توێژینەوەیەکی ئەمریکی: ترێ هاوشێوەی دژەخۆر پێستی مرۆڤ دەپارێزێت

 

توێژینەوەکە لە گۆڤاری دژەئۆکسێنەرەکان بڵاوکراوەتەوە و دەریدەخات، رۆژانە خواردنەوەی پەرداخێک شەربەتی ترێ، مەترسیی سووتانی پێست بە تیشکە سەروو وەنەوشەییەکانی خۆر کەمدەکاتەوە، هەروەها توێژەران بوونی مادە سرووشتییەکانی وەکو پۆلیفینۆڵ بە هۆکاری ئەم سوودەی ترێ دادەنێن.

 

بەشداربووانی توێژینەوەکە کران بە دوو کۆمەڵە؛ کۆمەڵەیەک بۆماوەی دوو هەفتە رۆژانە پەرداخێک شەربەتی ترێیان پێدەدرا، کۆمەڵەکەی دیکە بەدەربوون لە خواردنەوەی شەربەتەکە، دەرکەوت وەڵامدانەوەی خانەکانی پێست بۆ تیشکی خۆر لەو کەسانەی شەربەتی ترێیان خواردووەتەوە بەروارد بە کۆمەڵەکەی دیکە کەمترە و پێستیان بەرگری پەیداکردووە. 

 

جۆن پیزوتۆ، سەرپەرشتیاری توێژینەوەکە دەڵێت: ''زۆرێک لە مرۆڤی دێرین ترێیان وەکو سەرچاوەیەکی بەهای خۆراکیی دەوڵەمەند داناوە، ئەم توێژینەوەیەش یەکێک لە سوودەکانی ترێ پشتڕاستدەکاتەوە'' هەروەها جۆن دەشڵێت: با خواردن دەرمانت بێت و دەرمانیش خواردنت بێت.

 

سەرپەرشتیاری توێژینەوەکە سەرچاوەی ئەم سوودەی ترێ رووندەکاتەوە و دەڵێت: ''مادەی پۆڵیفینۆڵی نێو ترێ دژە ئۆکسێنەرێکی بەهێزە و بەرگریی پێست دژی تیشکە زیانبەخشەکانی خۆر دروستدەکات.''

 

کۆمەڵەی شێرپەنجەی ئەمریکی رایدەگەیێنێت، زۆری بەرکەوتن بە تیشکی خۆر هۆکارێکی شێرپەنجەی پێستە، هەروەها ساڵانە پێنج ملیۆن تووشبووی شێرپەنجە لە ئەمریکا تۆماردەکرێن، کە 100 هەزاریان بەهۆی تێکچوونی میلانینی نێو پێستەوە دروستدەبن.

 

لە کتێبی تەندروستترین خۆراکی جیهاندا، ترێ بە یەکێک لەو خۆراکە تەندروستانە داندراوە کە دەوڵەمەندە بە پێکهاتەی خۆراکیی جۆراوجۆری وەکو پڕۆتین، کاربۆهیدرات، چەوریی سوودبەخش، شەکر و ریشاڵ.