Hewlêr (Rûdaw) - Nêviyê Şêx Seîd yê bi navê Muhammed Sabir Firat bersiv da heqeratên Bahçelî yên li Şêx Seîd û Seyîd Riza kiribûn û got, “Ew li ba Xweda şehîd in lê bê guman tu ji wan kesan î ku Xweda ew kêm, nizm û zelîl kirine.”
Serokê MHPyê Devlet Bahçelî doh di komcivîna partiya xwe de, heqerat li rêberên Kurdan kiribû û gotibû, “Şêx Seîd û Seyît Riza xayînên wê demê ne, ew terorîstên cudaxwaz in.
Ew dijminê civat, komar û dewletê ne û wekî heq kirine hatin cezakirin.”
Endamê Desteya Birêvebir a Partiya Saadetê û nêviyê Şêx Seîd parêzer Muhammed Sabir Firat li ser hesabê xwe yê Xê nerazîbûn nîşanî heqeratên Bahçelî da.
"Şêx Seîd û Seyîd Riza şehîd in lê tu zelîl î"
Muhammed Sabir Firat ji Bahçelî re wiha got:
“Em heqaretên ku te li Şêx Seîd Efendi û Seyîd Riza kirine li te vedigerînin. Ew li ba Xweda şehîd in lê bê guman tu ji wan kesan î ku Xweda ew kêm, nizm û zelîl kirine.
Ji vê çîroka Sadî Şîrazî dersê bistîne:
Kesê ku qenciyê dike xirabî nayên serê wî û kesên ku xirabiyan jî dikin ew û qencî rastî hev nayên.
Serê ku bi xirabiyê difikire di rêya xirab re diçe û wekî dûpişkan zêde di qula xwe de namîne.
Eger di dilê te de fikra qenciyê nebe, yan tu yan kevir, ti ferq nîne!
Hevalê min ê dilnizm, min xeletî kir ku xirabî dişiband kevir. Ji ber ku kevir, hesin û tûnc jî bi kêr in.
Mirovên wiha xirab bimirin baştir e, bihêle bila ew bimirin.
Her mirov ji heywanan ne çêtir û bi qîmettir re. Bi ya min baştir e li şûna ku mirov bi kesekî xirab re bijî bi heywaneke hov re bijî.
Ji ber ku mirovên xirab ji heywanên herî hov kêmtir û riswatir in.
Yên ku tenê xwarin, vexwarin û razanê wekî marîfet dihesibînin, çawa dikarin ji heywanan bi qîmettir bin!
Peyayekî ku bi rê dizane berî hespsiwarê ku bi rê nizane û rêberê wî nîne digihe cihê xwe.
Yê ku tovên qenciyê biçîne, dê bigihêje bêndera aştî û bextewariyê.
Min di jiyana xwe de ti carî nebihîstiye ku mirovekî xirab bi rengekî baş hatiye bibîranîn."
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse