Tara Mamedovayê albûma xwe ya bi navê ‘Lîlav’ parve kir / Wêne: Medyaya civakî
Hewlêr (Rûdaw) - Hunermend û stranbêja Kurd a ji Qirxizistanê Tara Mamedovayê albûma xwe ya bi navê Lîlav li ser hemû platformên dîjîtal ên muzîkê belav kir.
Albûma “Lîlav”ê bi hevkariya Tara Mamedova û Vellúa Project hatiye amadekirin.
Lîlav ji 6 stranan pêk tê û beriya niha 3 stranên wê wekî single hatin belavkirin û niha jî 3 stranên ku mabûn, bi navê Eger, Xayintî û Kêla Min derketin û albûm temam bû.
“Muzîk dibe derferta şînbûna xweşiyan”
Çima navê wê Lîlav e? Tara Mamedovayê li ser vê ji Rûdawê re wiha got:
“Lîlav ava berfê ye, berf dihele û tevlî sûlavan dibe û diherike avên mezintir.
Hestên min jî dibin gotin, gotin dibin hevok û ew hevok dibin stran û digihin hezkirên min.
Di temamê vê rêwîtiyê de çawa ku Lîlav li ser rêya xwe jiyanê dide kulîlk û ax û temamê zîndeweran, muzîk jî xwe digihîne hestê mirovan û dibe sedema şînbûna xweşiyekê.”
Albûma min a nû “ Lîlav” dê 29.11.2024, roja înê 🕣 17:00î de li ser kanala min a YouTub’ê û hemû platformên dijîtalê de di weşanê de bê.
— Tara Mamedova (@taramamedova) November 27, 2024
Di vê rêwîtîyê de aktorên sereke ne tenê ez bûm. Haval Haco û Joye Haco rih bûn. Ez gelek sipasîya wan dikim🙏❤️ pic.twitter.com/p35LvnZ594
Tara Mamedova li gel Joe Haco û Heval Haco muzîkên albûmê amade kirine û gotinên stranan jî dîsa yên Tara Mamedova, Bedia Haco, Osman Hemo û Silêman Temo ne.
Tara Mamedova kî ye?
Muzîkjena Kurd û ciwan Tara Mamedova, li Qirgizistanê hatiye dinê. Heta 8 saliya xwe li wir jiyaye.
Dema Sovyet belav dibe, malbata wê koçî bajarê Saratovê yê Rûsyayê dike. Heta sala 1999an li Saratovê dijî.
Destpêka salên 2000î ji bo dersên dans, şano û muzîkê diçe bajarên Moskow û Yaroslavê.
Malbata Tara Mamedova sed sal berê ji Bazidê koçî Sovyetê kiriye.
Mamedova bi piştgiriya dayika xwe ya mamoste Gorçek Abdûlayevnayê berê xwe dide hunerê.
Dayika wê jî digel mamostetiyê, stranên Rûsî distirê.
Hunermenda ku di zarokatiya xwe de bi heyranî li dayika xwe guhdar dikir, dîsa bi rêvebirya dayika xwe beşdarî gelek kursên hunerî dibe.
Di wan salên destpêkê de, ji bo ku xwe û hunera xwe bi pêş bixe berê xwe dide Fransayê.
Tara Mamedova di sala 2008an de, li Parîsê di konservatûarekê de perwerdeyê dibîne. Di wê navberê de, li kolanên Parîsê pêrgî komên muzîkê yên cazê dibe.
Tara Mamedova, vê muzîkê , muzîka Rûsî ya Ramansî û ya Kurdî têkel dike. Deh salan bi vî awayî li Parîsê dijî.
Ew êdî digihêje wê baweriyê ku divê di muzîka xwe de rengvedaneke bi vî awayî çê bike. Li ser vê bawerî û bingehê, wekî muzîkjenekê vedigere welatê xwe yê ku sed sal berê jê koç kiribû .
Di sala 2005an de yekem albuma xwe ya bi navê “Ax”ê belav dike.
Di komxebata xwe ya duyem de, performansa xwe ya zindî bi kar tîne. Van xebatên xwe li platformên dijîtal belav dike.
Di xebata sêyem ‘”Live”ê de, stranên bi zaravayê Kirmanckî (Zazakî) jî li repertuara xwe zêde dike.
Mamedovayê di serî de li Stenbol, Amed, Wan û gelek bajarên din gelek konser dane.
Ji ber ku di nava çandeke pirrengî de jiyaye, muzîka xwe jî li ser vê bingehê tomar dike.
Hunermenda ku li ser vê baweriyê karê xwe beredewam dike, ne tenê bi zimanê xwe, herwiha bi zimanên cuda cuda distrê.
Ew niha li Tirkiye dijî û zewicî ye û keçeke wê bi navê Elenya heye.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse