رووداو دیجیتاڵ
وەزیری دەرەوەی عێراق لەگەڵ یاریدەدەری وەزیری بەرگریی ئەمریکا بۆ کاروباری سیاسی کۆبووەوە.
رۆژی سێشەممە 26ی ئاداری 2024، وەزارەتی بەرگریی ئەمریکا – پێنتاگۆن لە راگەیێندراوێکدا بڵاویکردەوە، ساشا بەیکەر، یاریدەدەری وەزیری بەرگریی ئەمریکا لە پێنتاگۆن پێشوازی لە فوئاد حوسێن، وەزیری دەرەوەی عێراق کرد.
لە راگەیێندراوەکەی وەزارەتی بەرگریی ئەمریکادا هاتووە، "یاریدەدەری وەزیری بەرگری و فوئاد حوسێن بەرژەوەندییە هاوبەشەکانی عێراق – ئەمریکا، پابەندبوون بە سەروەری و ئاسایشی عێراق و بەهێزکردنی هاوبەشییە دوولایەنیەکانیان لە چوارچێوەی رێککەوتنی ستراتیژی دووپاتکردەوە."
ساشا بەیکەر، بەگوێرەی راگەیێندراوەکەی وەزارەتی بەرگریی ئەمریکا، سوپاسی هەوڵەکانی عێراقی بۆ پاراستنی هێزە عێراقییەکان، ئەمریکییەکان و هێزەکانی هاوپەیمانان کردووە.
یاریدەدەری وەزیری بەرگریی ئەمریکا ئاماژەی بەوەش کردووە، "گرووپە میلیشیاکانی نزیک لە ئێران" کاریگەریی لەسەر هەوڵەکانی "دژی تیرۆریستان دروست دەکەن و بوارێکی فراوانتر بە رێکخراوی داعش دەدەن کە جموجووڵیان هەبێت و ژیانی خەڵکی سڤیل بخەنە مەترسییەوە."
هەر دوێنێ سێشەممە، فوئاد حوسێن لە واشنتن لەگەڵ ئەنتۆنی بلینکن، وەزیری دەرەوەی ئەمریکا کۆبووەوە.
دوای کۆبوونەوەکە، وەزارەتی دەرەوەی ئەمریکا راگەیێندراوێکی بڵاوکردەوە و رایگەیاند، "هەردوو وەزیری دەرەوە باسیان لە هاوکارییەکان لە بواری پرسە ئەمنی، ئابووری، سیاسی و دیپلۆماسییەکان بە گوێرەی رێککەوتنی ستراتیژیی ئەمریکا و عێراق کرد؛ هەروەها باسیان لە کۆبوونەوەی داهاتووی لیژنەی باڵای هاوئاهەنگی ئەمریکا و عێراق و کۆبوونەوەی محەممەد شیاع سوودانی، سەرۆکوەزیرانی عێراق لەگەڵ جۆ بایدن، سەرۆکی ئەمریکا لە 15ی نیساندا کرد."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ