ئیسماعیل هەنییە: شانازی بە برایانی کوردمانەوە دەکەین و ئەوان پێکهاتەیەکی رەسەنی ناوچەکەن

 

ئیسماعیل هەنییە، سەرۆکی مەکتەبی سیاسیی بزووتنەوەی حەماس لە هەڤپەیڤینێکی تایبەتدا لەگەڵ تۆڕی میدیایی رووداو کە بێستوون عوسمان لەگەڵی ئەنجامیدا و رۆژی هەینی 01-04-2022 پەخشکرا لە بەشێکی قسەکانیدا باسی لەوە کرد، ئێران بۆ ئەوان سەرەکیترین دەوڵەتە بۆ هاوکاریی سەربازی، تەکنیکی و دارایی، باس لەوەش دەکات، "برایانی قەتەر بەشێوەی مانگانە پارەمان بۆ تەرخان دەکەن."

 

دەقی هەڤپەیڤینەکە؛

 

 

ئیسماعیل هەنییە: ئێوەش بەخێربێن

 

 

ئیسماعیل هەنییە: بەناوی خوای گەورە و میهرەبان.. بەڵێ من لە غەززە نیشتەجێم و لە یەکێ لە خێوەتگەکانی ئاوارە فەلەستینییەکاندام کە خێوەتگەی کەنار دەریایە.. سەردانیشم بۆ دەوحە بەهۆی کارەوەیە بەو سیفەتەی سەرۆکی مەکتەبی سیاسیی بزووتنەوەی حەماسم، هەندێ ئەرک و پابەندیم بەرامبەر ئەو بزووتنەوەیە و رۆڵەکانی گەلەکەم هەیە و هەروەها لە چوارچێوەی پەیوەندییەکانیشمانە لەگەڵ وڵاتانی عەرەبی و ئیسلامی، بێگومان مانەوەم لێرە کاتییە و پشتیوان بە خوا دەگەڕێمەوە بۆ غەززە.

 

 

ئیسماعیل هەنییە: ئەوە دەوەستێتە سەر بەجێگەیاندنی ئەو ئەرکانەی کەوتوونەتە ئەستۆی سەرکردایەتیی بزووتنەوەی حەماس لەم ماوەیەدا.. پشتیوان بە خوا دەگەڕێینەوە بۆ غەززە. من هەندێ سەردانیشم بۆ میسر و بۆ قاهیرە هەیە کە لە کەرتی غەززەوە نزیکە و پێشوازیش لە هەندێ لە برایانی خۆمان لە حەماس دەکەم کە لە غەززەوە دێن بۆ دەوحە و بۆ ئیستەنبوڵ، بۆیە جموجوڵێکی سروشتی و ئاسایی هەیە لەنێوان من و غەززە.

 

 

ئیسماعیل هەنییە: رەوش لە غەززە زەحمەتە، غەززە زیاتر لە 15 ساڵە لەژێر گەمارۆدایە و لەم ماوەیەشدا چوار جەنگی بەخۆوەبینیوە، ئەمە سەرباری هەڕەشەی کۆرۆنا، واتە سێ ئاڵنگاریی لەم ماوەیەدا لە دژی غەززە یەکیانگرت؛ داگیرکاری و دوژمنکاری، گەمارۆ و پەتای کۆرۆنا. شەڕ و گەمارۆ، کارەسات و ئێش و ئازاری زۆریان لەدوای خۆیان بەجێهێشتووە لە کەرتی غەززە. دەیان هەزار شەهید و بریندار و خانووی وێرانکراو. رێژەی بێکاری بەرزە و هەروەها رێژەی هەژاری. ژمارەیەکی زەبەلاح لە دەرچووی زانکۆ کە نزیکەی 100 هەزار دەرچووی زانکۆ دەبن و ئەمانە هەموو بێکارن. غەززە دەناڵێنێ و غەززە گەورەترین شایەتحاڵە لەسەر رۆحی دوژمنکارانەی داگیرکەر و وەحشییەتی داگیرکەر، هەروەها بەڵگەیەکیشە لەسەر دووفاقیی ئەو پێوەرانەی کە ئیدارەی ئەمریکا و جیهانی رۆژئاوا بەگشتی پەیڕەوی دەکەن. بەداخێکی زۆریشەوە هەندێ لە دەوڵەتانی ئەم ناوچەیە لە ئاست ئەم گەمارۆیە و ئەم برک و ژانەی خەڵکی غەززە کە ژمارەیان سەرووی دوو ملیۆن کەسە، قڕوقەپیان کردووە. ئێمە باس لە زیندانێکی گەورە دەکەین کە زیاتر لە دوو ملیۆن فەلەستینی لەخۆگرتووە.

 

 

ئیسماعیل هەنییە: بەدڵنیاییەوە کەتیبەکانی شەهید عیززەدین ئەلقەسام و گرووپەکانی مقاوەمە گەیشتنە ئاستێکی باش لە توانای بەرەنگاربوونەوەی داگیرکەری زایۆنی و بەرپەرچدانەوەی ئەو داگیرکارییە، ئەوەش لە جەنگی (سیف القدس)دا بە روونی دەرکەوت کە لە مانگی پیرۆزی رەمەزاندا روویدا و هۆکارەکەشی ئەو پرۆژە و رێکارانەی ئیسرائیل بوون کە دەیویست لەناو مزگەوتی ئەقسا و لەناو قودس جێبەجێیان بکات. گومانیشی تێدا نییە کاتێک تۆ لە رووی سەربازییەوە بەهێزی، کەواتە لەڕووی سیاسیشەوە بەهێزی و لە دانوستاندیشدا بەهێزی، ئەمەش لەو دانوستاندنەدا بەدەرکەوت کە بەشێوەیەکی ناڕاستەوخۆ و لەڕێی نێوەندگیریی برایانمان لە میسر و قەتەر و هەروەها لەڕێی نەتەوەیەکگرتووەکانەوە لەگەڵ داگیرکەری زایۆنی بەڕێوەچوو.

 

 

ئیسماعیل هەنییە: بێگومان ئێمە دوای ئەم شەڕانەی کە دەیکەین دەتوانین هەندێ لە مافە زەوتکراوەکانمان بەدەست بهێنینەوە چ لەسەر ئاستی مرۆیی و چ لەسەر ئاستی گوزەرانی خەڵک، هەندێ هەنگاوی لەو جۆرە نراون لە پاش ئەو شەڕە، لەوانە بۆ نموونە، ئێستا دەروازەکان بەشێوەیەکی ئاسایی کار دەکەن. جموجوڵی بیناسازی و نۆژەنکردنەوە دەستیپێکردووە هەرچەندە سستیش بێت، مەبەستم نۆژەنکردنەوەی ئەو باڵەخانانەی داگیرکەر لەو شەڕەدا وێرانی کردن. ئێستا سەدان کرێکاری فەلەستینی لە کەرتی غەززە رێگەیان پێدراوە لەناو فەلەستینی داگیرکراو ئیش بکەن. جموجوڵ و هاتووچۆ لە دەروازەی رەفەح لەنێوان ئێمە و برایانی میسر بەشێوەیەکی رۆژانە هەیە، جموجوڵێکی بازرگانیی باش هەیە لەنێوان غەززە و قاهیرە، هەموو ئەمانە بەهۆی ئەو گوشارە زۆرەوە بەدی هاتن کە مقاوەمە دروستی کردووە، بەڵام هێشتاش دەڵێم ئەمە بەس نییە و هێشتا غەززە گیرۆدەی کێشەی زۆر گەورەیە و ئێمە لەو رووەوە هەڵوێستمان روونە و داخوازییەکانمان روونن و دەبێ ئەم گەمارۆیە بە یەکجاری لەسەر کەرتی غەززە هەڵگیرێ، گەمارۆی وشکانی و ئاسمانی و دەریایی و، خەڵکی غەززە لە تەواوی ئازادییەکانیان بەهرەمەند بن، بەوەشەوە کە دەبێ لە غەززە فڕۆکەخانە هەبێ و بەندەر هەبێ، ئەمە مافێکی رەوای خەڵکی ئێمەیە و لەو روانگەیەوە نییە کە غەززە قەوارەیەکی جیاواز و سەربەخۆیە لە کەناری رۆژئاوا و ناوچەکانی دیکەی فەلەستین، نەخێر بەشێکی جیانەکراوەیە، بەڵام دەبێ گەلی ئێمە لە کەرتی غەززە لانیکەمی پێداویستییەکانی ژیانێکی خۆشگوزەرانیان هەبێ.

 

 

ئیسماعیل هەنییە: هەتا ئەم ساتە قەوارەی ئیسرائیلی رەزامەندی نەداوە لەسەر بنیاتنانەوەی فڕۆکەخانەی کەرتی غەززە. بۆ زانیاریتان لەوێ فڕۆکەخانە هەبوو لە سەردەمی دەسەڵاتی فەلەستینیدا، بەڵام داگیرکەر ئەو فڕۆکەخانەیەی بە تەواوی وێران کرد. هەروەها لەوێ بەندەرێکیش هەبوو کە تەنانەت بۆ پێش سەردەمی داگیرکردنی غەززە دەگەڕێتەوە لە ساڵی 1967، ئێمە داوای بەکارخستنەوەی ئەو بەندەرە و فڕۆکەخانەکەش دەکەین، بەڵام قەوارەی ئیسرائیلی هەتا ئەم ساتە نەچووەتە ژێر باری ئەو داخوازیانە.

 

 

ئیسماعیل هەنییە: بەڵێ ئەمە لە هەموو قۆناخەکانی دانووستاندندا هەبوو. هەندێ جار هەنگاوێک دەچووینە پێشەوە، بەڵام بە کردەوە هیچ نەکرا.

 

 

ئیسماعیل هەنییە: لە پێشەنگی ئەو دەوڵەتانەی کە هاوکاریمان دەکەن لە پرۆسەی بنیاتنانەوە و بووژاندنەوەی ژێرخان، دەوڵەتی قەتەر دێت. برایانی قەتەر بەشێوەی مانگانە پارە تەرخان دەکەن و ساڵانێکیشە بەم کۆمەکەوە پابەندن، لەو چوارچێوەیەشدا گەلێک پرۆژەیان جێبەجێ کردووە کە پرۆژەی ژێرخانن، وەکو قوتابخانە و نەخۆشخانە و کۆمەڵگەی نیشتەجێبوون و رێگەوبان. قەتەر بە دڵنیاییەوە پێشەنگە، هەندێ دەوڵەتی دیکەش هەن کە پرۆژەیان هەیە و هاوکارییان پێشکەش کردووە جا دەوڵەتی عەرەبی بن یان ئیسلامی.

 

 

ئیسماعیل هەنییە: بۆ نموونە میسر کە ئێستا هاتووەتە ناو کەرتی غەززە و دەستی بە چەندین پرۆژەی بنیاتنانەوە کردووە و هەروەها هەندێ شاری نوێ بنیات دەنێ بۆ نیشتەجێبوون، ئەمەش جاری یەکەمە کە میسر ئاوا بە فەرمی دێتە ناو کەرتی غەززە و لە بواری بنیاتنان کاردەکات. دەوڵەتانی دیکەی عەرەبیش هەن وەکو عەرەبستانی سعودی و کوێت و تورکیا.

 

 

ئیسماعیل هەنییە: بەڵێ لە رێگەی نەتەوەیەکگرتووەکانەوە، یان لەڕێی دامەزراوە ناحکومییەکانەوە، بەڵام ئەوەی ئێستا بەشێوەیەکی راستەوخۆ کار دەکات، دەوڵەتی قەتەرە کە بەناوی خۆیەوە وەکو دەوڵەت هاتووە و بەم دواییش لە پاش شەڕەکە، میسر بە فەرمی هاتووەتە ناو پرۆژەکانی بنیاتنانەوە. 

 

 

ئیسماعیل هەنییە: یەکەم شت، ئێمە هەمیشە خراپترین ئەگەر لە دوژمن چاوەڕێدەکەین، چونکە هەمیشە لەسەرپێیە بۆ دەستدرێژیکردنە سەر گەلی ئێمە و خەڵکی ئێمە جا لە کەرتی غەززە بێت یان لە کەناری رۆژئاوا و لە قودس، تەنانەت لەناو فەلەستینی داگیرکراوی ساڵی 1948، هەر بۆ نموونە ئەمڕۆ سێ شەهیدمان هەبووە، لە کەناری رۆژئاوا شەهیدمان هەبووە و شەهیدێکیشمان لە ناوچەی نەقەب هەبووە کە لە 1948ـەوە داگیرکراوە، بۆیە غەززە هەمیشە بەهۆی دوژمنکارییەکانی ئیسرائیل و بەردەوامیی سیاسەتی گوشار و گەمارۆ لەسەر ساجێکی گەرمە، بە دڵنیاییەوە مقاوەمە و لەپێش هەمووشیانەوە کەتیبەکانی قەسام لە چوارچێوەی ستراتیژی کەڵەکەبوونی هێز، بەشی ئەوە توانای هەیە کە بەرەنگاری ئەو دوژمنکارییە ببێتەوە، لە داهاتووشدا هەر هەڕەشەیەک لە گەلی ئێمە بکرێ، مقاوەمە توانای ئەوەی هەیە مامەڵەی لەگەڵ بکات. بەتایبەتی ئەگەر جارێکی دیکە دەستدرێژی بکرێتەوە سەر مزگەوتی ئەقسا، یان لەم مانگی رەمەزانەدا کە جەژنەکانی جوو هاوکات دەبن لەگەڵ ئەم مانگە پیرۆزە، چاوەڕێ دەکرێ زایۆنیستە توندئاژۆکان ئەم یادانەی خۆیان بهێننە ناو حەوشەی مزگەوتی ئەقسا و هەر لە ئێستاشەوە ئامادەکاری بۆ ئەوە دەکەن، بۆیە ئێستا ئێمە لە تەماسی راستەوخۆداین لەگەڵ کەشێک کە چاوەڕواندەکرێ گەرم بێت بەهۆی ئەم مانگی رەمەزانەوە، ئەمە دەوەستێتە سەر چۆنێتی رەفتارکردنی ئیسرائیل لەگەڵ دۆخەکە، دەوەستێتە سەر سیاسەتی زایۆنیزم، دەوەستێتە سەر ئەو گوشارەی کە جیهان دەیخەنە سەر ئیسرائیل بۆ ئەوەی خۆی لە رەفتاری گەمژانە بەدوور بگرێ جا لە قودس بێت یان لە شێخ جەڕاح و لە کەناری رۆژئاوا و لە غەززە، لە دژی فەلەستینییەکانی 1948 و لە دژی دیلەکانمان لە گرتووخانەکانی داگیرکەری زایۆنیدا. من دەڵێم مقاوەمە بۆ ساتێکیش راناوەستێ لە خۆبەهێزکردن و بەدەستهێنانی ئامرازی بەرگری و لە تواناشیدایە بەرەوڕووی هەر دوژمنکارییەکی نوێ ببێتەوە.

 

 

ئیسماعیل هەنییە: ئێمە خۆمان لە شەڕ بەدوور دەگرین. شەڕیشمان ناوێ، بەڵام ئەگەر شەڕیان داسەپاندە سەرمان، بەرگری لە خۆمان دەکەین و ئەوکاتە داگیرکەر تووڕەیی و زەبری جەنگاوەرانی ئێمە دەبینن.

 

 

ئیسماعیل هەنییە: بەڵێ مقاوەمە بەردەوام دەبێ و بەردەوامیش پەرە بەخۆی دەدات. لە جەنگی 2009 دا مقاوەمە ئاستێکی دیاریکراوی هەبوو. لە 2012 کە جەنگێکی دیکە هەڵگیرسا، مقاوەمە پەرەی زیاتری بە توانای خۆی دابوو، ئەو ساڵە بۆ یەکەمین جار بە مووشەکی قەسام لە تەلئەڤیڤ درا. لە 2014 ئاست و توانای مقاوەمە بەرزتر بوو، لە جەنگی ئایاری رابردووش کە کەوتە ناو مانگی رەمەزانی پیرۆزەوە، جیهان بە چاوی خۆیان توانای پەرەسەندووی مقاوەمەیان بینی، ئەوە لە رووی چۆنایەتییەوە بووە قەڵەمبازێک لە ئەدای مقاوەمە و ئامرازەکانی بەرەنگاربوونەوەی و پلانەکانی بەرگری و هەروەها هێرشکردنی و توانای شکستهێنانی بە پلانەکانی دوژمن، بۆیە ئێمە لەم بەرگرییەدا بەردەوام روومان لە هەڵکشانە، بۆیە وەکو گوتم ئەگەر شەڕمان لەسەر بسەپێنن و کەرتی غەززە بەرەوڕووی جەنگێکی دیکە بکەنەوە. 

 

 

ئیسماعیل هەنییە: بە دڵنیاییەوە توانای مقاوەمە تەنانەت لەوەی ئایاری رابردووش باشتر دەبێ و بۆ ئەوەش بە تەواوی ئامادەین.

 

 

ئیسماعیل هەنییە: ئێران بۆ ئێمە سەرەکیترین و گرنگترین دەوڵەتە لەڕووی کۆمەکی سەربازی و تەکنیکی و داراییەوە، ئێمە لە رۆڵەکانی ئوممەتی ئیسلامی و عەرەبییەوە پشتیوانیمان پێدەگات، گەلانی عەرەبی لەم رووەوە درێخییان نەکردووە، بەڵام پێداویستییە سەرەکی و ستراتیژییەکانمان، بە دڵنیاییەوە لەلایەن ئێرانەوە دابین دەکرێ. ئێستا مەسەلەی مووشەک و گواستنەوەی مووشەک و درۆن بۆ کەرتی غەززە هەندێک زەحمەت بووە، ئەوەش بەهۆی رێکارەکانی زایۆنیزمی ئیسرائیلی و هەروەها رێکارە ئەمنییەکانی برایانمان لە میسر، بەڵام ئەندازیارەکانی قەسام لەناو کەرتی غەززە توانیویانە پەرە بەو مووشەکانە بدەن و پەرە بە درۆنەکان بدەن، بێگومان هاوکارییەکی باش هەیە لەنێوان بزووتنەوەی حەماس و رۆلەکانی گەلی خۆمان و هەروەها لەگەڵ ئێرانیش، بۆیە بەڵێ ئێران رۆڵێکی سەرەکی دەبینێ لە دابینکردنی کۆمەکی سەربازی و تەکنیکی و دارایی بۆ مقاوەمەی فەلەستینی.

 

 

ئیسماعیل هەنییە: سەرەتا با ئەم پەیوەندییە لەگەڵ ئێران روون بکەمەوە. ئەمە پەیوەندییەکە لەسەر بنەمای ئەوەی کە دۆزی فەلەستین دۆزی ئوممەتی عەرەبی و ئیسلامییە و دۆزی سەرەکیشە. ئێمە گەلێکین لەژێر داگیرکاریدا و پێویستمان بە کۆمەک و پشتیوانیی برایانمان لە جیهانی عەرەبی و ئیسلامی هەیە، تەنانەت پشتیوانیی ئازادیخوازانی جیهانیش، بۆیە پێشوازیی لە هەر کۆمەک و پشتیوانییەک دەکەین لە هەر دەوڵەتێکەوە بێت مادام ئامانجەکەی بەهێزکردنی توانای بەرەنگاریی ئێمە و مقاوەمەمان بێت لە بەرامبەر داگیرکاریی ئیسرائیل. ئەمە لایەنێکی، لەلایەکی دیکەوە ئەم پشتیوانییەی ئێران بۆ ئێمە مەرجدار نییە. هیچ مەرجێکیان نییە.

 

 

ئیسماعیل هەنییە: سەبارەت بزووتنەوەی حەماس هیچ مەرجێک لەئارادا نییە.

 

 

ئیسماعیل هەنییە: هیچ بەڵگەیەکیشم نییە ئەوە بسەلمێنێ کە مەرج لەسەر هێزەکانی دیکەش دانرابێ.

 

 

ئیسماعیل هەنییە: نەخێر ئێمە لە فەلەستین، جەنگمان لە دژی داگیرکاریی زایۆنیزمی ئیسرائیلە و لەگەڵ هیچ دەوڵەتێک نەچووینەتە سەنگەرەوە لە دژی دەوڵەتێکی دیکە. لە هیچ میحوەرێکدا نین لە دژی میحوەرێکی دیکەی ناوچەکە.

 

 

ئیسماعیل هەنییە: ئێمە چوارچێوەی پەیوەندییەکەمان بریتییە لە مقاوەمە، فەلەستین، پرۆژەی ئیسلامی لەناو فەلەستین.

 

 

ئیسماعیل هەنییە: نا پەیوەندیی ئێمە لەگەڵ هەموو لایەنەکانی ئوممەتی ئیسلامیە، لەگەڵ سوننە و.. ئێمە هەر خۆمان بەشێکین لەو پێکهاتە مەزن و بەرفراوانە. ئێمە سوننەین و شافیعین و ئەمە بابەتێکی فکری و عەقائیدی و شەرعیە و هیچ مشتومڕێک هەڵناگرێ، لە هەمانکاتدا پێمانوایە برایانی شیعە و ئێرانیش بەشێکن لەم ئوممەتە و ئێران دەوڵەتێکی دێرینی ئەم ناوچەیەیە، دەوڵەتێکە ستراتیژی دژبەری بەرامبەر پرۆژەی زایۆنیزمی ئیسرائیلی هەیە و پشتیوانی مقاوەمەتە، ئەمە بە دڵنیاییەوە لە چوارچێوەی پەیوەندییەکانماندا جێگیرە و روونە. ئەمڕۆ رەنگە لەگەڵ ئەم دەوڵەت یان ئەو دەوڵەت تەبا نەبین لە هەندێ لە سیاسەتەکانیاندا. ئێران لەم یان لەو دەوڵەت هەندێ سیاسەت پەیڕەو دەکات مەرج نییە حەماس بەتەواوی لەگەڵ ئەم سیاسەتانە بێت.

 

 

ئیسماعیل هەنییە: مەسەلەی سووریا بۆ نموونە، ئێمە لە سووریا بووین و تووشی ناکۆکی هاتین و دواجار بزووتنەوەی حەماس سووریای بەجێهێشت سەرەڕای ئەوەی سەرکردایەتی و بنکەی جەماوەریی بەهێزیشمان لەوێ هەبوو، بەڵام لە ساتێک لە ساتەکاندا، سەرکردایەتی ئێمە بەو قەناعەتە گەیشت کە مانەوەی سەرکردایەتیمان لەناو سووریا رەنگە لێکەوتەی سیاسی و ئەمنیی هەبێ و لەبەر ئەوەش بڕیاری دا ئەوێ چۆڵ بکات.

 

 

ئیسماعیل هەنییە: لەوانەیە ئەمە، لەوانەیە ئەمە بە دڵی برایانمان لە ئێران نەبووبێ، لەوانەیە بە دڵی برایانی سووریا نەبووبێ، بەڵام بزووتنەوەی حەماس هەمیشە ئەو بڕیارە دەدات کە لەگەڵ پرەنسیپەکانی خۆی و بەهاکانی خۆی دەگونجێ.

 

 

ئیسماعیل هەنییە: بەڵام لە هەمان کاتدا ناکۆکی و ناتەباییەکانی خۆی لەگەڵ ئەم دەوڵەت و ئەو دەوڵەت سەبارەت بە هەندێ دۆسیەی ناوچەکە، ناگۆڕێ بۆ شەڕ و ململانێ. ململانێی ئێمە و شەڕی ئێمە تەنیا لەگەڵ دوژمنی زایۆنییە.

 

 

ئیسماعیل هەنییە: ئێمە پێمانوایە کە پێویستە و گرنگە و دەبێ عێراق بە یەکگرتوویی بمێنێتەوە و خاوەن سەروەری بێ. عێراق بەشێکە لە ئوممەتی عەرەبی و ئیسلامی. پێگە ستراتیژییەکەی عێراق بەلای ئێمەوە لە فەلەستین، چ پێشان و هەتا ئێستاش و لە داهاتووشدا قوولاییەکی ستراتیژیی ئێمەیە. عێراق مێژوویەکی گەورە و گرنگی لەگەڵ دۆزی فەلەستینی هەیە، تەنانەت چووەتە ململانێی راستەوخۆوە لەگەڵ دوژمنی زایۆنی. عێراق شەهیدی داوە و گۆڕی شەهیدەکانیان لەناو گۆڕستانەکانی فەلەستینی داگیرکراوە. ئێمە هەمیشە خوازیاری ئەوەین عێراق سەلامەت بێ و خاوەنی سەروەریی تەواوی خۆی بێ و یەکگرتوو بێ و بڕیار و ئیرادەی لەدەستی خۆی بێ و لە هەمان کاتیشدا لە پەیوەندییەکی سەقامگیردا بێ لەگەڵ هەموو دراوسێ عەرەب و موسوڵمانەکانی بە ئێرانیشەوە. 

 

 

ئیسماعیل هەنییە: ئێمە بێگومان وەکو بنچینە و پرەنسیپ لەگەڵ هیچ جۆرە پەیوەندییەک نین لەگەڵ قەوارەی ئیسرائیل. ئێمە دژی ئاساییکردنەوەی پەیوەندین لەنێوان دەوڵەتە ئیسلامی و عەرەبییەکان و قەوارەی ئیسرائیلی. پێمانوایە ئەم ئاساییکردنەوەیە زیانبەخشە چ بۆ دۆزی فەلەستینی و چ بۆ ئەو دەوڵەتانە خۆیشیان، ئەمە بۆ هەموو دەوڵەتەکان بە تورکیاشەوە هەر وایە. ئەمەشمان لە بەیاننامەیەکی فەرمییدا روونکردووەتەوە و هەروەها لە دیدارە راستەوخۆکانیشدا بە برایانی بەرپرسی تورکیامان راگەیاندووە. راستە ئێمە دەست وەرنادەینە کاروباری نێوخۆی وڵاتان بە تورکیاشەوە، ئەمە بڕیاری خۆیانە و لە کۆتاییشدا هەر خۆیان دەبێ بەرپرسیارێتیەکەی هەڵگرن، بەڵام ئێمە وەکو خەڵکی فەلەستین، وەکو بزووتنەوەیەکی بەرگری، هەڵوێستی خۆمان بە روونی و راشکاوی دەردەبڕین و.. 

 

 

ئیسماعیل هەنییە: هیواش دەخوازین هیچ دەوڵەتێک بەو ئاراستەیە نەڕوات. کەواتە ئەو زمانەی ئێمە بەکاری دەهێنین زمانێکی سیاسییە. ناچینە شەڕەوە لەگەڵ کەس، ناچینە شەڕە قسەی میدیاییەوە لەگەڵ هیچ وڵاتێک، چونکە نامانەوێ فۆکەسی ئەم شەڕەی گەلی فەلەستین لەگەڵ قەوارەی ئیسرائیلی بەلایەکی دیکەدا بڕوات و ببێتە شەڕ لەگەڵ تورکیا یان ئیمارات و یان ئوردن و میسر، مەبەستم ئەو دەوڵەتانەی پەیوەندییان لەگەڵ ئیسرائیل هەیە. ئێمە هەڵوێستی خۆمان دەردەبڕین و دیدگای خۆمان روون دەکەینەوە، هیوا دەخوازین هیچ دەوڵەتێک بەو ئاراستەیەدا نەڕوات، بەڵام دوای ئەوە درێژە بە پەیوەندیی خۆمان دەدەین و دەیپارێزین بەگوێرەی خاڵە هاوبەشەکانمان و بەرژەوەندییە باڵاکانمان.

 

 

ئیسماعیل هەنییە: سەرەتا رێم بدە سڵاوی خۆم ئاراستەی هەموو ئەوانە بکەم کە لە هەرێمی کوردستان نیشتەجێن و ئەو هێڵە مێژووییە ئیسلامییە رەسەنە بە یاد بهێنمەوە کە کورد و فەلەستینییەکان پێکەوە گرێ دەدات، سەلاحەدینی ئەیوبی کە یەکێک بوو لە رۆڵەکانی نەتەوەی کورد کە ئەمڕۆ بەشێکن لە گەلی عێراق و بەشێکن لە ئوممەتی ئیسلامیش، سەلاحەدین کە فەلەستینی رزگار کرد و قودسی لە خاچپەرستان رزگار کرد. ئەمە شتێکە کولتووری ئێمە پێکدەهێنێ و هەمیشە مایەی شانازیمانە ئەم ئینتیما مێژووییەی ئەم نەتەوەیە. ئێمە سوپاس بۆ خوا پەیوەندیمان لەگەڵ برایانمان لە هەرێمی کوردستان پەیوەندییەکی باشە و پەیوەندییەکی کراوەیە و هەمیشە پەیوەندیمان لەگەڵ کەسایەتییە سیاسییەکان و کەسایەتییە ئەکادیمییەکان هەبووە و هەمیشە هەڵوێستی زۆر روونمان لێ بینیون، بینیمان کە خەڵکی هەرێمی کوردستان چۆن هاوسۆزییان لەگەڵ خەڵکی غەززە دەربڕی ئەوکاتەی لەژێر گەمارۆ و شەڕدا بوو.

 

هەروەها لەم جەنگەی دواییش لە مانگی ئایاری ساڵی رابردوو کە خۆپیشاندانی ناڕەزاییان کرد و پشتیوانیی سیاسی و میدیایی خۆیان بۆ قودس و بۆ ئەقسا دەربڕی، هەروەها بۆ مانگرتووانی ناو ئەقسا و بۆ غەززە، ئێمە هەموو ئەوانەمان بینی و لە دڵەوە شانازیمان پێوەکرد، هەر لەوکاتەدا پەیوەندی تەلەفۆنیمان لەگەڵ بەڕێز سەرۆککۆماری عێراق هەبوو کە ئەویش هەر لە برایانی کوردە، خۆم لەم شەڕەی دواییدا لە غەززە دوو جار پەیوەندیم پێوەکرد و هەڵوێستیشی زۆر روون و راشکاو بوو، هەڵوێستێکی بەهێز بوو کە گوزارشتی لە عێراق بەگشتی و بەتایبەتیش لە برایانی کوردمان دەکرد، بۆیە ئێمە شانازی بەو پەیوەندییەوە دەکەین کە درێژ بووەتەوە بۆ ناو مێژوو، بەلاشمانەوە گرنگە پەرە بەو پەیوەندییە لەگەڵ خەڵکی خۆمان لە هەرێمی کوردستان بدەین. بەهیواین بتوانین سەردانیشمان هەبێ بۆ عێراق و بۆ هەرێمی کوردستانیش، ئەوە مایەی بەختەوەریمان دەبێ و پشتیوان بە خوا چاوەڕێی تەواوبوونی ئامادەکارییەکانین بۆ سەردانی عێراق و دیدار لەگەڵ هەرسێ سەرۆکایەتییەکەی و هەروەها مەرجەعە سیاسییە هەمەڕەنگەکانی پشتیوان بە خوا.

 

 

ئیسماعیل هەنییە: وەکو پرەنسیپ، هەر پێکهاتەیەک لە پێکهاتەکانی ناوچەکە و هەر پێکهاتەیەک لە پێکهاتەکانی گەلان و ولاتان، دەبێ لە تەواوی مافەکانی خۆیان بەهرەمەند بن، جا مافی سیاسی بێت یان مرۆیی، دەبێ لە نەخشەی پێکهاتەکاندا ئامادەگییان هەبێ و دەنگیان کپ نەکرێ و نەخرێنە پەراوێزەوە و لە هاوکێشە سیاسییەکان نەکرێنە دەرەوە، ئەمە بۆ برایانی ئێمە لە هەرێمی کوردستانیش دەبێ هەمان شت بێ، هەروەها بۆ ئەو برا کوردانەش کە لە سووریا و تورکیا و ئێراندان، دەبێ لە تەواوی مافەکانی خۆیان بەهرەمەند بن وەکو هەر هاووڵاتییەکی دیکەی ئەو وڵاتانە. لەلایەکی دیکەشەوە ئێمە ناتوانین بڕیار لە ئایندە و لە چارەنووسی برایانی کورد بدەین کە دەیانەوێ بە چ شێوەیەک لەسایەی ئەو دەوڵەتانەدا بژین، ئەوەی کورد بۆ خۆیانی بە گونجاو دەزانن بە دڵنیاییەوە ئێمەش قبوڵی دەکەین، ئەوەشی هاوکێشە نێوخۆییەکانی ئەو دەوڵەتانە لەسەر بنەمای سازان و هاوبەشێتی و پاراستنی ماف دەیسەپێنێ، بە دڵنیاییەوە ئێمە پێشوازی لێ دەکەین و وا تەماشای دەکەین کە مایەی پاراستنی ماف و رەگەزەکانی بەهێزیی نێوخۆیی گەلانی ئەم ناوچەیەیە.

 

 

ئیسماعیل هەنییە: من جارێکی دیکەش دەیڵێمەوە ئێمە شانازی بە برایانی کوردمانەوە دەکەین، شانازی بە وجوودیان و بە مێژوویانەوە دەکەین، شانازییان پێوە دەکەین کە پێکهاتەیەکی رەسەنی ئەم ناوچەیەن و بەشێکن لەم ئوممەتە و شانازی بە رۆڵی مێژووییان و رۆڵی ئێستاشیانەوە دەکەین سەبارەت بە دۆزی فەلەستین، بەڵام ئەوەی پەیوەندی بە ئایندە و بە مافی بڕیاردانی چارەنووسەوە هەبێت، ئەمە شتێکە خۆیان دەبێ بڕیاری لەبارەوە بدەن و بڕیارەکەش بە سازان و بە لێکگەیشتن بێت لەگەڵ ئەو دەوڵەتانەی تێیاندا دەژین.  

 

 

ئیسماعیل هەنییە: بێگومان ئەوەش دەچێتە چوارچێوەی ئەو ململانێ کراوەیەی لەم ناوچەیە هەیە.. ئەم ناوچەیە ئێستا لە ململانێیەکی کراوەدایە کە نە ئاسانە و نە سنوورداریشە، دیارە بەو ململانێیەشەوە کە لەنێوان ئێران و ئیسرائیل هەیە. قەوارەی ئیسرائیلی دەچێ لەناو خاکی سووریا هەندێ شوێن بۆردومان دەکات کە بە قسەی ئەوان ئامانجی ئێرانین. قەوارەی ئیسرائیل و ئەمریکا بەردەوام پلان دادەنێن بۆ لێدانی ئامانجە ئێرانییەکان، جا هێرشی راگەیێندراو بن یان رانەگەیێندراو، رەنگە ئێرانیش ویستبێتی بە هەمان شێواز وەڵامیان بداتەوە. وەکو روونە ململانێیەکی تاڵ و ململانێیەکی کراوە لەگەڵ قەوارەی ئیسرائیل لەم ناوچەیە هەیە و بە دڵنیاییەوە ئێرانیش بەرگری لە خۆی و لە قەوارەکەی و تواناکانی خۆی دەکات و خۆی دەپارێزێ، بۆیە ئەمەش بەشێکە لەو ململانێ کراوەیەی ناوچەکە و پێشموایە ئەوەی دەبێ بەرپرسیارێتی تێکەڵکردنی کارتەکان لە ئەستۆ بگرێ لەم ململانێیەدا، قەوارەی ئیسرائیلە و نابێ بە هیچ شێوەیەک بێتاوان دەربچێ لەم رەفتارانەی لە سووریا و لە عێراق و لوبنان، یان لەناوخۆی فەلەستینی داگیرکراو دەیانکات و تەنانەت ئاساییکردنەوەی پەیوەندییەکانیشی لەگەڵ هەندێ دەوڵەتی ناوچەکە وەکو بنکەی پەلاماردان و ئازاردانی وڵاتانی عەرەبی و ئیسلامی بەکاردەهێنێ.

 

 

ئیسماعیل هەنییە: یەکەم شت دەمەوێ جەخت لەوە بکەمەوە کە پاراستنی سەروەریی عێراق مەسەلەیەکی گرنگە و دەبێ ئەم سەروەرییە پارێزراو بێ بە سەروەریی هەرێمی کوردستانیشەوە، ئەمە بەلای ئێمەوە پرەنسیپە و دەستبەرداری نابین، بەڵام. من نازانم ئاخۆ بەڕاستی هیچ ئامانجێکی ئیسرائیلی لە ناو عێراق و لە هەرێمی کوردستان هەیە؟ من لەوبارەوە هیچ زانیارییەکم نییە، بە چاوپۆشی لەوەی کە ئێمە دژی هەر وجوودێکی ئیسرائیلین لەسەر هەر بستە خاکێکی جیهانی عەرەبی و ئیسلامی بە هەرێمی کوردستان و بە عێراقیشەوە، ئەمە پرەنسیپە و ئێمە ناڵێین لەوێ هەن، حەزیش ناکەین لە هیچ شوێنێکی جیهانی عەرەبی و ئیسلامیدا هەبن. من وەکو گوتم زانیاریی پێویستم لەبەردەست نییە دەربارەی ئەو رووداوە، ئەوەی لێیدرا چی بوو؟ ئێران وا دەڵێ، بەڵام وەکو پرەنسیپ، سەروەریی عێراق. سەروەریی هەرێمی کوردستان. رەتکردنەوەی هەر وجوودێکی ئیسرائیل لە ناوچەکە و ئەو ململانێ کراوەیەی ناوچەکەش وەکو گوتم، فاتوورەی حسابە و قەوارەی ئیسرائیلی بەرپرسە لە تێکەڵکردنی کارتەکانی ناوچەکە.