ماتیو میلەر و دیار کوردە.
رووداو دیجیتاڵ
وەزارەتی دەرەوەی ئەمریکا دەڵێت، نیگەرانن لەبارەی سەلامەتی و ئاسایشی هاووڵاتیانی ئەمریکی لە ناوچەکە و دەڵێت، هەنگاو دەنێن بۆ ئەوەی دڵنیا ببنەوە لەوەی "توانامان هەیە وەڵامی گونجاوی ئەو هێرشانە بدەینەوە" کە لە عێراق و ناوچەکەدا دەکرێنە سەر بنکە و بەرژەوەندییەکانیان.
رۆژی دووشەممە، 23ـی تشرینی یەکەمی 2023، ماتیو میلەر، گوتەبێژی وەزارەتی دەرەوەی ئەمریکا لە کۆنفڕانسێکی رۆژنامەڤانیدا بە دیار کوردە، بەرپرسی نووسینگەی تۆڕی میدیایی رووداوی لە واشنتن راگەیاند: "باڵیۆزخانەکەمان لە بەغدا و کۆنسوڵخانەکەمان لە هەولێر کراوەن و پابەندین بە هاوبەشییە ستراتیژییەکەمان لەگەڵ عێراق و هەروەها بەردەوامیش دەبین لە کاکردنمان لە کۆنسوڵخانەکەمان بۆ بەهێزکردنی هاوبەشیمان."
گوتەبێژی وەزارەتی دەرەوەی ئەمریکا دەشڵێت، "نیگەرانین لەبارەی سەلامەتی و ئاسایشی هاووڵاتیانی ئەمریکی و هەروەها بەرژەوەندییەکانمان لە ناوچەکەدا، بۆیەش ئاستی هۆشدارییەکەمان بەرزکردەوە."
ماتیو میلەر گوتیشی، "هێرشی گرووپە چەکدارەکان شتێکە کە تەواو نیگەرانین لەبارەیەوە.. و هەنگاو دەنێین بۆ دڵنیابوون لەوەی توانامان هەیە وەڵامی گونجاوی ئەو هێرشانە بدەینەوە."
ئەوە لەکاتێکدایە، دوای دەستپێکردنی شەڕی نێوان چەکدارانی بزووتنەوەی حەماس و سوپای ئیسرائیل لە 7ـی ئەم مانگە و پاڵپشتیکردنی ئیسرائیل لەلایەن ئەمریکییەکانەوە، گرووپە چەکدارەکانی نزیک لە ئێران بەردەوام هەڕەشەی ئەوە دەکەن لە هێزەکانی ئەمریکا لە ناوچەکە بەئامانج دەگرن.
رۆژی 22-10-2023 سەرچاوەیەکی سەربازی لە بنکەی سەربازی عەین ئەسەد بە تۆڕی میدیایی رووداوی راگەیاند: "بەرەبەیانی ئەمڕۆ نزیکەی کاژێر 01:30، هێرشکرایە سەر بنکەی ئاسمانیی عەین ئەسەد".
لە 18ـی تشرینی یەکەمەوە، هێزەکانی ئەمریکا و هاوپەیمانیی نێودەوڵەتیی دژی داعش لە بنکەی ئاسمانیی عەین ئەسەد لە ئەنبار، بنکەی ئاسمانیی هەریر لە شاری هەریری سەر بە پارێزگەی هەولێر و لە بنکەیەکی سەربازیی نزیک فڕۆکەخانەی بەغدا، رووبەڕووی هێرش بوونەتەوە.
لە کۆتایی ساڵی 2021، عێراق رایگەیاند ئەرکی هێزە شەڕکەرە بیانییەکان لە وڵاتەکەی کۆتایی هاتووە و ئەرکی هاوپەیمانیی نێودەوڵەتی گۆڕاوە بۆ راوێژپێدان و مەشقپێکردنی هێزە نێوخۆییەکان. لەو چوارچێوەیەشدا، دوو هەزار و 500 سەربازی ئەمریکی و هەزار سەربازی دیکەی هاوپەیمانیی نێودەوڵەتی لە سێ بنکەی سەربازی و ئاسمانیی عێراق و هەرێمی کوردستان ماون.
ویلایەتە یەکگرتووەکانی ئەمریکا چەندینجار دووپاتیکردوەتەوە بە هەموو شێوەیەک پاڵپشتی لە ئیسرائیل دەکات بۆ سەرکەوتنی لەو ئۆپەراسیۆنە سەربازییەدا کە تەلئەڤیڤ دەڵێت، ئامانج لێی کۆتاییهێنانە بە دەسەڵاتی حەماس.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ