Berlîn (Rûdaw) - Lîstikvan û aktorên navdar di hevpeyvînekê de ligel Rûdawê kêfxweşiya xwe ya ji bo beşdarbûna estîvala Fîlman a Navneteweyî ya Berlînê (Berlinale) anîn ziman.
74emîn Festîvala Fîlman a Navneteweyî ya Berlinaleyê li Berlîna paytexta Almanyayê bi rê ve diçe.
Berlînale, yekemîn festîvala mezin a fîlman a Ewropayê ya îsal, roja Pêncşemê dest pê kir û dê deh rojan berdewam bike.
Di çarçoveya festîvalê de derdora 200 fîlm ji hemû cureyan tên nîşandan.
Lîstikvan û aktorên navdar ên cîhanê ji Rûdawê re axivîn.
Lîstikvana navdar a Spanî Greta Fernandez ji peyamnêra Rûdawê Peyam Serbest re axivî û got, “Ez ji festîvalê hez dikim, ez pênc sal berê ji bo fîlmeke din li vir bûm, niha ez cardin vegeriyam.
Ev ji bo min mîna xewnekê ye, li dora gelek lîstikvanên xweşik û bêhempa. Em bi vê fîlma tirsnak li vir in. Ev ji bo me demeke taybet e.
Nizanim heta niha min film nedîtiye, tenê dixwazim tam jê wergirim û matmayî bimînim, ez ji atmosferê pir hez dikim û ez bawer im dê jê hez bikim ji ber ku ez bi derhênerekî bêhempa re me.”
Sebastian Stan lîstikvanê Romanî-Amerîkî ji Rûdawê re got, “Mirovên li vir pir baş in, mirovên ku min ev demek dirêj e nedîtine hene, gava ku hûn yekî ku we heft sal berê nas kir, bibînî, zehmet e ku meriv zanibe ew kî ye.
Ez difikirim ku yekem filma ku min demek dirêj berê li vir dît `Shutter Island` bû. Ez tenê karîbûb herim şanoyê. Ew bi rastî ezmûnek bandorker bû. Ji ber vê yekê fikra ku ez tenê li vir bi filma ku ez tê de beşdar bûm bê guman pir taybet e.
Ew pir taybet e û ez pir kêfxweş im ku ew çend kes li vir in. Aron, derhênerê me, xwest ku wê pir taybetî bike. Adam û lîstikvana me lîstikvanên pir baş bûn.”
Derhêner Aaron Schimberg got, "Ez difikirim ku ev festîvala herî baş a cîhanê ye û ez serbilind im ku li vir im."
Li ser pirsa Rûdawê ya “Hûn bi fîlima xwe li vir in, pêşbîniya we çi ye?” Aaron Schimberg wiha bersiv da, “Pêşbîniyên min nînin, ez hêvî dikim ku her kes jê hez bike, em bibînin ka ew dê çi bibe.”
Aaron Schimberg li ser giringiya festîvalê wiha axivî, “Ez difikirim ku ev festîvala herî baş a cîhanê ye û ez kêfxweş im ku li vir im, ez nikarim bawer bikim ku ez li vir im.”
Şaredarê Berlînê Kai Wegner di vekirina festîvalê de axivî û diyar kir ku Berlînale ji festîvalekê wêdetir e û got, "Berlinale tê wateya cihêrengî, azadî, demokrasî, kozmopolîtîzm û hevahengiyê."
Lîstikvanê navdar ê Brîtanî Adam Pearson ji Rûdawê re axivî û hestên xwe yên derbarê festîvalê de wiha anî ziman:
Ev tiştek pir bêhempa ye, ez yekem car e li vir im û ez kêfxweş im ku mirov li fîlmê temaşe dikin. Nizanim wê du saetên din çawa derbas bibin, ez ji aliyekî ve dudil û ji aliyê din ve jî serbilind im.
Ji bo min rûmet e ku ez li vir im, em di pêşbaziyê de ne û em nizanin ka em ê xelatê bistînin an na.
Malbata min li vir e û pir xweş e, ji bo min rûmet e ku ez li vir im.”
Li ser pirsa nûçegihana Rûdawê ya “Li Kurdistanê gelek heyranên te hene, tu dixwazî ji bo wan tiştekî bibêjî?” Pearson wiha bersiv da:
“Hesteke pir xweş e, ez hêvî dikim ku mirov ji fîlima min hez bikin, ew dê pir xweş be. Ger ew jê hez nekin, ez dikarim çi bikim? Ya herî girîng, ez li vir im. Gelekî sipasiya we dikim”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse