Goristanên Êzdiyan li Efrînê têne têkdan

Hewlêr (Rûdaw) - Grûpên çekdar yên opozisyona Sûriyê ku girêdayî Tirkiyê ne binpêkirinên xwe li dijî Kurdên Êzidî yên herêma Efrînê zêde kirine. Li gundê Tirindê, li başûrê Efrînê, naverasta meha Nîsanê, bi dehan gorên Kurdên Êzdî hatine xirabkirin.

Gundê Kîmarê yê herêma Efrînê ya Rojavayê Kurdistanê,  yek ji gundê ku caran bi Kurdên Êzidî şên bû. Niha hejmareke pir kêm Êzidî li nav gund mane. Ew hejmara kêm jî wekî hemû Kurdên Êzidî li herêmê rastî binpêkirinên zêde tên.

Rêveberê Saziya Êzdîna Elî Îso, ji Tora Medyayî ya Rûdawê re got, grûpên çekdar ên opozisyona Sûriyê binpêkirinên xwe li dijî Kurdên Êzidî û war û pîroziyên wan zêde kirine.

Li gundê Tirindê, li başûrê Efrînê, naverasta meha nîsan bi dehan gorên Kurdên Êzidî hatine têkdan. Ew navçe di jêr destê çekdarên Ceyiş el-Îslam de ye.

Roja 14ê Gulanê, hejmarek Erebên Hawirde ji parêzgeha Idlibê, li herdu Kurdên Êzidî, Fethî Izet Berekat û Berekat Izet Berekat li gundê Basofanê dane.

Roja 30 nîsanê, her li gundê Basofanê çekdarên opozisyona li welatiyê xwedan pêdawîstiyên taybet Hesen Nebo, 49 salî, dane.

Dadgeheke tawanan a Efrînê, 6 sal zindan li ser jina Kurd a Êzidî Xezale Selo sepandine bi tohmeta hewla kuştina fermandarekî Feyleq el-Şam.

Mafnas Ibrahîm Ebdulrehman, endamê Saziya Êzdîna, ku bi xwe xelkê herêma Efrînê ye û binpêkirinên li dijî xelkê herêm belge dike, ji Tora Medyayî ya Rûdawê re got, metirsiyeke mezin li ser Êzidiyên herêmê heye.

Mezargeha Şêx Rikab ku li gundê Şadêrê ye, ji sala 2019an ve, li ser destê grûpên çekdar hatiye têkdan. Ew yek ji 15 mezargehên Kurdên Êzidî li Herêma Efrînê ye ku piraniya wan hatin wêrankirin û jinavbirin.

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger