رووداو دیجیتاڵ
سەرۆکی گرووپی ڤاگنەری نزیک لە رووسیا کۆنترۆڵکردنی تەواوی شاری باخمووتی راگەیاند کە بە درێژترین و خوێناویترین شەڕ و پێکدادان لە ماوەی زیاتر لە ساڵێکی شەڕ لە ئۆکراینا دادەندرێت.
رۆژی شەممە، 20ـی ئایاری 2023، یەڤگینی پریگۆژین، سەرۆکی گرووپی ڤاگنەر لە پەیامێکی ڤیدیۆییدا لەگەڵ ژمارەیەک فەرماندەی هێزەکانی بە ئاڵای رووسیا و گرووپەکەیانەوە دەرکەوتن و کۆنترۆڵکردنەوەی تەواوی شارەکەیان راگەیاند.
سوپای ئۆکراینا هەر زوو راگەیەندراوێکی بڵاوکردەوە و رەتیکردەوە شارەکە بە تەواوی کەوتبێتە دەستی گرووپەکە و سوپای رووسیا. هیچ کام لە میدیای رۆژئاوا نەیانتوانیوە کەوتنی باخمووت پشتڕاستبکەنەوە. هاوکات، لە گرتە ڤیدیۆیەکەی سەرۆکی ڤاگنەریش دەنگی تەقە و تەقینەوە لە دوورەوە دەبیسترێت.
پریگۆژین رایگەیاند، "کاژێر2ی نیوەڕۆ باخمووت بەتەواوی کۆنترۆڵکرا" و گوتی 25ی ئایاری ئەمساڵ باخمووت رادەستی سوپای رووسیا دەکەن.
ڤاگنەر کۆمپانیایەکی کەرتی تایبەتە و بە کرێ شەڕ بۆ رووسیا دەکەن بەڵام بەو مەرجەی چەک و تەقەمەنیان پێبدرێت. لە چەند وڵاتێکی دیکەشدا، بەرامبەر پارە ئەرکی پاسەوانی بۆ کۆمپانیا زەبەڵاحەکان دەکەن.
رۆژی 5ـی ئایاری ئەمساڵ پریگۆژین لە گرتەیەکی ڤیدیۆییدا لەنێو تەرمی چەکدارەکانی زۆر بە توڕەیی دەرکەوت و هەڕەشەی کشانەوەی هێزەکانی کرد ئەگەر تا 9ی ئایار چەکیان پێنەدرێت.
نازانرێت هەڕەشەی کشانەوەی ڤاگنەر تاکتیک بووە یاخود بەڕاستی ئەو هێزانە چەکیان لێبڕاوە و لەگەڵ رووسیا لەسەر پڕچەککردن گەیشتوون بە رێککەوتن.
زیاتر لە شەش مانگە شەڕ و پێکدادان لە باخمووت بەردەوامە، باخمووت شارێکی دەوڵەمەند نییە بە کانزا و سەرچاوەکانی ژێرزەوی، بەڵام لەڕووی شەڕەوە ستراتیژییە و ئۆکراینییەکان وەکو سیمبوڵی بەرخودان ناوی دەبەن.
گرووپی ڤاگنەر ساڵی 2014 دامەزراوە و یەکێکە لە کۆمپانیا ئەمییە تایبەتەکانی رووسیا و رۆڵی گەورەی لەسەرخستنی پرۆسە سەربازییەکانی رووسیا لە سووریا و ئۆکراینا هەبووە، بەگوێرەی لێدوانێکی وەزارەتی بەرگریی ئەمریکا، گرووپی ڤاگنەر 50 هەزار چەکداری هەیە کە 10 هەزاریان گرێبەستن. مۆسکۆش رەتیدەکاتەوە بەفەرمی سەربازەکانی کۆمپانیای ڤاگنەر سەر بە ئەو بن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ