێیەکانی هاتن و چوون لەڕووی پاسپۆرت و ڤیزا و پێداویستییەکانی دیکە، ئەم ناوچە نوێیە گونجاوتر بوو لە خاڵی سنووریی ئێستا کە لە بنەمادا ناوچەیەکی قەرەباڵخە و پێویستی بە بەرفراوانکردنە.
رووداو: کەواتە پەڕینەوەکە لە نێوخۆی هەرێمی کوردستانە لە کۆتایدا؟
ناسر ئەسەدی: بەڵێ، بە دڵنیاییەوە.
رووداو: لەبارەی ئەم رێگەیەوە، هیچ بۆچوونێک هەیە لەبارەی تیچووی گشتیی پرۆژەکە لەسەر دەوڵەتی عێراق؟
ناسر ئەسەدی: ئێمە ئێستا گفتوگۆ دەکەین لەبارەی تێچووی ژێرخانەوە نەک وەبەرهێنان، بۆ بونیادنانی ژێرخانەکەی باس لە 17 ملیار و 18 ملیار دۆلار دەکرێت، زیاتریش دەبێت بەپێی دەرهاویشتەکانی پرۆژەکە، ژێرخانەکەی موڵکی حکومەتی عێراق دەبێت، هاوکات وەبەرهێنانەکەی دابەش دەبێت بەسەر وەبەرهێنەرانی بیانی و وڵاتانی دیکە ئەگەر خوازیاربوون بەشداری بکەن، وەکو وڵات یان وەکو کۆمپانیا و کەرتی تایبەت، دەرفەت بۆ هەمووان رەخساوە تاوەکو داوا پێشکێش بکەن بۆ وەبەرهێنان لەم پرۆژەیە.
رووداو: ماوەی تەواوکردنی پرۆژەکە دیارە؟
ناسر ئەسەدی: ئێمە بۆ تەواوکردنی ژێرخانەکەی هێڵی ئاسن و رێگە و جومگەکانی دیکەی پرۆژەکە 4 ساڵمان داناوە، پشتیوان بە خودا لە کۆتایی ساڵی 2028 تەواو دەکرێت و رێگەکە ئامادە دەبێت.
رووداو: ئەم رێگەیە چۆن کاریگەریی دەبێت کاتێک تەواو دەبێت، رێگەی گەشەپێدان بە هەردوو بەشەکەیەوە هێڵی ئاسنین و رێگەی ئاسایی لەسەر بازرگانیی ئاسایی ئێستا لە خاڵە سنوورییەکان؟
ناسر ئەسەدی: ببینە بیرۆکەی ئەم پرۆژەیە دوو بیرۆکەیە لەڕاستیدا، 60% بۆ بەکارهێنان لە نێوخۆی عێراق و 40% بۆ پەڕینەوە (ترانزێت)، چونکە پێداویستییەکی گەورەی نێوخۆیی هەیە بۆ پرۆژەیەکی لەم شێوەیە بۆ خزمەتی پرۆژەکانی پیشەسازی و وەبەرهێنان، کە لە وڵاتەکەدا هەن، هاوکات ئەو شارە ئابوورییانەی لەسەر ئەم رێگەیە بونیاد دەنرێن، تەنیا بەندەری فاو نییە، کە یەکێکە لە گەورەترین شارە ئابوورییە وەبەرهێنانە ئازادەکان لەسەر ئاستی جیهان، هێڵی شەمەندەفەر لە هەموو شارەکان وێستگەی دەبێت، شاری ئابووریی بچووک بونیاد دەنێت، هەموو ئەم جومگانە پرۆژەکە پێکدەهێنن، پرۆژەیەکی گواستنەوە نییە بە تەنیا، بەڵکو پرۆژەیەکی پەرەپێدانی ژێرخانی ئابووریی تەواوە و هەموو پارێزگاکان سوودی لێ وەردەگرن.
رووداو: جۆرە مەترسییەک هەیە کە ئەم پرۆژەیە کۆتایی دەهێنێت یان کاریگەریی دەبێت بە جۆرێک لە جۆرەکان لەسەر ئەو بازرگانییەی ئێستا لە خاڵی سنووریی ئیبراهیم خەلیل هەیە، ئەمە تاوەکو چەند دروستە؟
ناسر ئەسەدی: پێموانییە ئەم قسەیە راست بێت، چونکە ئەگەر کۆتایی بە ئیبراهیم خەلیل بهێنێت، واتا کۆتایی بە بەسرە و دیالە و سلێمانی دەهێنێت، ببینە ئەمانە هەمووی پرۆژەن کە خزمەتی ژێرخانی ئابووریی وڵات دەکەن، رێگەی گەشەپێدان دەبێتە شادەماری هەموو خاڵە سنوورییەکانی دیکە، هەموو خاڵە بازرگانییەکان دەبنەوە بە لقی ئەم رووبارە گەورەیە، هەربۆیە هەمووان سوودمەند دەبن لە پرۆژەی گەشەپێدان، زۆرێک دەڵێن بۆچی لە هەولێرەوە تێناپەڕێت یان لە سلێمانییەوە؟ یان دەگوترێت بۆچی بە پارێزگای میساندا تێناپەڕێت یان پارێزگای دیالە یان واست و پارێزگاکانی دیکە؟ تەنانەت هێڵی شەمەندەفەر بە بەغداشدا تێناپەڕێت، بەڵام ئەو هێڵە ئاسنینەی ئێستا هەیە پەرەی پێدەدرێت تاوەکو ببێتە لقێک لە رێگەی گەشەپێدان، واتا ئەو پارێزگایانەی لەسەر ئاراستەی رێگەکە نین، دەبنە پاڵپشت و هێز بۆ رێگەکە.
رووداو: لەڕووی ستراتیژییەوە لەم ساڵانەی دواییدا زۆر دەبیستین کە ناکۆکیی جیدی هەیە لەنێوان وڵاتان، بەتایبەت لەم ناوچەیە و پەیوەندییان بە رێڕەوی بازرگانیی نوێوە هەیە، بۆ نموونە رێککەوتنی هیندی بۆ گواستنەوەی کاڵا لە هیندستانەوە بۆ کەنداو لە رێگەی تێپەڕین بە ئیسرائیلدا بەرەو یۆنان و وڵاتانی ئەورووپا، کە ئەمە هاوکێشەیەکی گەورەیە، هاوکات ناکۆکی هەیە لەنێوان تورکیا و وڵاتانی دراوسێی تورکیا لەبارەی رێگەی نوێ، ئەم رێگایانە تەنیا رێگەی بازرگانی نین، بەڵکو پەیوەندییان بە پێگەی سیاسی و ستراتیژیی زۆرێک لە وڵاتان هەیە، رێگەی گەشەپێدان بە هەمان شێوە، ئایا هیچ جۆرە ئاستەنگێکی سیاسی یان گوشاری سیاسی هەیە لەو لایەنانەی زیانمەند دەبن بە جۆرێک لە جۆرەکان لەم رێگەیە؟
ناسر ئەسەدی: ببینە ئەم پرۆژانە پرۆژەی بازاڕی ئازادن، هەمووان مافیان هەیە پرۆژەیەکی هاوشێوەی ئەم پرۆژەیەیان هەبێت لە وڵاتەکانیان، ئێستا زیاتر لە 4 – 5 رێگە هەن لە ناوچەکە، هەیە دەپرسێت ئایا ئەم پرۆژەیە کاریگەریی دەبێت لەسەر نۆکەندی سوێس؟ یان بۆ نموونە زۆرێک دەپرسن، ئایا ئەم پرۆژەیە کاریگەریی دەبێت لەسەر باکووری ئێران و رووسیا و هیندستان؟ هاوکات (جی 20) کە پرۆژەیەکی پێشنیاز کردووە وەکو بەڕێزت ئاماژەت پێدا، ئەم پرۆژانە هەمووی پرۆژەی ژێرخانن و خزمەتی ئابووری دەکەن، بە پێچەوانەوە زۆربوونی ئەم پرۆژانە لە ناوچەکە دەبێتە هۆی ئابوورییەکی بەردەوام لە ناوچەکە، دەبینین کە جیهان روودەکاتە ئەم ناوچەیە بەهۆی بوونی کەشی وەبەرهێنان و ئابووری و پیشەسازی و کشتوکاڵ ناوچەکە پێشدەکەوێت، بەڵام هەرکەسێک شوێنپەنجەی هەبێت تێیدا، ئەو کەسە بە دروستی بیردەکاتەوە، بازرگان چی دەوێت؟ گەیشتنی کاڵاکەی بە زووترین کات و کەمترین تێچوو، ئێمە خێراترین و کەمترین تیچووین، ئێمە رێگە کورتەکەین، پرۆژەکانی دیکە بە 4 – 5 وڵاتدا تێدەپەڕن، بەڵام پرۆژەکەی ئێمە تەنیا بە دوو وڵاتدا تێدەپەڕێت، عێراق و تورکیا، هەربۆیە ئێمە کورتترین رێگەین بەراورد بە پرۆژەکانی باکوور و باشوور، ئێمە چارەکێکی ئەو رێگەیە یان نیوەی ئەو رێگەیەمان هەیە، بەراورد بە پرۆژەکەی جی 20، ئێمە بە هەمان شێوە نیوەی ئەو رێگەیەمان هەیە، هاوکات ئەو چالاکییەی کە تەنیا پرۆژەکەی ئێمە دەتوانێت بیکات گواستنەوەیە لە دەریاوە بۆ وشکانی بە یەکجار، لە کاتێکدا ئەوان کاڵایەک دێنن لە هیندستانەوە بۆ دەریا، لە دەریاوە بۆ عەمان، لە عەمانەوە بۆ مینای حەیفا، جارێکی دیکە بۆ دەریا و لە دەریاوە بۆ ئەورووپا، ئەم پرۆسەیە تێچووی زۆرە، دڵنیایی و پێداویستیی لۆجیستی هەیە، پرۆسەیەکە تێچووی هەیە، پرۆسەی گواستنەوەی کۆنتێنەر لە ناوچەیەکەوە بۆ ناوچەیەک و زیانی بەردەکەوێت، ئێمە رێگەکەمان کورت کردووەتەوە، لە دەریاوە دێتە بەندەری فاو و دێتە وشکانی و راستەوخۆ دەڕوات بەرەو ئەورووپا، وەکو توێژینەوە ئابوورییەکان پرۆژەکەمان باشترینە، نزیکترینە و کەمترین تێچووی هەیە.
رووداو: ئەوەی پەیوەندیی بە گەیشتن یان گەیاندنی شارەکانی دیکە یان ئەو ناوچە پیشەسازییانەی دیکە هەیە بۆ ئەم رێگەیە، پێموایە پێویستە پرۆژەی لاوەکی هەبێت، ئەو پرۆژانە چین بۆ گەیاندنی رێگەکە بە شارەکانی دیکە؟
ناسر ئەسەدی: ببینە، ئێمە تۆڕی رێگەوبانی نێوخۆییمان هەیە و هێڵی ئاسنی نێوخۆییشمان هەیە، ئێستا بۆئەوەی پرۆژەکانی رێگەی گەشەپێدان بە شێوەیەکی دروست کار بکەن، پێویستە ئەم پرۆژانە پەرەیان پێبدرێت، هەندێک لە پرۆژەکان کۆنن و گرفتیان تێدایە، پەرەپێدانی ئەم پرۆژانە بۆ بەهێزکردنی پرۆژەی رێگەی گەشەپێدان باشترین چارەسەر بۆ بەستنەوەی هەموو ناوچەکانی عێراق بە رێگەی گەشەپێدانەوە، پرۆژەیەک هەیە بۆ پەرەپێدانی هێڵی ئاسنین، هاوکات پرۆژەیەک هەیە بۆ پەرەپێدانی تۆڕی رێگەوبان و ئێستا حکومەت هەوڵ دەدات بۆ جێبەجێکردنی ئەو پرۆژانە، تاوەکو رێگەی گەشەپێدان پرۆژەیەکی تەواو بێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ