Wezîrê Eşo ji bo pêşxistina edebiyata Kurdî kedeke mezin da

Hewlêr (Rûdaw) - Wezîrê Eşo ku ji bo pêşvebirina edebiyata Kurdî xebateke mezin kir, gelek berhemên giranbiha li pey xwe hiştin.

Nivîskar û dîrokzanê Kurdê Êzdî Wezîrê Eşo ala 1934an li Tiblîsî ya paytexta Gurcistanê ji dayik bû.

Apê Wezîr kedeke mezin da ji bo pêşvebirina çand û edebiyata Kurdî li Ermenistan û Yekîtiya Sovyetê ya Berê.

Wî gelek berhemên hêja li pey xwe hîştin, ku ev hinek ji wan e: Mizgînî - Dengbêj kal bibû - Pamp-Sîpan - Dosya Barzanî Sandoqa Stalîn ya Polayî de - Pariyê berdemayî - Kurdzanê Mezin Qanatê Kurdo - Simoyê Şemo: Jiyan û kar û gelek berhemên din.

Herwiha piştî wefata wî jî hin berhemên wî hatin çapkirin wek: Pirtûkên Kurdî li Ser Kurdan - Li Ermenistanê û 5 pirtûkên wî ji aliyê Weşanxaneya Lîsê ve li Ameda Bakurê Kurdistanê derketin: Sîber – Qirme- Tosinê Ûşan –Îtbarî û Hosta Hovannes.

Eşo di warê wergervaniyê de jî xizmeta pêşxistina wêjeya Kurdî kir û gelek berhemên nivîskarên Rûs û Ermenî bi wergerên xwe kirin mal û milkê xwînerên Kurd wek: Têmûr û koma wî - Xebera Dosta – Lêkolîna Xaçatûr Abovyan a Kurd û Êzdî û hin wergerên din.

Apê Wezîr xizmeta şanogeriya Kurdî jî kir. Di vî warî de jî em dikarin navê van berhemên wî bînin ser zimaên : Tîgran û Mehmûd - Koçeke derewîn û hin şanoyên din.

Apê Wezîr di roja 23ê Çileya Paşîn a sala 2015an de, di 81 saliya xwe de li Brûksela paytexta Belcîkayê wefat kir û li warê xerîbî û xurbetê bi axa sar hat spartin.

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger