Herêma Kurdistanê û UNFPA belgenameyeke hevtêgihîştinê îmze kirin

Hewlêr (Rûdaw) - Fermangeha Medyayê û Zanyariyan a Hikûmeta Herêma Kurdistanê roja Yekşemê belgenameyeke hevtêgihîştinê ligel Sindoqa Neteweyên Yekbûyî ya Nifûsê (UNFPA) jibo bidawîanîna tundiya li ser binyatê zayendê û pişkdariya ciwanan li Herêma Kurdistanê îmza kir.

Serokê Fermangeha Medyayê û Zanyariyan û Berdevkê Hikûmeta Herêma Kurdistanê Cotyar Adil û Nûnera UNFPA Rita Columbia doh 3ê Nîsanê di merasimekê de ew belgeya hevtêgihîştinê îmze kirine.

Berpirsê Fermangeha Peywendiyên Derve ya Hikûmeta Herêma Kurdistanê Sefîn Dizeyî jî di merasîmê de amade bûye.

Piştî îmzekirina belgeyê, herdu aliyan daxuyaniyeke nivîskî ya hevbeş dan.

Li gor daxuyaniyê, “ev hevkariya nû-avakirî dê rê bide DMI & UNFPA ku hişyariyê li ser rêgirtin û bersivdana tundûtûjiya li ser bingeha zayendî, li ser mafên jinan bilind bikin û bijarteyên saxlem û agahdar ji bo ciwanên li seranserê Herêma Kurdistanê pêşve bibin.”

Di çarçoveya belgeya hevtêgihîştinê de, “Fermangeha Medyayê û Zanyariyan (DMI) û Sindoqa Neteweyên Yekbûyî ya Nifûsê (UNFPA) dê bi hev re kampanyayên piştevaniyê yên hevbeş li dar bixin û piştgirî bidin belavkirina dane û destwerdanên ku tekezî dikin li ser xelkê.”

Belgeya hevtêgihîştinê herwisa dê planên hevkariyê di navbera her du aliyan de bi pişkdarî û çalakiyên hevpar ve destnîşan bike.

 

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger