Rojhilata Navîn
Sînorê Îranê li gel Başûrê Kurdistanê li aliyê Şûşmê, 6 Kanûna 2019. Wêne: Fazil Hewramî / Rûdaw
Hewlêr (Rûdaw) – Hêza Pasevanên Sînor a Îranê ragihand, dê sîstema kontrol û çavdêriya elektronî li tevahiya sînorên wî welatî li gel Tirkiyê û Iraqê (sînorê Rojhilatê Kudistanê li gel Bakur û Başûrê Kurdistanê) bê danîn.
Fermandarê Giştî yê Pasevanên Sînorê Îranê, Ehmed Elî Guderzî îro Yekşemê 15ê Mijdara 2020an serdana navçeyên sînorî yên parêzgeha Urmiyê li gel Başûrê Kurdistanê kir û ragihand, ew dê di dema 5 salan de projeya kontrola elektronîkî ya sînoran cîbicî bikin û bi wê yekê ew dê rê li her core çûn û hatineke neyasayî li sînorên Îranê bigirin.
Ehmed Elî Guderzî amaje bi pevçûna roja Înê ya li sînorê parêzgeha Urmiyê ya di navbera hêzên Îranê û hêzeke çekdar a dijberê rejîmê de kir û gef xwar, ku ew dê toleke dijwar hildin.
Wî rayedarê serbazî yê Îranê got, “em dê toleke dijwar li wan kesan hildin ku du efser û serbazekî pasevanên sînor kuştin û du kesên din jî birîndar kirin.”
Roja Înê 13ê Mijdara 2020, hikûmeta Îranê ragihandibû, ku pevçûneke çekdarî di navbera hêzên pasevanên sînor ên wî welatî û komeke çekdar de, ku weke “komeke çekdarên dijberê şoreşê” bi nav kiribû, li navçeyeke sînorî ya bajarê Urmiyê yê Rojhilatê Kurdistanê derketiye û di encamê de 3 kes ji hêzên pasevanên sînor hatine kuştin û 2 serbaz jî birîndar bûne.
Heta niha ti aliyekî berpirsiyariya wî şerî û kuştina efser û serbazên Îranê li xwe negirtiye.
Supaya Pasdaran a Îranê jî di daxuyaniyekê de ragihandiye, ji roja Şemiyê ve bi sedema kuştina wan serbazan, hêzên wan dest bi topbarankirina navçeyên sînorî yên parêzgeha Urmiyê kiriye û binkeyên partiyên Rojhilatê Kurdistanê kirine armanc, lê partiyên Rojhilatê Kurdistanê di vê bareyê de tiştek negotine.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse