Mela Nûriyê Hesarî zimanzan û hozanvanekî navdar ê Rojavayê Kurdistanê bû
Hewlêr (Rûdaw) – Mele Nûriyê Hesarî ku bi navê Perîşan jî naskirî ye, yek ji helbestvanên Rojavayê Kurdistanê yê bi navûdeng bû û di berhem û helbestên xwe de wî girîngiyeke mezin dida zimanê Kurdî.
Zimanê Kurdî dêrîn, resen û şêrîn e. Tevî hemû astengî û dijwariyên li ber zimanê Kurdî, lê ew ji nav neçû. Zimanê Kurdî bûye mijara gelek nivîsar û helbestên helbestvanên Rojavayê Kurdistanê ku di berhemên xwe de behsa giringiya wî kirine.
Mela Nûriyê Hesarî zimanzan û hozanvanekî navdar ê Rojavayê Kurdistanê bû. Di piraniya berhem û helbestên xwe de cihekî herî xuya û balkêş dida zimanê Kurdî û ew wek jêder û dayika piraniya zimanên cîhanê didît.
Mela Nûrî diyar dike ku li navçeyê, zimanê Kurdî ne zimanekî nû û bê bingeh e, lê yek ji zimanên herî orijînal û kevnar e. Di demekê de ku gelek ziman ji holê radibin û namînin, zimanê Kurdî her li ber xwe daye û xwe ji mirin û nemanê rizgar kiriye.
Hesarî zimanê Kurdî dişibîne aleke bilind li ser deşt û şax û çiyayên Kurdistanê ku her li ber çav e û winda nabe. Ew dibêje ev ziman ji devê qehreman û gernasên Kurd ên nava dîrokê derketiye û ewqasî rewan û şêrîn e ku divê xort û keçên Kurd bê derengî xwe fêrî xwendin û nivîsîna wî bikin û pê serfiraz bin.
Di dîwana xwe ya “Zeviyek Gazîdan” de, li jêr navê (Li Ser Zimanê Kurd), Mele Nûrî wiha dibêje:
Di qadê de pirî kûr e
Bi gêr û rêzik û tax e
Zimanek mak û tenha ye
Ne tirh û katik û şax e
Gelê Arî bi wî peyvîn
Di cîhanê gelek çax e
Bi wî hate nivîsandin
Bi tîp û rûpelên nûr e
Pelokên Zend û Avesta
Bi cenga xencer û şûr e
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse