رووداو دیجیتاڵ
لە دوو رۆژی رابردوودا لە سنووری ناحیەی دینارتە سەر بە قەزای ئاکرێ زیاتر لە 200 کەس تووشی سکچوون و رشانەوە بوون. بەڕێوەبەری ناحیەکە دەڵێت، لیژنەیەکیان پێکهێناوە بۆ بەدواداچوون و پشکنین بۆ ئاوی خواردنەوەی دینارتە دەکەن.
ئەمڕۆ یەکشەممە، 26-02-2023، سەربەست سەبری، بەڕێوەبەری ناحیەی دینارتە بە تۆڕی میدیایی رووداوی گوت، زیاتر لە 200 کەس لە تەمەنە جیاوازەکان لە دوو رۆژی رابردوودا بەهۆی سکچوون و رشانەوەوە سەردانی بنکە تەندروستییەکانیان کردووە، بۆیە لەسەر ئەو بابەتە لیژنەیەکیان پێکهێناوە و دەستیان بە بەدواداچوون کردووە بۆ ئەوەی هۆکاری رووداوەکە بزانن.
لیژنە تەندروستییەکە پشکنین بۆ ئاوی خواردنەوەی ناحیەی دینارتە دەکات و بڕیارە دواتر ئەنجامەکانی رابگەیێنێت.
بەڕێوەبەری ناحیەی دینارتە باسی لەوەش کرد، لیژنەیەکی تەندروستی لە ئاکرێوە سەردانیان کردووە و دەستیان بە لێکۆڵینەوە کردووە، چونکە وەک ئەو دەڵێت، لە رۆژانی رابردوودا لە ئاکرێش چەند کەسێک تووشی سکچوون و رشانەوە ببوون.
ئەو کەسانەی کە تووشی سکچوون و رشانەوە ببوون لە دینارتە، هەموویان چارەسەری تەندروستییان بۆ کراوە و چوونەتە ماڵەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ