کۆنگرێسمانێکی ئەمریکی: رێککەوتنی کورد و دیمەشق دەستپێکێکی باشە

 

ئەبراهم حەمەدا، کۆنگرێسمانی ئەمریکی لە پەراوێزی بەشداریکردنی لە رێورەسمی یادی هەڵەبجە کە لە باڵەخانەی کانن (باڵەخانەی ئۆفیسی ئەندامانی کۆنگرێسی ئەمریکا) بە رووداوی راگەیاند کە خوازیارە ئەمریکا "رۆڵێکی گرنگ" بگێڕێت لە پاراستنی هاوپەیمانەکانی وەک کورد، کە لە شەڕی دژ بە داعشدا لەگەڵ ئەمریکا هاوکار بوون.

 

لەبارەی بە کشانەوەی هێزەکانی ئەمریکا لە سووریا، ئەو کۆنگرێسمانە گوتی کە "سەرۆک ترەمپ پابەندە بە بەرقەرارکردنی ئاشتی لە رۆژهەڵاتی ناوەڕاست و دەیەوێت دڵنیابێت لەوەی ئاشتی لەو ناوچەیە بەدیدێت." 

 

ئەبراهم حەمەدا روونیشیکردەوە کە هێزەکانی ئەمریکا هەرگیز بۆ "مانەوەی هەمیشەیی" نەچوونەتە سووریا، بەڵکو بۆ "رێگریکردن لە هەندێک ئەکتەری خراپ کە هۆکاری تێکدان و وێرانیین."

 

 

 

کۆنگرێسمان ئەبراهم: رێککەوتنەکەم نەخوێندووەتەوە، بەڵام وای دەبینم ئەمە دەستپێکێکی باش بێت بۆ ئێستا، ئێمە دەبێت لەوەتێبگەین کە پێویستە کوردەکان بپارێزین، بۆیەش دەمەوێت دڵنیاببمەوە بەرژەوەندییەکانی کورد پارێزراون، بۆیە دەڵێم، ئەمە دەستپێکێکی باشە بۆ ئێستا. ئێمە دەمانەوێت سووریایەکی یەکگرتوو ببینین، چیدیکە خوێنڕشتن و شەڕی نێوخۆمان ناوێت کە خەڵکێکی زۆری کردە قوربانی. بەداخەوە وێرانییەکی زۆری هێنا. بۆیەش، دەستپێکێکی باشە، بەڵام دەشزانم کە سازش و دڵنیایی زۆر هەیە دەبێت بکرێت بۆ پێکهاتەکانی دیکەش. بۆیەش دەمەوێت دڵنیابم لەوەی ئەمریکا رۆڵێکی گرنگی دەبێت لە پاراستنی هاوپەیمانەکانی وەک کورد، ئەوانەی لەشەڕی دژ بە داعش لەگەڵ ئێمەدا دابوون.

 

 

کۆنگرێسمان ئەبراهم: من بەناوی سەرۆک ترەمپەوە قسە ناکەم، بەڵام سەرۆک ترەمپ، وەک خۆشت دەزانیت پابەندییەکی دەربڕیوە بۆ بەرقەرارکردنی ئاشتی لە رۆژهەڵاتی نێوەڕاست. بۆیەش دەیەوێت دڵنیابێت کە ئاشتی لەو ناوچەیە بەدیدێت. خۆشی دەزانێت باشترین بڕیارە لەبارەی هێزەکانمان بدات. ئەو هێزانە هەرگیز بۆ مانەوەی هەمیشەیی نەچوونەتە ئەوێ، بەڵام دەبێت لە پەیوەندییەکانیش تێبگەین، بۆیە چوون تاوەکو رێگری لە هەبوونی هەندێک ئەکتەری خراپ لەو ناوچەیە بکەن کە هۆکاری تێکدان و وێرانییەکانن.

 

 

کۆنگرێسمان ئەبراهم: بەدڵنیاییەوە، دەمەوێت بگەڕێمەوە زێدی باو و باپیرانم، من چارەگێک کوردم، دایکی باوکم کوردە. پاشناوەکەشی کوردییە، باوەڕ دەکەی یان نا، بۆیەش زۆر پەرۆشم تاوەکو بچمە هەرێمی کوردستان و عێراقیش، هەروەها

بچمە سووریا و هەموو ناوچەکەش.

 

 

کۆنگرێسمان ئەبراهم: بەڵێ، چونکە خەڵکی کورد خۆڕاگرن، باشترین هاوکاریش بۆ کورد، کورد خۆیەتی، ئەوان بەهێز و یەکگرتوون، بۆیەش تاوەکو کورد بەهێز و یەکگرتووبن لە رووی سیاسی و ئایدۆلۆجیشەوە، هیچ شتێک نییە نەتوانن بەدەستی بهێنن.