هەڵەیەک روویدا! دووبارە هەوڵبدە
.
رووداو دیجیتاڵ
کوردانی دیاسپۆرا دەستیان بە کامپەینی کۆکردنەوەی هاوکاری بۆ قوربانییانی بوومەلەرزەکان کردووە، یەکێک لەو شوێنانەی هاریکاریی لێ کۆکراوەتەوە شاری ڤۆلفسبۆرگە کە 80 تۆن کەلوپەل و 100 هەزار یۆرۆی تێدا کۆکراوەتەوە.
دەنیس ڤایلمان، سەرۆکی شارەوانیی گەورەی شاری ڤۆلفسبۆرگ باس لەوە دەکات "لەبەر ئەو رەوشەی هەیە، ئێمە زوو هەموو کۆمەڵە بەشدارەکانمان بانگهێشتی شارەوانی کرد و گفتوگۆمان کرد لەبارەی ئەوەی چۆن دەتوانین هاوکار بین و ویستمان زوو پاڵپشتی بکەین".
ئەو کوردانەی لەو شارە نیشتەجێن، بەتایبەتی کوردانی رۆژئاوای کوردستانن، بەشێکی سەرەکیی ئەو کەمپەینە بوون، بەڵام تەنیا کورد لەو کامپەینەدا بەشدار نەبوون، بەڵکو خەڵکی تورکیا و نەتەوەی دیکەش بەشدار بوون.
ئیرینا رێشکە، راسپێردراوی ئینتەگراسیۆنی شاری ڤۆلفسبۆرگ باس لەوە دەکات ئەو کارە بۆ ئەو تایبەت بووە، "من، شانازی بە هەموو ئەو کەسانەوە دەکەم، کە پاشخانی کولتووری و ئایینی جیاوازیان هەیە و یارمەتیدەر بوون".
بەنگین و هاوڕێکانی بەبێ ئەوەی هیچ رێکخراو و کۆمەڵەیەک هاوکارییان بکات، هاوکاریی: خۆراک، خواردنەوە و پێویستیی پاککردنەوەیان کۆکردووەتەوە و ئێستاش 11 بارهەڵگریان ئامادەن بۆ رەوانکردنیان. ئەوان چاوەڕوانن دەزگای خێرخوازیی بارزانی هەماهەنگییان بۆ بکات تاوەکو کۆمەکەکان بگەیەننە باکوور و رۆژئاوای کوردستان.
نەک تەنیا لە ئەڵمانیا، بەڵکو لە تەواوی وڵاتانی ئەوروپی هاووڵاتییانی کوردی دیاسپۆرا و رێکخرای هاوکاری و خێرخوازی بە شێوازی جیا هاوکاری و کۆمەکی دارایی و کەلوپەل بۆ قوربانییانی بوومەلەرزەکان دەنێرن.
بەپێی دوایین ئاماری فەرمیی تورکیا، تائێستا 35 هەزار و 418 کەس بەهۆی بوومەلەرزەکانی 6ـی 2ـی 2023 گیانیان لەدەستداوە، کە بە گوڕی 7.7 و 7.6 پلەی رێختەر روویاندا و ناوەندەکەیان مەرەشی باکووری کوردستان بوو. بوومەلەرزەکان لە رۆژئاوای کوردستان و سووریاش بەپێی دوایین ئاماری نەتەوە یەکگرتووەکان بوونەتە هۆی گیانلەدەستدانی 7396 کەس.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ