Hewlêr (Rûdaw) - Konseya Ewropayê bangî Tirkiyeyê kir û xwest Selahattîn Demîrtaş û Osman Kavala demildest bên berdan.
Dadgeha Mafên Mirovan a Ewropayê biryar dabû ku siyasetmedarê Kurd Selahattîn Demîrtaş û karsazê Tirk Osman Kavala bên berdan lê Tirkiyeyê ev biryar bi cih neanî.
Komîteya Wezîran a Konseya Ewropayê, 5-7ê Kanûna Pêşîna 2023yan bi rojeva bicihneanîna vê biryarê civiya.
Komîteya Wezîran a Konseya Ewropayê, bangî Tirkiyeyê kir ku Demirtaş û Kavala demildest bên berdan.
Komîteya Wezîran ragihand ku tevî hemû bangan Osman Kavala nehatiye berdan û cezayê heta hetayê yê girtîgehê lê hatiye birîn û ji ber vê yekê “zêde xemgîn in.”
“Mafên wî tên binpêkirin”
Komîteya Wezîran di daxuyaniya xwe de cih da van îfadeyan:
“Di pêvajoya dozê de destkarî li sîstema darazê ya ceza ya Tirk hat kirin û ji bo ku were bêdengkirin Kavala di girtîgehê de ye.
Tevî ku derbarê wî de biryar hatiye dayîn mafên wî yên di çarçoveya Peymana Mafên Mirovan a Ewropayê de tên binpêkirin.”
Komîteyê biryar da ku heta civîna 2024an pêwendiya teknîkî ya bi Tirkiyeyê re bê zêdekirin.
Komîteyê herwiha ragihand ku sîstema Lijneya Dozger û Dadweran a Tirkiyeyê ne li gorî standardên gerdûnî ye û divê ev sîstem biguhere.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse