Hewlêr (Rûdaw) - Nûnerê Bilind ê Karên Derve û Polîtîkayên Ewlekariyê yê Yekitiya Ewropayê (YE) Josep Borrell ragihand, ji bo asayîkirina peywendiyên bi Tirkiyê re, kêmkirina aloziyên li Deryaya Spî, mijara Qibrisê û mafên bingehîn ên mirovî pirsgirêkên serekî ne ku divê bêne çareserkirin.
Josep Borrell derbarê peywendiyên Tirkiye û Yekitiya Ewropayê de ji medya Ewropayê re axivî û got “Em îro li ser mijara Tirkiyê rawestiyan. Ev mijar dê di rapora ku me bi Komîsyona Yekitiya Ewropayê re amade kiriye, cih bigre. Peywendiyên Tirkiyê û Yekitiya Ewropayê ne yek alî ne, hêviyên her du aliyan hene.”
Borrell diyar kir ku her du alî jî dixwazin peywendiyeke bihêz bê avakirin û got “Ji bo peywendiyên ku sala 2018an hatin rawestandin careke din zindî bibin mijarên bingehîn Deryaya Spî û Qibris in. Nehiştina aloziya li Deryaya Spî ji bo seqamgirî û ewlekariya herêmê girîng e.”
Borrell herwiha dibêje ku cîbicîkirina maf û nirxên bingehîn ku di Peymana Mafên Mirov de hatine destnîşankirin û ji aliyê Tirkiyê ve jî hatiye îmzekirin, ji bo zindîkirina peywendiyan zêde girîng e.
Ji aliyê din ve Wezîra Derve ya Almanyayê Annalena Baerbock jî ragihand “Tirkiye ne dewletek e ku hiqûq û mafên mirovan li ber çavan tê girtin. Ji ber ku heyameke zehmet heye nabe em diyariyan bidin Tirkiyê.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse