Amed (Rûdaw) - Li navçeya Sûrê hêj qedexe berdewam dike. Li navçeya qedexekirî cenazeyên 2 ciwanên ku ji aliyê polîsan ve hatine kuştin li kolanan mane û Parêzgariya Amedê destûr nade ku malbat biçin cenazeyên xwe ji wê derê werbigrin. Ji ber vê yekê malbat îro derketin pêşberî çapemeniyê û li hemberî walîtiya Amedê nerazîbûn nîşan dan.
Li navçeya Sûrê ya Amedê 28 roj in ku qedexeya derketina derve berdewam dike. Di şer û pevçûnên di navbera polîs û endamên YDG-Hê de ciwanên bi navê Îsa Oran û Mesût Sevîntek hatin kuştin.
Ji heftiyekî zêdetir e ku cenazeyên wan 2 ciwanan li ber deriyê mizgefta Kurşunliyê li benda binaxkirinê ye.
Malbatên Îsa Oran û Mesûd Sevîntek li Komeleya Mafên Mirovan a Amedê daxuyaniyek dan çapemeniyê.
Mehmet Oran bvê Îsa Oran wiha got:
“Polîsan wenêyên cenazeyên xizmên me kişandine û ev wêne di çapemeniyê de hatin belav kirin. Em ji Serokomar Erdogan û Serokwezîr Davutoglu dipirsin, ka we digot em ji ber ku Xwedê mirov xuliqandine em ji mirovan hez dikin. Ka hezkirina we? Cenazeyê kurê min heftiyeke li derve, li ber sir û seqemê ye. Çima hûn destûr nadin ku em cenazeyên xwe ji kolanan bigrin. Ma ev e mirovahî û oldariya we?”
Malbat dibêjin Walitîya Amedê destûr nade ku ew cenazeyên xizmên xwe ji wir derxin û li hemberî helwesta walîtiya Amedê nerazî ne.
Ji xeynî malbatên Îsa Oran û Mesûd Sevintek, malbatên ku ji ber şer û pevçûnan ji Sûrê koçber bûne jî beşdarî daxuaniyê bûn.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse