توێژینەوەیەک: قەڵەویی ژنانی دووگیان مەترسیی لەسەر منداڵەکەیان دروستدەکات

 

توێژەرانی نەخۆشخانەی جێنێراڵ دی ڤالێنسیا لە ئیسپانیا رایدەگەیێنن، قەڵەوی و نەخۆشیی شەکرەی ژنانی دووگیان دەکرێت ناڕێکی لە جینی منداڵ دروستبکات و لە داهاتوودا دووچاری نەخۆشیی درێژخایەنی بکات. 

 

توێژینەوەکە لە گۆڤاری پزیشکیی نەخۆشییەکانی دڵ بڵاوکراوەتەوە و بە هاوبەشی لەگەڵ زانکۆی ڤالێنسیا و ناوەندی توێژینەوەی شارەکە کراوە و دەریدەخات، رەفتار و تەندروستیی ژنان لە ماوەی دووگیانیدا، کاریگەریی ئەرێنی و نەرێنیی لەسەر تەندروستیی داهاتووی منداڵ دەبێت، پسپۆڕێکی خانمانیش دەڵێت: ''30٪ـی ژنان لە ماوەی دووگیانیدا دووچاری قەڵەوی دەبنەوە.'' 

 

دکتۆر ماریۆ فراگا، پسپۆڕی نەخۆشییەکانی خانمان و منداڵبوون دەڵێت: ''قەڵەویی ژنی دووگیان دەشێت گۆڕانکاری لە جینی کۆرپەلە بکات و لە داهاتوودا مەترسیی بۆ سەر ژیانی دروستبکات، بەجۆرێک تووشی نەخۆشیی شەکرە، قەڵەوی و نەخۆشییەکانی دڵی بکات.'' 

 

بە گوێرەی ناوەندی کۆنتڕۆڵکردن و پێشگیریکردن لە نەخۆشییەکان لە ئەمریکا، خانمانی دووگیانی قەڵەو مەترسیی تووشبوونیان بە بەرزە پەستانی خوێن و مەیینی خوێن زیاترە، ناوەندەکە رینوێنیی ژنانیش دەکات، 'دابەزاندنی کێش، رێکخستنی کاتی خەو و خواردنی خۆراکی تەندروست' پێش دووگیانبوون و کاتی دووگیانبوون جێبەجێبکەن.