Hewlêr (Rûdaw) - Filmê derbarê jiyan û têkoşîna siyasetmedara Kurd Aysel Tugluk de ku bi navê “Aysel” hatiye amadekirin hat weşandin.
Di çarçoveya projeya “Ji Bo Aştiyê Dengê Jinê” ya Komeleya Piştgirî û Wekheviyê SESê de rojnamevan Mehveş Evin û derhêner Nesrin Olmez derbarê jiyan û têkoşîna siyasetmedara Kurd Aysel Tugluk de filmekî kurt bi navê “Aysel” amade kirine û 9ê Kanûna 2022ê weşandin.
Di film de çîroka Aysel Tugluk tê pêşandan ku niha rûbirûyê nexweşiya Demansê ye û tê gotin ev çîroka Tugluk çîroka vî welatî ye. Di filmê “Aysel” de hevkar û hevalên Tugluk Eren Keskin, Sirri Sureyya Onder, Reyhan Yalçindag û Ahmet Turk jî bîranînên xwe yên ligel wê anîne ziman û derbarê jiyana wê de hûrgiliyên nayên zanîn hatine pêşandan. Di şexsê Tugluk de têkoşîna jinên Kurd di warê siyasî û civakî de jî hatiye pêşandan û rola wan di aştiyê de hatiye behskirin. Mûzîkên filmê kurt ji aliyê Ezgi Sevgi Can û Çinar Aksoy hatine amadekirin.
Hevseroka berê ya Partiya Civaka Demokratîk (DTP) û siyasetmedara Kurd Aysel Tugluk ji sala 2016an ve di Girtîgeha Tîpa F a Kocaeliyê de girtîbû û nexweşa demansê (jibîrçûnê) bû. Piştî Saziya Pizîşkiya Dadî ya Tirkiyê biryara “nikare di girtîgehê de bimîne” da, 27ê Cotmeha 2022ê bi biryara Dadgeha Înfazê ya Tirkiyê hat azadkirin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse