رووداو- هەولێر
هەرێم لەگەڵ هونەری برای و ئامۆزایەكی و پوورزایەكی، مانگی ئابی ساڵی رابردوو بە نیازی گەیشتن بە ئەڵمانیا رێگای قاچاخیان گرتەبەر و كوردستانیان جێهێشت. دوای مانەوەی مانگێك لە توركیا، لە ئیستەنبوڵەوە لەگەڵ 150 كۆچبەری دیكە بەرەو كەناری دەریا بەڕێدەكەون، بۆ ئەوەی لە دەریای رەشەوە بەرەو رۆمانیا بچن و پاشانیش بۆ ئەڵمانیا، بەڵام هەرێم و چەند كۆچبەرێكی دیكە لە سووریا خۆیان بینییەوە.
هەرێم خوێندكاری زانكۆ بوو، تەنیا چەند كاژێرێكی كەمیان مابوو سنووری ئاویی بولگاریا تێپەڕێنن و بگەنە سنووری ئاویی رۆمانیا، بەڵام لە دوای 15 كاژێر رۆیشتن، یەختەكەیان گازی تێدا نامێنێ و لە نێو دەریادا پەكیاندەكەوێ.
هەرێم گێڕایەوە دوای ئەوەی یەختەكەیان گازی تێدا نەماوە، چاوەڕوانی پۆلیسیان كردووە، لە دوورڕا، گڵۆپی سەوزی یەختی رۆمانییان بەرچاو كەوتووە، كاپتنی یەختەكەیان، لەڕێگەی بێتەلەوە لەگەڵ پۆلیسی رۆمانی قسەی كردووە، بەڵام پۆلیسی رۆمانی پێیگوتوون ئێوە لە سنووری بولگاریادان، ناتوانین بێینە ئەو سنوورە، تا نەگەنە سنووری رۆمانیا.
لەدوای نائومێدبوونیان لە پۆلیسی رۆمانی، چاوەڕێی پۆلیسی بولگارییان كردووە. هەرێم گوتی: "پۆلیسی بولگاری گەیشتنە لامان، كاپتنەكانی یەختەكە داوای گازیان لێكردن، ئێمەش منداڵەكانمان بەرز كردەوە و هاوارمان كرد، تا پۆلیسی بولگاری هەستیان بجووڵێ، هەندێك گازیان پێداین و گەیشتینە لای پۆلیسی رۆمانی. ئەوانیش گازیان پێداین و ئاوی خوادنەوەشیان بە تەواوی كۆچبەران دا".
دیسان گازیان لێدەبڕێ، بەڵام ئەمجارە پۆلیس گازیان ناداتێ، دوای چاوەڕوانییەكی زۆر، وەك هەرێم باسی دەكات، كەشتییەكی گەورەیان لێ وەدەردەكەوێ و پەنای بۆ دەبەن، بەڵام دواتر دەردەكەوێ ئەوە هێزی دەریاوانیی توركیایە. هەرێم دەڵێت: "تا كەشتییەكە گەیشتە لامان، نەمانزانی كەشتیی پۆلیسی توركییە و پۆلیسی رۆمانی هەواڵی پێداون. پۆلیسی نێو كەشتییەكە تەواوی كۆچبەرانیان خستە نێو كەشتییە گەورەكە و دانە دانە پرسیاریان لێكردین و ناویان یاداشت كردین".
سەرجەم كۆچبەرەكان خۆیان بە "سووری" تۆمار كرد "چەند كەسێكمان لەگەڵدا بوون، گوتیان: ئێمە پێشتر لە سنووری توركیا دەستگیركراین و خۆمان بە سووری تۆمار كردووە، دوای دوو رۆژ ئازاد كراین".
ئەو گەنجە تەمەن 22 ساڵە باسی هەڵوێستی پۆلسی توركیای كرد و گوتی :"پۆلیسەكان بە دەنگی بەرز قسەیان لەگەڵ دە‌كردین، ئاو و خواردنیان بە ژن و منداڵەكان دا، وەلێ هیچیان بە گەنجەكان نەدا، لەدوای 12 كاژێر مانەوە لەنێو ئاودا، گەیشتینەوە سنووری توركیا، بردیانین بۆ سەربازگەیەكی توركیا و پەنجەمۆریان پێ كردین، لەدوای شەو و رۆژێ لەو سەربازگەیەوە، بەرەو زیندانێكی حەوت نهۆمییان بردین".
هەرێم و كۆچبەرەكانی دیكە ماوەی 22 رۆژ لە گرتووخانەكە دەهێڵدرێنەوە، لەو ماوەیە چەندینجار لێكۆڵینەوەیان لەگەڵ دەكرێ. هەرێم دەڵێت "هەموو جارێ دەیانپرسی خەڵكی كوێن، دەمانگوت قامشلۆ، وەرگێڕەكەشمان دەیگوت بڵێن خەڵكی سووریان ئازاد دەكرێن".
بە گوتەی هەرێم، دۆخی زیندانیان لەو زیندانە زۆر ناخۆش بووە، پۆلیس بە دار لێیداون. تەنانەت لەگەڵ زللە گوێی كۆچبەرێكی كورد كەڕ بووە.
هەرێم و هاوڕێیانی هەرگیز بیریان لەوە نەدەكردەوە دیپۆرتی سووریا بكرێنەوە، بەڵام ئەوە روویدا. هەرێم دەڵێت: "دوای 22 رۆژ، چوار پاسی گەورەیان هێنا، كۆچبەرەكانیان بەرەو فڕۆكەخانە برد، لەوێ بەرەو سەر سنووریان بردین، سەرجەم كۆچبەرەكانیان تەسلیمی بەرەی نوسرە كرد".
ئەوەی ئەو كۆچبەرانە بینیویانە، بەسەر كەم كۆچبەری رێگەی ئەوروپادا هاتووە، بەرەی نوسرە كۆچبەرەكانی خستووەتە نێو بینایەكی حكومی، لەدوای لێكۆڵینەوە وەرەقەیەكیان پێداون و بەڕێیان كردوون، لە بازگە وەرەقەكانیان لێسەندوون و بە 11 پاسی بچووك، بەرەو عەفرین رۆیشتوون، لە ڕێگا تووشی بازگەیەكی دیكە دەبن و هەمدیسان لێكۆڵینەوەیان لەگەڵ دەكەن، لەوێش دەڵێن: خەڵكی قامیشلۆین، وەلێ بەرپرسانی ئەو بازگەیە، لەڕێگەی مۆبایل و ژمارە تەلەفۆنەكانیانەوە تێدەگەن ئەمانە خەڵكی عێراقن، لە 180 كەس، تەنیا 16 گەنج دەهێڵنەوە و خانەوادەكان بەڕێدەكەن، ژمارەیەك لەو گەنجانە دەست دەكەن بە گریان و ژمارەیەكی دیكە دەڵێن: لەگەڵ ئەو خانەوادە و ئەم خانەوادەین، لەم نێوەدا شەش كۆچبەری دیكە كە گوایە لەگەڵ خێزانەكانن دەرباز دەبن و تەنیا 10 كۆچبەر دەمێننەوە. هەرێم دەڵێت: "لەبەرئەوەی ئێمە دەستمان بە گریان كرد، ئێمەیان ناردەوە نێو كۆچبەرانی دیكە، گریانی ئێمە فریادڕەسێكی كاتی بوو".
هەرێم دەربازبوون لە دەستی بەرەی نوسرە بە موعجیزە ناودەبات و دەڵێت "دەوروبەری كاژێر هەشتی شەو، چاویان بەستین، لەدڵی خۆماندا گوتمان دەمانكوژن، بە چاو بەستراوی رۆیشتین تا گەیشتینە زیندان، سێ شەو لە زیندان ماینەوە. تێپەڕینی ئەو سێ شەوە بە ئەندازەی سێ ساڵ زەحمەت بوو، زۆر بە وردی لێكۆڵینەوەیان لەگەڵ كردین. دواتر ئێمەیان بردە ئەو بازگەیەی لێی دەستگیر كرابووین، لەوێ ئازادیان كردین. لەدوای كاژێرێك لەسەر خەرجیی خۆمان، بەرەو سنووری جوگرافی یەپەگە بەڕێكراین و لە دەستی بەرەی نوسرە رزگارمان بوو".
هەرێم دەڵێت: "لە عەفرین پێوەندیمان بە ماڵەوە كرد، لەوكاتەدا هونەری برام گەیشتبووەوە كوردستان، بەڵام چۆن و لەكوێوە، هیچی لێ نازانم! لەدوای ماوەیەك یەپەگە كەسێكی خۆی لەگەڵ ناردین بۆ ئەوەی لە عەفرینەوە بەرەو عەزاز بڕۆین، وەلێ رێگەیان نەدا، چونكە سوپای سوریای ئازاد و هێزەكانی قەڵغانی فوراتی لێ بوو، ئەلبابیش چەكدارانی داعشی تێدابوو. بە ناچاری ئێمەیان گەڕاندەوە".
هەرێم و نۆ كۆچبەرەكەی دیكە لە باڵەخانەیەكی حكومی، لەژێر چاودێریی شەڕڤاناندا دەمێننەوە "شەڕڤانەكان دەیانگوت رێگای دەرچوون نییە، چواردەورمان پڕیەتی لە هێزی سەربازی، رەوشەكە زۆر خراپە، ئێوەش گەنجن، لێرە بڕۆن كێشەتان بۆ دروست دەبێ، جارێ چاوەڕوان بن".
رۆژ و دووان، هەفتە و دوو هەفتە، مانگ و دوو مانگ تێدەپەڕێ و ئەوان هەر لەو بینایە چاوەڕێن. هەرێم دەڵێ: "هەمیشە لەڕێگەی ئینتەرنێتەوە لەگەڵ ماڵەوە لە پەیوەندیدا بووم و قسەمان دەكرد، بۆ ئەوەی رێگاچارەیەكی رزگاربوونمان بۆ بدۆزنەوە. كەسوكارمان لەگەڵ برایەكی عوسمان بایدەمیر قسەیان كردبوو بەڵێنی پێدابوون كە هەموو هەوڵێك بۆ رزگاركردنمان بدات، ئەو برایەی بایدەمیر بەڵێنەكەی بردە سەر و دواجار یەپەگە لەگەڵ سوپای سووریا رێككەوتن و بەڕێگەی سەربازی لە عەفرینەوە ئێمەیان بەرەو مەنبج بەڕێكرد و بەنێو هێزی سەربازیی بەشار ئەسەد دا رۆیشتین، كاتێ گەیشتینە مەنبج، لەوێش هەفتەیەك ماینەوە".
دوای نەوەت رۆژ مانەوە لە سووریا، لە 22ی كانوونی یەكەمی ساڵی رابردوودا، ئەوانیان خستە نێو هەلیكۆپتەر و ماوەی سێ كاژێر بە ئاسمانەوە بوون تا گەیشتنەوە سلێمانی. هەرێم دەڵێ "لەوێ باوك و دایك و كەسوكارم لە چاوەڕوانیماندا بوون، بە بینینەوەی ئەوان گریان و پێكەنین، خۆشی و دڵتەنگیمان تێكەڵی یەكدی بوون! بەڕاستی ئەمە شتێكە لەیادناچێت".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ