Hewlêr (Rûdaw) - Li bajarê New Yorkê civîna Konseya Ewlehiyê ya Neteweyên Yekbûyî ya derbarê çekên kîmyewî yên li Sûriyeyê di bin bandora pevçûnên dawî de derbas bû.
Ango endamên Konseya Ewlehiyê hemiyan amaje bi vê yekê kir ku pevçûnên dawî yên li Sûriyeyê ew metirsîdar dikin ku şerê navxweyî dibe ku carek din dest pê bike.
Ji ber ve yekê jî bang hate kirin ku pevçûn bi lez û bez werin rawestandin û meseleya çeken kimyewî jî were çareserkirin.
"Rewş li Sûriyeyê gelekî lawaz e"
Serokê tîma Brîtanyayê ya Konseya Ewlehiyê Fergus Eckersley li ser mijarê got:
"Rewş li Sûriyeyê gelekî lawaz e û divê em vê derfeta pêşiya me bi kar bînin û gefa çekên kîmyewî ji bo her kesî ji holê rakin.
Brîtanya ji ber pevçûnên vê dawiyê yên li Sûriyeyê nîgeran e ku divê destûr neyê dayîn ku ew ber bi tundûtûjiyeke berfirehtir ve biçe.
Di vê dema krîtîk de em daxwazê ji hemû aliyan dikin ku xwe ji tundûtûjiyê dûr bixin.
Di civînê de bi Brîtanya re Fransa, Amerîka, Çîn û hema bêje hemû dewletên endam got ku divê çekên kîmyewî bi lez û bez ji holê werin rakirin.
"Mijara sereke hebûn û nebûna dewletê ye"
Lê Rusyayê li hemberî ve pêşniyariyê got ku di nav van pevçûn û aloziyên dawî de li Sûriyeyê mijara sereke ji bo birêvebiriya demkî çekên kîmyewî nîne ango hebûn û nebûna dewletê ye.
Nûnerê Rûsyayê yê Neteweyên Yekbûyî Vassily Nebenzia wiha anî ziman:
"Sûriye niha rûbirûyê çend pirsgirêkên hebûnê yên wekî hewcedariya yekîtiya serwerî, serxwebûn, yekparçeyiya axa xwe û yekitî xwe ye.
Her wiha dabînkirina lihevhatina niştimanî, avakirina bingeha dewleta nû, amadekarî ji bo hilbijartin û vegerandina yek bi hêzekê ye û bikaranîna vê hêzê ji bo dewletê û ji bo çareserkirina gefên komên terorîstiye jî.
Her wiha di van çend rojên dawî de, me nûçeyên gelek xemgîn ji Sûriyeyê bihîstin ku nîşan didin ku em gelekî dûrî aramkirina rewşa dewletê ne û di bin şert û mercên wiha zelal de gelo çekên kîmyewî hene an jî tine ne mijara sereke nîne ji bo birêvebiriya demkî.
Ango divê em ev î bizanin ku zêde vê mijarê pêşde dehf nedin."
Di aliyê din de jî, di civînê de Rêxistina Qedexekirina Çekên Kîmyewî (OPCW) û teknîkerên NYyê raporta xwe ya derbarê çekên kîmyewî parve kir û got ku di nav 26 dozên cuda de 19 doz hê nehatine çareserkirin û hê jî mayîndeyên çekên kîmyewî li Sûriyeyê hene û divê ev çek ji holê werin rakirin.
Di vê çarçove yê de wan soz daye birêvebiriya demkî ku wê bibin alîkar ji bo careserkirina vê meseleyê.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse