رووداو دیجیتاڵ
لە رۆژی دووشەممە،7-11-2022ەوە دوو شاندی وڵاتانی ئەرمینیا و ئازەربایجان لە واشنتن دی سی، پایتەختی ئەمریکا دەستیان بە دانوستاندنی ئاشتی کردووە.
بە چاودێری وەزارەتی دەرەوەی ئەمریکا، هەردوو شاندی ئەرمینیا و ئازەربایجان بە سەرۆکایەتیی وەزیرانی دەرەوەی ئەو دوو وڵاتە دەستیان بە دانوستاندنی ئاشتی کردووە. بەرپرسێكی ئەمریکاش دەڵێت: "ئەوەی کە هەیە نەگەیشتووەتە ئاستی گفتوگۆی ئاشتی بەڵکو دانوستاندنی شاندی دوو وڵاتن بەمەبەستی کۆتاییهێنان بە شەڕ و کردە دوژمنکارییەکان."
کۆبوونەوەکان لە باڵەخانەی سەرەکی وەزارەتی دەرەوەی ئەمریکا کرا و ئەنتۆنی بلینکن، وەزیری دەرەوەی ئەمریکا لەو بارەیەوە گوتی: "گفتوگۆی راستەوخۆ باشترین رێگەیە بۆ گەیشتن بە ئاشتییەکی هەمیشەیی، ئەمریکا بە پاڵپشتیکردنی دانوستاندنەکان دڵخۆشە."
لە سەرەتای دەیەی نەوەدی سەدەی رابردووەوە، شەڕ و پێکدادان لەنێوان ئەرمینیا و ئازەربایجان لەسەر هەرێمی ناگۆرنۆ قەرەباخ دروست بووە کە دوایینیان لە ساڵی 2020 بوو و بووە هۆی کوژرانی زیاتر لە 6 هەزار و 500 کەس لە هەردوولا و بە شکستی ئەرمینیا کۆتاییهات؛ پاشان هەردوولا بە چاودێری رووسیا رێککەوتنێكی ئاشتییان واژۆکرد.
سەرباری رێککەوتنەکە و سەرەڕای بڵاوەپێکردنی هێزی سەربازی رووسی لەسەر سنووری نێوان هەردوو وڵات، بەڵام شەڕ و پێکدادان بەردەوام دروست دەبێت کە دوایینیان لە ئەیلوولی ئەمساڵ بوو و بەهۆیەوە لانیکەم 286 کەس کوژران.
وەزیری دەرەوەی ئەمریکا رایگەیاند، وڵاتەکەی پابەندی گفتوگۆکانی ئاشتی نێوان ئەرمینیا و ئازەربایجانە و پاڵپشتی تووند لە سەروەریی ئەو دوو وڵاتە دەکات، گوتیشی، شەڕ و پێکدادانی زیاتر لە 30 ساڵەی ئەرمینیا و ئازەربایجان "قەیرانی مرۆیی گەورە"ی لێکەوتووەتەوە و ئێستا کاتی هاتووە هەنگاو بەرەو ئاشتی بنرێت، لەو چوارچێوەیەشدا هەردوو وڵات دەستپێشخەری بوێرانەیان خستووەتەڕوو.
هەفتەی رابردوو، نیکۆل پاشینان، سەرۆکوەزیرانی ئەرمینیا و ئیلهام عەلیێف، سەرۆکی ئازەربایجان لە کۆبوونەوەیەکی لووتکەیاندا لەگەڵ ڤلادیمیر پوتین، سەرۆکی رووسیا بەڵێنیاندا چی دیکە پەنا بۆ هێز نەبەن، بەڵام شەوی یەکشەممە لەسەر دووشەممە وەزارەتی بەرگریی ئەرمینیا رایگەیاند: "هێزە سەربازییەکانی ئازەربایجان هێرشیانکردە سەر چەند ناوچەیەک لە رۆژهەڵاتی سنووری ئەرمینیا بەبێ ئەوەی هیچ زیانێکی گیانی لێ بکەوێتەوە." لە بەرامبەردا، وەزارەتی بەرگریی ئازەربایجان ئەرمینیای بە دەستپێشخەری شەڕ تۆمەتبار کرد.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ