Hewlêr (Rûdaw) - Gera 21ê ya Astanayê ya li ser dosyaya Sûriyeyê li Kazaxistanê bi serpereştiya welatên garantor (Rûsya,Tirkiye,Îran) û amadebûna şandeyên hikûmet û opozisyona Sûriyeyê, Neteweyên Yekbûyî û welatên cîranên Sûriyeyê bi dawî bû.
Cîgirê Wezîrê Karên Derve yê Kazaxistanê Alîbek Bakayev li ser civînê got:
“Tekezî li ser girîngiya berdewambûna kar û xebatên ji bo vegerandina pêwendiyên Tirkiye û Sûriyeyê ya li ser bingeha rêzgirtinê û cîrantiya baş ji bo rûbirûbûna terorê hat kirin.”
Rojavayê Kurdistanê jî beşeke gotûbêjên Gera 21ê ya Astanayê bû.
Welatên garantor hebûna statûyeke otonom a li herêmên Rêveberiya Xweser red kir.
Cîgirê Wezîrê Karên Derve yê Kazaxistanê Alîbek Bakayev anî ziman:
“Me rewşa bakurê rojhilatê Sûriyeyê gotûbêj kir û me ji bo bicihkirina ewlehî û aramiya berdewam a ji bo parastina serweriya axa Sûriyeyê li hev kir.
Herwiha me tekezî li ser redkirina destpêşxeriyên ji bo desthilata otonoma ne rewa bi hinceta rûbirûbûna terorê hat kirin û tekezî li ser rûbirûbûna ajandayên cudabûna dijî yekîtiya Sûriyeyê û gefa li ser ewlehiya welatên cîran jî hat kirin.”
Gera 21ê ya Astanayê bal kişand ser rewşa aborî ya xirab a Sûriyeyê û bi taybetî rewşa koçberan a li bakurê rojavayê wî welatî.
“Divê zêdebûna metirsiya jinavçûna ewlehiya xorakê li ber çavan bê girtin”
Cîgirê Wezîrê Karên Derve yê Kazaxistanê Alîbek Bakayev herwiha got:
“Li gor yasaya navdewletî tekezî li ser girîngiya berdewambûn û zêdebûna alîkariyên mirovî ji bo Sûriyeyê tevî dabînkirina peredarkirina temam ji aliyê xwebexşan hat kirin.
Divê zêdebûna metirsiya jinavçûna ewlehiya xorakê û kêmbûna alîkariyan ji aliyê Programa Xorakê ya Cîhanî ve li ber çavan bê girtin.”
Yekem Gera Astanayê 23ê Kanûna Paşîna 2017an destpê kiribû.
Di 12 gerên ku di navbera 2017an û 2019an çêbûbûn de Hikûmeta Sûriyeyê bi piştevaniya Rûsyayê beşekî parêzgeha Himsê û parêzgehên Quneytre û Derayê ligel Xûteya rojhilatê Şamê ji dest grûpên çekdar ên opozîsyonê derxist ku niha tenê çavê wê li Idlib û bakurê Helebê ye.
Li gorî Berdevkê berê yê Desteya Gotûbêjan a opozîsyona Sûriyeyê Yehya el-Ureydî, Rûsya bi rêya Gerên Astanayê xwest biryara 2254ê ya navdewletî ji bo çareseriya siyasî ya Sûriyeyê bi cih bike.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse